અનિલ કપૂરે જેરેમી રેનરના સારા સ્વાસ્થ્ય માટે કરી પ્રાર્થના, આ સિરીઝમાં જોવા મળશે સાથે
હોલીવુડ એક્ટર જેરેમી રેનર અકસ્માતની ઝપેટમાં આવવાને કારણે ગંભીર રીતે ઘાયલ થયો છે. નેવાડામાં જેરેમી તેના ઘર બહાર જમા થયેલા બરફને હટાવી રહ્યો હતો ત્યારે તેની સાથે અકસ્માત થયો હતો. હોસ્પિટલમાં તેની સારવાર ચાલી રહી છે. બોલીવુડ અભિનેતા અનિલ કપૂરે જેરેમી રેનર જલ્દી સ્વસ્થ થાય તે માટે શુભેચ્છા પાઠવી છે.
Praying for your speedy recovery Jeremy ???????????????? pic.twitter.com/Lar52njJoo
— Anil Kapoor (@AnilKapoor) January 2, 2023
બોલિવૂડના દિગ્ગજ અભિનેતા અનિલ કપૂરે પોતાના ઓફિશિયલ ટ્વિટર હેન્ડલ પર હોલીવુડ સુપરસ્ટાર જેરેમી રેનર વિશે ટ્વિટ કર્યું છે. આ ટ્વિટમાં અનિલ કપૂરે પોતાની અને જેરેમી રેનરની તસવીર સામેલ કરી છે. સાથે જ, આ ફોટાના કેપ્શનમાં અનિલે લખ્યું છે કે- જેરેમી રેનર, હું ભગવાનને તમારી જલ્દી સ્વસ્થતા માટે પ્રાર્થના કરું છું. આ રીતે અનિલ કપૂરે જેરેમીની સુરક્ષા માટે પ્રાર્થના કરી છે.
જેરેમી રેનર અને અનિલ કપૂર ડિઝની પ્લસ હોટસ્ટારની આગામી વેબ સીરિઝ “Rennervations”માં સાથે દેખાશે. આ સિરીઝના શૂટિંગ માટે થોડા સમય પહેલા જેરેમી રેનર પણ ભારત આવ્યો હતો. જેરેમી રેનર સ્વસ્થ થયા પછી આ સિરીઝ રિલીઝ થશે.
જેરેમી રેનરનો કેવી રીતે થયો અકસ્માત
જેરેમી રેનર અમેરિકાના નેવાડામાં ઘર બહાર જામેલો બરફ હટાવી રહ્યો હતો ત્યારે અચાનક બરફના તોફાનના કારણે થીજી ગયેલો બરફ તેજ ગતિએ આગળ વધવા લાગ્યો અને જેરેમી રેનર આ ભયાનક અકસ્માતની ઝપેટમાં આવી ગયો. તરત જ, જેરેમી રેનરને એરલિફ્ટ કરીને હોસ્પિટલમાં લઈ જવામાં આવ્યો, જ્યાં તેની સારવાર ચાલી રહી છે. કહેવામાં આવી રહ્યું છે કે જેરેમી રેનરની હાલત હજુ પણ નાજુક છે.
