‘ઓલ ઈઝ વેલ’: ઈસરો ચીફને ચંદ્રયાન-3 પર વિશ્વાસ; જાણો કંટ્રોલ રૂમમાં કેવું છે વાતાવરણ?

Chandrayaan 3 Moon Landing: ચંદ્રયાન-3ના ચંદ્ર પર ઉતરાણના સમાચાર પર સમગ્ર દેશની નજર છે. 23મી ઓગસ્ટે ઉતરાણનો (લેન્ડિંગ)સમય જેમ જેમ નજીક આવી રહ્યો છે તેમ તેમ લોકોની ઉત્સુકતા પણ વધી રહી છે. લોકો જ નહીં ઈસરોના કંટ્રોલ રૂમમાં બેઠેલા વૈજ્ઞાનિકો અને એન્જિનિયરો પણ ઉત્સાહિત છે. ચંદ્રયાન-3 મિશનને લગતી દરેક માહિતી અને ગણતરીઓ ઘણી વખત તપાસવામાં આવી રહી છે. આ દરમિયાન ઈસરોના અધ્યક્ષ એસ સોમનાથે 23 ઓગસ્ટે સફળ લેન્ડિંગનો વિશ્વાસ વ્યક્ત કર્યો છે.

લેન્ડિંગના એક દિવસ પહેલા ISROના વડા એસ સોમનાથે ટાઈમ્સ ઓફ ઈન્ડિયાને કહ્યું, “અમને વિશ્વાસ છે કારણ કે અત્યાર સુધી બધું બરાબર છે અને આ સમય સુધી કંઈપણ અણધાર્યું બન્યું નથી. અમે તમામ તૈયારીઓ કરી લીધી છે અને આ તબક્કા સુધી તમામ સિસ્ટમોએ અમારી જરૂરિયાત મુજબ કામગીરી કરી છે.

તેમણે વધુમાં જણાવ્યું કે હવે અમે સિસ્ટમના ઘણા સિમ્યુલેશન, વેરિફિકેશન અને ડબલ વેરિફિકેશન સાથે લેન્ડિંગની તૈયારી કરી રહ્યા છીએ. સાધનોના આરોગ્યની તપાસ કરવામાં આવી રહી છે.

આ પણ વાંચો-જો ચંદ્રયાન-3નું લેન્ડિંગ નિષ્ફળ જશે તો શું થશે? ઈસરોના વૈજ્ઞાનિકોએ આ તૈયારી કરી

ઈસરોના કંટ્રોલ રૂમમાં ઉત્તેજનાનો માહોલ

મંગળવારે (22 ઓગસ્ટ) સોશિયલ મીડિયા પ્લેટફોર્મ X (અગાઉ ટ્વિટર) પર મિશન વિશે માહિતી આપતા ઈસરોએ કહ્યું કે ચંદ્રયાન-3 સમયસર આગળ વધી રહ્યું છે. સિસ્ટમનું નિયમિત ચેકિંગ કરવામાં આવી રહ્યું છે, સરળ કામગીરી ચાલુ છે. ઈસરોએ કહ્યું કે ‘મિશન ઓપરેશન કોમ્પ્લેક્સ’માં ઉર્જા અને ઉત્સાહનું વાતાવરણ છે.

લેન્ડરે ચંદ્રની નવી તસવીરો મોકલી

આ સાથે ઈસરોએ લગભગ 70 કિમીની ઉંચાઈથી ‘લેન્ડર પોઝિશન ડિટેક્શન કેમેરા’થી લીધેલા ચંદ્રની તસવીરો પણ જાહેર કરી. સ્પેસ એજન્સીએ જણાવ્યું છે કે 23 ઓગસ્ટે ભારતીય સમય અનુસાર સાંજે 5.20 વાગ્યાથી લેન્ડિંગ ઓપરેશનનું લાઈવ સ્ટ્રીમિંગ કરવામાં આવશે.

ચાર વર્ષમાં ચાર ચંદ્ર મિશન નિષ્ફળ ગયા

ઈસરોના આ ઉતરાણ પર આખી દુનિયાની નજર છે. આ એવા સમયે થઈ રહ્યું છે જ્યારે તાજેતરમાં રશિયાનું મૂન મિશન લુના-25 નિષ્ફળ ગયું હતું. 2019 અને 2023 વચ્ચે ચંદ્ર પર મોકલવામાં આવેલા ચારમાંથી ત્રણ મિશન નિષ્ફળ ગયા છે. આમાં ઈઝરાયેલનું બેરેશીટ, જાપાનનું હાકુટો-આર, ભારતનું ચંદ્રયાન-2 અને રશિયાનું લુના-25 નિષ્ફળ ગયું. માત્ર ચીનનું ચાંગ-5 ચંદ્ર પર સફળ ઉતરાણ કરવામાં સફળ રહ્યું હતું.

ચંદ્રયાન-3ના સફળ લેન્ડિંગ સાથે ભારત વિશેષ દેશોની ક્લબમાં સામેલ થઈ જશે. અત્યાર સુધી માત્ર અમેરિકા, સોવિયેત યુનિયન (ભૂતપૂર્વ) અને ચીન જ ચંદ્ર પર સફળતાપૂર્વક ઉતરાણ કરી શક્યા છે. આવું કરનાર ભારત વિશ્વનો ચોથો દેશ બનશે.

આ પણ વાંચો-ચંદ્રયાન-3ના લેન્ડિંગ માટે 23 ઓગસ્ટની તારીખ શા માટે રાખવામાં આવી? જાણો આ પાછળનું કારણ