ઉમેશ પાલ અપહરણ કેસમાં કોર્ટ દ્વારા આજીવન કેદની સજા ફટકાર્યા બાદ અતિકને પાછો સાબરમતી જેલમાં લાવવામાં આવ્યો હતો. પરત ફરેલા માફિયા અતીક અહેમદને હાલ ક્વોરેન્ટાઈન કરવામાં આવ્યો છે. પ્રયાગરાજથી પરત ફર્યા બાદથી અતીકની તબિયત સારી ન હોવાનું સામે આવ્યું છે. જેને લઈને જેલ પ્રશાસને તેની દેખરેખ વધારી દીધી છે. 29 માર્ચની મોડી સાંજે જ્યારે અતીક સાબરમતી જેલમાં પહોંચ્યો ત્યારે તેણે ચક્કર આવવાની ફરિયાદ કરી હતી. આ પછી તેના સ્વાસ્થ્યની તપાસ કરવામાં આવી હતી. જ્યારે તે બેહોશ થઈ ગયો ત્યારે તેને ક્વોરેન્ટાઈન કરવામાં આવ્યો હતો. જેલ પ્રશાસનના જણાવ્યા અનુસાર, અતીકનો કોરોના આરટી-પીસીઆર ટેસ્ટ આજે કરવામાં આવશે. નેગેટિવ આવવા પર, અતીકને સીધો જ હાઈ સિક્યોરિટી જેલમાં ટ્રાન્સફર કરવામાં આવશે, જો કે જેલ પ્રશાસને તેને કેદી નંબર પણ આપ્યો છે.
આ પણ વાંચો : The Ken Report : હિંડનબર્ગ બાદ ધ કેનનો રિપોર્ટ આવ્યો સામે, અદાણી ગ્રુપ પર લગાવ્યા આ આરોપ !
માફિયા અતીક અહેમદ હમણાં સુધી સાબરમતી જેલની નવી જેલમાં રહેતો હતો, પરંતુ આજીવન કેદ બાદ તેને જૂની જેલમાં રાખવામાં આવશે. આ સિવાય તેની સ્થિતિ હવે અંડર ટ્રાયલથી બદલાઈને દોષિત કેદી થઈ ગઈ છે. આવી સ્થિતિમાં તેના પર નવા નિયમો પણ લાગુ કરવામાં આવશે. અતીકનો કોરોના રિપોર્ટ નેગેટિવ આવ્યા બાદ અને તબિયત સ્વસ્થ થતાં તેને બેરેકમાં ખસેડવામાં આવશે. જેલ પ્રશાસને તેને 17052 કેદી નંબર આપ્યો છે. અતીકની ઓળખ હવે જેલમાં કેદી નંબર 17052 તરીકે થશે. અતીકને પહેલેથી જ ડાયાબિટીસ, બ્લડપ્રેશર અને હાઈપરટેન્શન જેવી બીમારીઓની ફરિયાદ છે. આ કારણે તે ત્યાં ઘણી દવાઓ પણ લે છે.
