મહાઠગ કિરણ પટેલ કેસમાં જેમ જેમ જમ્મુ અને કાશ્મીર પોલીસ દ્વારા તપાસ આગળ વધી રહી છે, તેમ તેમ ગુજરાત અને અન્ય સ્થળોએ કથિત કોનમેન કિરણ પટેલ દ્વારા ફેલાયેલા નેટવર્ક વિશે વધુ વિગતો બહાર આવી રહી છે. પોલીસે હવે કિરણ પટેલ સહિત બે વ્યક્તિઓ અમિત પંડ્યા અને જય સીતાપરાની પણ ધરપકડ કરી છે, જેઓ બંને કિરણ પટેલના કાશ્મીર પ્રવાસ દરમિયાન અને ત્યારબાદ થયેલી ધરપકડ દરમિયાન તેની સાથે હતા. અમિત હિતેશ પંડ્યા અને તેના મિત્ર જય સીતાપરા ચાર દિવસથી જમ્મુ અને કાશ્મીર પોલીસની કસ્ટડીમાં છે. કિરણ પટેલ સાથે કાશ્મીર ફરવા ગયેલા આ બે ઠગ 2-3 માર્ચે ઝેડ પ્લસ સિક્યોરિટી લેયરમાં ઠગના વિસ્ફોટ પછી બંને પાછા ફર્યા હતા. પરંતુ, કિરણ પટેલના રિમાન્ડ બાદ તેને કાશ્મીર બોલાવવામાં આવ્યા છે, હાલ તેની પૂછપરછ ચાલી રહી હોવાનું જાણવા મળે છે.
આ પણ વાંચો : કિરણ પટેલથી ચોંકાવાની જરૂર નથી, ગુજરાતના ખૂણેખૂણામાં છે હજારો ‘કિરણ’ !
જય સીતાપરા ખરેખર કોણ છે તે હજુ સુધી જાણી શકાયું નથી. પરંતુ, રાજકોટના આ યુવાને પણ કાશ્મીરમાં કિરણ પટેલ સાથે સુવિધાઓ માણી હતી. CMOના PROનો પુત્ર અમિત હિતેશ પંડ્યા પોતે CCTV નેટવર્કિંગ કંપની ચલાવે છે અને તે પણ આ કિરણની સાથે કાશ્મીરમાં તે બિઝનેસને વિકસાવવા અને વિસ્તારવા ગયો હતો. અમિત પંડ્યા પોતે ગુજરાત ભાજપ પ્રદેશ ટીમના મીડિયા પ્રભારી હોવાથી, ભાજપના ઘણા યુવા નેતાઓ-કાર્યકર પણ મહાઠગ કિરણ પટેલ સાથે જોડાયેલા હોવાનું કહેવાય છે. આ કારણોસર, દેશની સુરક્ષા સાથે જોડાયેલી અત્યંત સંવેદનશીલ બાબત વિશે ન તો ગુજરાત સરકાર, ન તો ભાજપી નેતા કે ન તો ભાજપ સરકારના તાબા હેઠળની ATSમાંથી કોઈ દાદ આપી રહી છે કારણ કે, માત્ર ભાજપ જ નહીં પરંતુ RSS સાથે જોડાયેલા મોટા નેતાઓ પણ મહાઠગ કિરણ સાથે જોડાયેલા છે.
ભાજપના યુવા નેતા અમિત પંડ્યા કે જેનું નામ ઠગ ડો. કિરણ પટેલ સાથે સંકળાયેલું છે, તે ગાંધીનગર અને રાજકોટમાં સેલ્ફ સોલ્યુશન નામની કંપની ધરાવે છે. આ કંપનીએ રાજ્યમાં સરકાર, પોલીસ તંત્ર, નગરપાલિકાઓ સહિત સીસીટીવી નેટવર્કની સ્થાપના કરી છે અને તેનું સંચાલન કરી રહી છે. કહેવાય છે કે સીસીટીવી ઈન્સ્ટોલેશન અને ઓપરેશન માટેના દરેક ટેન્ડરમાં સેલ્ફ સોલ્યુશન અને અમિત પંડ્યા નંબર વન છે! કંપનીની વેબસાઇટ પોતે જ દાવો કરે છે કે તેણે અત્યાર સુધીમાં 900 થી વધુ પ્રોજેક્ટ પૂર્ણ કર્યા છે. અમદાવાદ સ્થિત કિરણ પટેલની જામીન અરજી પર શ્રીનગરના ચીફ જ્યુડિશિયલ મેજિસ્ટ્રેટ રાજા મોહમ્મદ તસ્લીમની કોર્ટમાં સુનાવણી પૂર્ણ થઈ ગઈ છે, 23 માર્ચે તેનો ચુકાદો જાહેર કરશે. શ્રીનગરમાં પીએમઓ અધિકારીની નકલ કરનાર અને કાશ્મીરમાં Z+ સુરક્ષા કવચવાળી બુલેટપ્રૂફ કારમાં મુસાફરી કરનાર અમદાવાદના કિરણ પટેલની પોલીસે ધરપકડ કરી અને તેને જેલમાં મોકલી આપ્યો છે.
મહાઠગ અને તેના તમામ સહયોગીઓ ભાજપ, આરએસએસ અને અંતે સીએમઓ સુધી પહોંચી રહ્યા છે. વર્ષો પહેલા પરાગ શાહ નામના આઈટી ઓફિસરનો ભાઈ હિતેશ શાહ, જે બ્રાન્ડ એડ નામની પબ્લિસિટી અને બ્રાન્ડિંગ કંપની ધરાવે છે, તે કિરણ પટેલ અને અમિત પંડ્યા બંને સાથે મુખ્યમંત્રી કાર્યાલયમાં કામ કરતા હતા! એ કંપનીના કારણે બંને વચ્ચે મિત્રતા પણ ગાઢ બની હતી. ઠગ સાથે ગાંધીનગરનો અમિત પંડ્યા, રાજકોટનો જય સીતાપરા, ત્રીજો વ્યક્તિ ત્રિલોકસિંહ રાજસ્થાનનો હોવાનું જાણવા મળે છે. એવું કહેવાય છે કે આરએસએસ સાથે જોડાયેલા આ નેતાને કાશ્મીરમાં જવાબદારી સોંપવામાં આવી હતી અને ઠગ કિરણ પટેલ પહેલેથી જ તેના સંપર્કમાં હતો. ઠગ કિરણ પટેલ ઓક્ટોબરથી માર્ચ દરમિયાન ત્રણ વખત જમ્મુ-કાશ્મીર ગયો હોવાનું બહાર આવ્યું છે, જેમાં તે ઓક્ટોબર મહિનામાં તેની પત્ની અને બે પુત્રીઓ સાથે ગયો હતો. મહાઠગ કાશ્મીરમાં રહેવા માટે ગુજરાતી એજન્ટો દ્વારા હોટલ બુક કરાવતો હતો. કાશ્મીર પોલીસ કિરણની ધરપકડ કરે તે પહેલાં, ઠગે સુરક્ષા એજન્સીના એક વરિષ્ઠ અધિકારીને તેના એસ્કોર્ટમાં મોબાઇલ જામર વાહન ન હોવાના કારણે માર માર્યો હતો.
