PM મોદીની દેશને વધુ એક ભેટ : 1 કરોડ ઘરમાં સોલાર રૂફટોપ માટે શરૂ કરાશે ‘પ્રધાનમંત્રી સૂર્યોદય યોજના’
નવી દિલ્હી, 22 જાન્યુઆરી : અયોધ્યામાં રામ લલ્લાના અભિષેક સમારોહમાં હાજરી આપીને દિલ્હી પરત ફરતા જ વડાપ્રધાન નરેન્દ્ર મોદીએ મોટી જાહેરાત કરી છે. કેન્દ્ર સરકારે 1 કરોડ ઘરોમાં રૂફટોપ સોલાર લગાવવાનું લક્ષ્ય રાખ્યું છે. સોશિયલ મીડિયા પ્લેટફોર્મ X પર આની જાહેરાત કરતા પીએમ મોદીએ કહ્યું કે તેમની સરકાર ‘પ્રધાનમંત્રી સૂર્યોદય યોજના’ શરૂ કરવા જઈ રહી છે. ભગવાન રામને આ યોજના સાથે જોડતા તેમણે કહ્યું કે વિશ્વના તમામ ભક્તોને સૂર્યવંશી ભગવાન શ્રી રામના પ્રકાશથી હંમેશા ઊર્જા મળે છે.
1 કરોડ ઘરોમાં રૂફટોપ સોલાર લગાવવાની જાહેરાત
પીએમ મોદીએ ટ્વિટર પર લખ્યું, ‘આજે, અયોધ્યામાં તેમના અભિષેકના શુભ અવસર પર, મારો સંકલ્પ વધુ મજબૂત થયો છે કે ભારતીયોની છત પર તેમની પોતાની સોલર રૂફ ટોપ સિસ્ટમ હોવી જોઈએ.’ પીએમ મોદીએ આગળ લખ્યું, ‘તેથી, અયોધ્યાથી પાછા ફર્યા પછી, મેં પહેલો નિર્ણય લીધો છે કે અમારી સરકાર 1 કરોડ ઘરો પર રૂફટોપ સોલર લગાવવાના લક્ષ્ય સાથે ‘પ્રધાનમંત્રી સૂર્યોદય યોજના’ શરૂ કરશે.’
ઉર્જા ક્ષેત્રે ભારત આત્મનિર્ભર બનશે
ઉલ્લેખનીય છે કે, પીએમ મોદી અયોધ્યાથી પરત ફરતાની સાથે જ નવી દિલ્હીમાં એક ખાસ મીટિંગ કરી હતી, ત્યારબાદ તેમણે ગરીબ અને મધ્યમ વર્ગ માટે આ મોટી જાહેરાત કરી હતી. પીએમ મોદીનું કહેવું છે કે આનાથી માત્ર ગરીબ અને મધ્યમ વર્ગના વીજળી બિલમાં ઘટાડો થશે નહીં, પરંતુ ઉર્જા ક્ષેત્રે ભારત આત્મનિર્ભર બનશે. અન્ય એક્સ-પોસ્ટમાં, પીએમ મોદીએ દેશવાસીઓને તેમના ઘરોમાં રામજ્યોતિ પ્રગટાવીને ભગવાન રામનું સ્વાગત કરવાની અપીલ કરી. આ અપીલની સાથે તેણે રામ મંદિરની વિધિનો વીડિયો પણ શેર કર્યો છે. પીએમ મોદીએ અયોધ્યામાં ભવ્ય રામ મંદિરમાં રામ લલ્લાની મૂર્તિના અભિષેકને નવા યુગના આગમનનું પ્રતીક ગણાવ્યું છે અને લોકોને આગામી 1000 વર્ષ માટે મજબૂત, ભવ્ય અને દિવ્ય ભારતનો પાયો નાખવા આહ્વાન કર્યું છે.
