રાજસ્થાનમાં મુખ્ય પ્રધાન બદલવાની ચર્ચાઓ વચ્ચે ગેહલોત જૂથના ઘણા ધારાસભ્યોએ બળવો કર્યો. ગેહલોતને ટેકો આપતા 82 ધારાસભ્યોએ સ્પીકર સીપી જોશીને સામૂહિક રાજીનામું સોંપ્યું છે. આ દરમિયાન કોંગ્રેસના વરિષ્ઠ નેતા કેસી વેણુગોપાલે સીએમ અશોક ગેહલોત અને મલ્લિકાર્જુન ખડગે સાથે ફોન પર વાત કરી અને સમગ્ર હંગામાનું કારણ પૂછ્યું. સીએમ અશોક ગેહલોતે તેને ધારાસભ્યોની ચાલ ગણાવી છે. તેમણે કેસી વેણુગોપાલને કહ્યું કે આ ધારાસભ્યોની લાગણી છે. વાસ્તવમાં અશોક ગેહલોતના કોંગ્રેસ અધ્યક્ષની ચૂંટણી લડવાની જાહેરાત બાદ રાજસ્થાનમાં સીએમ બદલવાની ચર્ચા શરૂ થઈ ગઈ હતી. કારણ કે કોંગ્રેસમાં ‘વન મેન-વન પોસ્ટ’નો સિદ્ધાંત છે. જેને લઈને આજે જયપુરમાં મુખ્યમંત્રી આવાસ પર કોંગ્રેસ ધારાસભ્ય દળની બેઠક બોલાવવામાં આવી હતી, જે ધારાસભ્યોના બળવાને પગલે રદ કરવામાં આવી હતી.
સચિન પાયલટના નામે બળવો
આ બેઠક માટે કોંગ્રેસે વરિષ્ઠ નેતાઓ મલ્લિકાર્જુન ખડગે અને અજય માકનને નિરીક્ષક અને પ્રભારી બનાવ્યા હતા. આ બેઠક માટે મલ્લિકાર્જુન ખડગે, અજય માકન, પૂર્વ ડેપ્યુટી સીએમ સચિન પાયલટ સહિત 25 ધારાસભ્યો સીએમ આવાસ પર પહોંચ્યા હતા. વિધાયક દળની બેઠક પહેલા સીએમ ગેહલોતના નજીકના અને રાજસ્થાન સરકારમાં મંત્રી શાંતિ ધારીવાલના ઘરે ગેહલોત તરફી ધારાસભ્યોની બેઠક યોજાઈ હતી. આ બેઠકમાં ગેહલોત જૂથના લગભગ 65 ધારાસભ્યો હાજર રહ્યા હતા. આ બેઠકમાં સચિન પાયલટના નામ પર ધારાસભ્યોએ બળવો કર્યો હતો.
ગેહલોત છાવણીના ધારાસભ્યોના રાજીનામા
ધારાસભ્યોએ કહ્યું કે જો સીએમ અશોક ગેહલોત કોંગ્રેસ અધ્યક્ષ બને છે અને મુખ્યમંત્રી પદ પરથી રાજીનામું આપે છે, તો પાયલોટની સરકારને તોડવાની કોશિશ દરમિયાન કોંગ્રેસની સાથે રહેલા 102 ધારાસભ્યોમાંથી નવા સીએમ બનાવવામાં આવે. પાયલટના નામે ગેહલોત કેમ્પે બળવો કર્યો. આ પછી તમામ ધારાસભ્યો રાજીનામું આપવાનું કહેતા ધારીવાલના ઘરેથી સ્પીકર સીપી જોશીના ઘરે પહોંચ્યા અને સામૂહિક રાજીનામું સોંપ્યું.
આ પણ વાંચો : રાજસ્થાનમાં મોટી ઉથલ પાથલ, ગેહલોત સમર્થક ધારાસભ્યના રાજીનામાં : સૂત્રો
