સંદેશખલીમાં TMC નેતાના ઘરમાંથી ઝડપાયા હથિયાર અને દારૂગોળો

• લોકસભાની ચૂંટણી પહેલા CBI અને NSG દ્વારા મોટી કાર્યવાહી
• મમતા સરકારે તપાસને સુપ્રીમ કોર્ટમાં પડકારી

નવી દિલ્હી, 26 એપ્રિલ : પશ્ચિમ બંગાળનો સંદેશખલી વિસ્તાર ફરી એકવાર ચર્ચામાં આવ્યો છે. કારણ કે, ચૂંટણી પહેલા જ સેન્ટ્રલ બ્યુરો ઓફ ઈન્વેસ્ટિગેશન (CBI) એ શુક્રવારે એક દરોડો પાડ્યો હતો, જેમાં TMC નેતાના સંબંધીના ઘરેથી કથિત રીતે મોટી માત્રામાં હથિયારો અને દારૂગોળો મળી આવ્યો હતો. આ પછી NSG બોમ્બ સ્ક્વોડ ઘટનાસ્થળે પહોંચી ગઈ છે. સીબીઆઈની કાર્યવાહી સામે બંગાળ સરકાર સુપ્રીમ કોર્ટમાં પહોંચી છે. મમતા સરકારે હાઈકોર્ટના આદેશને પડકાર્યો છે, જેમાં સીબીઆઈને દરોડા પાડવાની મંજૂરી આપવામાં આવી છે. સુપ્રીમ કોર્ટમાં જસ્ટિસ બીઆર ગવઈની બેંચ આ અરજી પર 29 એપ્રિલે સુનાવણી કરશે.

સંદેશખલી બસીરહાટ લોકસભા મતવિસ્તાર હેઠળ આવે છે અને અહીં 1 જૂને લોકસભા ચૂંટણી યોજાવાની છે. ભાજપે સંદેશખલી પીડિતા રેખા પાત્રાને આ બેઠક પરથી ઉમેદવાર બનાવ્યા છે. તે સંદેશખાલી ઘટનાના માસ્ટરમાઇન્ડ અને સસ્પેન્ડ તૃણમૂલ નેતા શાહજહાં શેખ અને તેના સાગરિતોની પીડિત છે. ત્રણ આરોપીઓ શાહજહાં શેખ, શિબુ હાઝરા અને ઉત્તમ સરદાર જેલના સળિયા પાછળ છે.

દરમિયાન સીબીઆઈ અધિકારીઓ કેન્દ્રીય સુરક્ષા દળો સાથે સર્ચ ઓપરેશન શરૂ કરવા સંદેશખલી બ્લોકના સરબેરિયા વિસ્તારમાં પહોંચ્યા હતા. સીબીઆઈને નક્કર માહિતી મળી હતી. જેના આધારે અધિકારીઓએ ઉક્ત મકાન પર દરોડો પાડ્યો હતો. આ ઘર સ્થાનિક પંચાયત સભ્ય હફીઝુલ ખાનના સંબંધી અબુ તાલેબનું છે. અબુલ તાલેબ ટોટો રિક્ષાચાલક છે અને તે હાફિઝુલ એસકે શજહાંનો નજીકનો સહયોગી માનવામાં આવે છે. સૂત્રોના જણાવ્યા પ્રમાણે ઘરની અંદર ઘણા બોમ્બ રાખવામાં આવ્યા હતા. સીબીઆઈએ ઓપરેશનને સરળ બનાવવા માટે બોમ્બ સ્કેનિંગ ઉપકરણ પણ લગાવ્યું હતું. કેન્દ્રીય સુરક્ષા દળોએ આ મિશનમાં 10 સભ્યોની સીબીઆઈ ટીમને મદદ કરી હતી.

મોટી માત્રામાં હથિયારો અને બોમ્બ મળ્યા બાદ અધિકારીઓએ ઉચ્ચ અધિકારીઓને જાણ કરી હતી. આ પછી NSG બોમ્બ સ્ક્વોડ ઘટનાસ્થળે પહોંચી અને સર્ચ ઓપરેશન હાથ ધર્યું છે. હાલમાં વધુ માહિતી એકઠી કરવામાં આવી રહી છે.

આ પહેલા સીબીઆઈએ સંદેશખાલી કેસમાં પ્રથમ એફઆઈઆર નોંધી હતી. સીબીઆઈએ ઈમેલ દ્વારા ફરિયાદના આધારે એફઆઈઆર નોંધી હતી. આ FIRમાં પાંચ લોકોના નામ છે જ્યારે બાકીના અજાણ્યા લોકો છે. સીબીઆઈની 10 સભ્યોની ટીમે ગયા અઠવાડિયે સંદેશખાલીની મુલાકાત લીધી હતી જેથી મહિલાઓ પર અત્યાચાર અને જમીન હડપ કરવાના કેસોની તપાસ કરવામાં આવે. આ સમય દરમિયાન, ટીમે પીડિત પરિવારો અને મહિલાઓ સાથે વાત કરી અને તેમના નિવેદનો નોંધ્યા. આ સાથે CBIની એક ટીમ પણ સંદેશખાલી પોલીસ સ્ટેશન પહોંચી, જ્યાં હાજર પોલીસકર્મીઓ પાસેથી તપાસ રિપોર્ટ માંગવામાં આવ્યો છે.

ઉલ્લેખનીય છે કે, ટીએમસીએ આ કાર્યવાહી પર સવાલ ઉઠાવ્યા છે. તૃણમૂલ કોંગ્રેસના પ્રવક્તા કુણાલ ઘોષે કહ્યું કે સંદેશખાલીના મુદ્દાને હેડલાઇન્સમાં રાખવા માટે સુનિયોજિત કાવતરાના ભાગરૂપે, દિલ્હીમાં નાટકીય ગતિવિધિઓ કરીને મતદાનને પ્રભાવિત કરવાનો પ્રયાસ કરવામાં આવી રહ્યો છે. પૂર્વ આયોજિત નાટકનું મંચન કરવામાં આવી રહ્યું છે. આ સમાચાર ફેલાતા જ ચર્ચાનું બજાર ગરમ થઈ ગયું છે. પોલીસે વધુ સતર્ક રહેવાની જરૂર છે.