ભારત-પે કેસઃ અશ્નીર ગ્રોવર અને તેમના પત્નીને દિલ્હી એરપોર્ટ પર રોકવામાં આવ્યાં

• દિલ્હી પોલીસની આર્થિક અપરાધ શાખા (EOW) ની વિનંતી પર દંપતી સામે LOC જારી કરવામાં આવ્યું હતું
• EOWએ ભારતપેનું સંચાલન કરતી રેસિલિએન્ટ ઇનોવેશન્સ પ્રાઇવેટ લિમિટેડને રૂ. 81 કરોડનું નુકસાન પહોંચાડવા બદલ FIR દાખલ કરી હતી

નવી દિલ્હી: ભારત-પેના સહ-સ્થાપક અશ્નીર ગ્રોવર અને તેમના પત્ની માધુરી જૈનને તેમની વિરુદ્ધ જારી કરાયેલી એલઓસી (લુક આઉટ સર્ક્યુલર)ના આધારે ગુરુવારે ઈન્દિરા ગાંધી ઈન્ટરનેશનલ એરપોર્ટ પર રોકવામાં આવ્યાં હતાં. અહેવાલો અનુસાર બંને ન્યૂયોર્ક જઈ રહ્યાં હતાં. દિલ્હી પોલીસની આર્થિક અપરાધ શાખા (EOW)ના વિનંતી પર બંને વિરુદ્ધ એલઓસી જારી કરવામાં આવ્યું હતું. જૂનની શરૂઆતમાં EOW એ દંપતી અને પરિવારના કેટલાક અન્ય સભ્યો સામે ભંડોળની કથિત ઉચાપત અને ભારત-પેનું સંચાલન કરતી રેસિલિએન્ટ ઇનોવેશન્સ પ્રાઇવેટ લિમિટેડને રૂ. 81 કરોડનું નુકસાન પહોંચાડવા બદલ FIR દાખલ કરી હતી.

જે વ્યક્તિની વિરુદ્ધ એલઓસી જારી કરવામાં આવ્યું છે તે દેશની બહાર મુસાફરી કરી શકે નહીં. આ અઠવાડિયાની શરૂઆતમાં દિલ્હી હાઈકોર્ટમાં સ્ટેટસ રિપોર્ટમાં EOW એ જણાવ્યું હતું કે, વિક્રેતા ઇન્વૉઇસમાં વિસંગતતાઓ છે અને જણાવ્યું હતું કે ભારત-પે સાથે જોડાયેલી કેટલીક માનવ સંસાધન (HR) કન્સલ્ટન્સીને ફિનટેક યુનિકોર્નમાંથી ભંડોળ મેળવવા માટે સેટ કરવામાં આવી હતી. શંકાના ઘેરામાં રહેલી આઠ HR કન્સલ્ટન્સી ફિનટેક કંપનીના ભૂતપૂર્વ વડા અને સહ-સ્થાપક અશ્નીર ગ્રોવરની પત્ની માધુરી જૈનના સંબંધીઓ સાથે સંકળાયેલી હોવાનું જાણવા મળ્યું છે.

EOW એ કહ્યું કે તપાસ હજુ તેના પ્રારંભિક તબક્કામાં છે. સૂત્રોએ જણાવ્યું હતું કે દંપતીને તપાસમાં જોડાવા માટે આવતા અઠવાડિયે EOW સમક્ષ હાજર થવાનું કહેવામાં આવ્યું છે. MZM લીગલના ભારત-પેના વકીલ ઝુલ્ફીકાર મેમને મીડિયાને જણાવ્યું હતું કે, દિલ્હી હાઈકોર્ટમાં EOW દ્વારા દાખલ કરાયેલા નવીનતમ સ્ટેટસ રિપોર્ટ પછી, જ્યાં તેમને ઉચાપતના પુરાવા મળ્યા છે, EOW માટે આરોપી વિરુદ્ધ એલઓસી જારી કરવું યોગ્ય છે.

આ પણ વાંચો, દેશના ત્રણ મહાન નેતાની આજે પૂણ્યતિથિ, આવો જાણીએ તેમના વિશે