હરિયાણામાં સૈનીની શપથવિધિ પૂર્વે જેપી નડ્ડા સાથે અનિલ વિજની મુલાકાત, નવાજુનીના એંધાણ!

નવી દિલ્હી, 14 ઓક્ટોબર : અંબાલા કેન્ટ બેઠક પરથી સતત 7મી વખત ધારાસભ્ય તરીકે ચૂંટાયેલા હરિયાણા ભાજપના વરિષ્ઠ નેતા અનિલ વિજે જેપી નડ્ડા સાથે મુલાકાત કરી છે. તેઓ રવિવારે પાર્ટી ચીફને મળવા દિલ્હી પહોંચ્યા હતા. હરિયાણામાં વરિષ્ઠ મંત્રી અનિલ વિજની જેપી નડ્ડા સાથેની મુલાકાતની પણ ચર્ચામાં છે.

હાલમાં નવી સરકારમાં તેમને કયું મંત્રાલય મળી શકે છે તે અંગે અટકળો ચાલી રહી છે. તેઓ મનોહર લાલ ખટ્ટરની સરકારમાં ગૃહ પ્રધાન હતા, પરંતુ નાયબ સિંહ સૈનીને કમાન મળ્યા બાદ તેમણે શપથ લીધા ન હતા. તેઓ માત્ર ધારાસભ્ય તરીકે કામ કરતા હતા. આ વખતે ફરી તેઓ અંબાલાથી જીત્યા છે. આ જીત બાદ તેમના ફરી કેબિનેટમાં સામેલ થવાની વાતો ચાલી રહી છે.

નાયબ સિંહ સૈની 17 ઓક્ટોબરે કેટલાક મંત્રીઓ સાથે શપથ લેશે. હવે ચર્ચા એ છે કે અનિલ વિજ 17 ઓક્ટોબરે તેમની સાથે શપથ લેશે કે નહીં. વાસ્તવમાં અનિલ વિજે હરિયાણા ચૂંટણીના પરિણામો પહેલા સીએમ પદનો દાવો કર્યો હતો. તેમણે કહ્યું કે તેઓ વરિષ્ઠ નેતા છે અને મુખ્યમંત્રી પદ માટે યોગ્ય છે. આવી સ્થિતિમાં તેઓ નાયબ સૈની સરકારમાં મંત્રી તરીકે શપથ લેશે કે નહીં?  આ અંગે ભાજપમાં આંતરિક ચર્ચાઓ તેજ છે.

જોકે, દાવો કર્યા બાદ અનિલ વિજે એમ પણ કહ્યું કે આ મારો મત નથી પરંતુ તેમના સમર્થકોનો અભિપ્રાય છે. સ્પષ્ટતા આપતા તેમણે કહ્યું હતું કે જ્યારે મનોહર લાલ ખટ્ટરની જગ્યાએ નાયબ સિંહ સૈનીને સીએમ બનાવવામાં આવ્યા હતા, ત્યારે મારા સમર્થકોનો મત હતો કે હું પણ તેના માટે યોગ્ય પસંદગી હતો. પછી જ્યારે હું કંઈ બોલ્યો નહીં તો લોકો કહેવા લાગ્યા કે અનિલ વિજ પોતે સીએમ બનવા નથી માંગતા. તેથી જ આ મુદ્દા પર વાત કરતી વખતે મેં કહ્યું કે હું પણ મુખ્યમંત્રી બની શકું છું. મારા સમર્થકોની મૂંઝવણ દૂર કરવા માટે મેં આવું કહ્યું હતું.

મહત્વનું છે કે અનિલ વિજની ગણતરી હરિયાણા ભાજપના ફાયર બ્રાન્ડ નેતાઓમાં થાય છે. જ્યારે રાજ્યમાં પાર્ટી નબળી હતી અને ત્રીજા કે ચોથા નંબરની પાર્ટી હતી ત્યારથી તેઓ ભાજપના ધારાસભ્ય છે. આ ચૂંટણીમાં ભાજપને 48 બેઠકો મળી છે અને તે સતત ત્રીજી વખત રાજ્યમાં સત્તા પર આવી છે.

આ પણ વાંચો :- દિવાળી પર ફટાકડા નહીં ફોડી શકે દિલ્હીવાસીઓ, AAP સરકારે માર્ગદર્શિકા જાહેર કરી