- હાઈકોર્ટના આદેશ બાદ CBIએ કાર્યવાહી કરી
કોલકાતા, 24 ઓગસ્ટ : કોલકાતાની RG કર મેડિકલ કૉલેજમાં મહિલા ડૉક્ટરની હત્યા અને કથિત બળાત્કારના કેસની તપાસ કરી રહેલી CBI કૉલેજના ભૂતપૂર્વ પ્રિન્સિપાલ સંદીપ ઘોષ પર તેની પકડ વધુ કડક કરી રહી છે. કોલકાતા હાઈકોર્ટના આદેશ બાદ હવે સીબીઆઈએ પૂર્વ પ્રિન્સિપાલ વિરુદ્ધ FIR નોંધી છે. આજે જ કોલકતા હાઈકોર્ટના આદેશ બાદ કેસની તપાસ માટે રચાયેલી SITએ આ કેસ સાથે સંબંધિત તમામ દસ્તાવેજો CBIને સોંપી દીધા હતા.
ઉલ્લેખનીય છે કે કોલકાતા રેપ કેસની તપાસ CBI કરી રહી છે. આ કેસમાં આજે પોલીસ પાસેથી દસ્તાવેજો મળ્યા બાદ સીબીઆઈએ પહેલા મેડિકલ કોલેજના પૂર્વ પ્રિન્સિપાલ સંદીપ ઘોષ વિરુદ્ધ કાર્યવાહી કરી અને એફઆઈઆર નોંધી. આ એફઆઈઆરની કોપી પહેલાથી જ અલીપુર સીજેએમ કોર્ટમાં જમા કરવામાં આવી છે.
સીબીઆઈ સતત પૂછપરછ કરી રહી છે
એ પણ નોંધનીય છે કે આરજી કર હોસ્પિટલમાં જુનિયર મહિલા ડૉક્ટર સાથે બળાત્કાર અને હત્યાની ઘટના સંબંધિત કેસમાં સીબીઆઈ સતત સંદીપ ઘોષની પૂછપરછ કરી રહી છે. હવે ‘નાણાકીય ગેરરીતિ’ના કેસોની તપાસ પણ CBIને સોંપવામાં આવી છે. આવી સ્થિતિમાં, એવું માનવામાં આવે છે કે આગામી સમયમાં સંદીપ ઘોષની મુશ્કેલીઓ વધી શકે છે.
7 શકમંદો પર પોલીગ્રાફ કરાયો
મહત્વનું છે કે આજે આ કેસમાં 7 લોકોનો પોલીગ્રાફ ટેસ્ટ કરવામાં આવ્યો છે, જેના માટે દિલ્હીથી CSFL ટીમ કોલકાતા ગઈ હતી. આ સાત લોકોમાં મુખ્ય આરોપી સંજય રોય, કૉલેજના ભૂતપૂર્વ પ્રિન્સિપાલ સંદીપ ઘોષ અને ચાર જુનિયર ડૉક્ટર્સ અને અકસ્માતની રાત્રે ફરજ પરના એક સ્વયંસેવકનો સમાવેશ થાય છે.
ઉલ્લેખનીય છે કે મુખ્ય આરોપી સંજય રોયનો પોલીગ્રાફ ટેસ્ટ જેલમાં જ કરવામાં આવ્યો હતો, તેને 14 દિવસની જ્યુડિશિયલ કસ્ટડીમાં મોકલવામાં આવ્યો છે, અન્ય 6નો ટેસ્ટ CBI ઓફિસમાં કરવામાં આવ્યો હતો. એવું માનવામાં આવે છે કે સંદીપ ઘોષ વિરુદ્ધ કેસ નોંધાયા બાદ તેની ગમે ત્યારે ધરપકડ થઈ શકે છે. CBI માત્ર સંદીપ ઘોષ વિરુદ્ધ ડૉક્ટરની બળાત્કાર અને હત્યાના કેસમાં જ તપાસ નથી કરી રહી, પરંતુ હવે મેડિકલ કૉલેજમાં થયેલા ભ્રષ્ટાચારને લઈને સંદીપ ઘોષ વિરુદ્ધ પણ CBIની પક્કડ મજબૂત થઈ ગઈ છે.
