અમેરિકા: હવામાં વિમાનો વચ્ચે થઈ ટક્કર, એક પાયલોટનું મૃત્યુ તો બીજાની હાલત ગંભીર

• આ અકસ્માત અમેરિકાના આર્કોમાં એરપોર્ટ નજીક થયો
• અકસ્માતમાં એક પાયલોટનું થયું મૃત્યુ

આર્કો, 21 જૂન: અમેરિકામાં એક ભયાનક વિમાન અકસ્માત થયો છે. અધિકારીઓએ જણાવ્યું હતું કે, ગુરુવારે દક્ષિણ ઇડાહોમાં એક એરપોર્ટ નજીક પાકની સંભાળમાં કામ આવતા વિમાનો સામ-સામે અથડાયા હતા. અથડાયા બાદ બંને વિમાન જમીન પર પડ્યા હતા. આ અકસ્માતમાં એક પાયલોટનું મૃત્યુ થયું હતું અને બીજાને જીવલેણ ઈજાઓ થઈ હતી. બટ્ટે કાઉન્ટી શેરિફ ઓફિસે જણાવ્યું હતું કે આ દુર્ઘટના ગુરુવારે (21 જૂન) બપોરે 12:30 વાગ્યાની આસપાસ બની હતી.

તપાસ હજી પણ ચાલુ

બટ્ટે કાઉન્ટી શેરિફ ઓફિસે જણાવ્યું હતું કે આર્કોમાં એરપોર્ટ નજીક ઘાસ અને પાકથી ઢંકાયેલા વિસ્તારમાં આ દુર્ઘટના બની હતી. આર્કો ઇડાહો ધોધથી લગભગ 70 માઇલ (113 કિલોમીટર) પશ્ચિમમાં છે. નેશનલ ટ્રાન્સપોર્ટેશન સેફ્ટી બોર્ડ અને ફેડરલ એવિએશન એડમિનિસ્ટ્રેશનને ક્રેશની જાણ કરવામાં આવી છે અને કયા કારણે આ અકસ્માત થયો તેની તપાસ ચાલી રહી છે.

પાઇલટ્સના નામ ગુપ્ત રાખવામાં આવ્યા

અધિકારીઓએ આ અકસ્માતને દુ:ખદ ગણાવ્યો છે. તેમણે કહ્યું કે જ્યાં સુધી તેમના પરિવારજનોને જાણ કરવામાં ન આવે ત્યાં સુધી પાઈલટોના નામ ગુપ્ત રાખવામાં આવ્યા છે.

આ પણ વાંચો: ચીને ફરીથી ગલવાન જેવા હુમલાનું પુનરાવર્તન કર્યું, પાડોશી દેશના નૌકાદળ પર હથોડી અને ચાકુથી કર્યો હુમલો