અજમલ કસાબ તો નિર્દોષ હતોઃ મહારાષ્ટ્રમાં કોંગ્રેસના ધારાસભ્યે કર્યો આતંકીનો બચાવ
મુંબઈ, 5 મે, 2024: લોકસભા ચૂંટણીના ત્રીજા તબક્કાના મતદાન પહેલાં જ કોંગ્રેસે વધુ એક વખત પોતાના પગ ઉપર કુહાડો માર્યો છે. મહારાષ્ટ્ર વિધાનસભામાં વિરોધ પક્ષના નેતા કોંગ્રેસના વિજય વડેટ્ટીવારે 26/11ના મુંબઈ હુમલા અંગે એક વિચિત્ર દાવો કરીને વિવાદ ઊભો કર્યો છે. વડેટ્ટીવારનું કહેવું છે કે, 26/11ના મુંબઈ હુમલા દરમિયાન પોલીસ અધિકારી હેમંત કરકરેની હત્યા કરનાર ગોળી અજમલ કસાબ અથવા હુમલામાં સામેલ અન્ય નવ પાકિસ્તાની આતંકવાદીઓમાંથી કોઈની બંદૂકમાંથી આવી ન હતી, પરંતુ એ ગોળી તે કથિત રીતે રાષ્ટ્રીય સ્વયંસેવક સંઘ (RSS)ને “સમર્પિત” પોલીસ અધિકારીના હથિયારમાંથી છૂટેલી હતી.
કોંગ્રેસ નેતાના આવા વિવાદાસ્પદ નિવેદન અંગે ભાજપે તીવ્ર પ્રત્યાઘાત આપ્યો હતો. ભાજપના રાષ્ટ્રીય પ્રવક્તા શેહનાઝ પૂનાવાલાએ વડેટ્ટીવારના નિવેદનનો વીડિયો પોસ્ટ કરીને આઘાત વ્યક્ત કરતા કહ્યું હતું કે, કોંગ્રેસ 26/11 માટે કોંગ્રેસ પાકિસ્તાનને ક્લિનચીટ આપે છે.
જૂઓ અહીં વીડિયોઃ
Shocking & unbelievable
Congress gives clean chit to Pakistan again on 26/11
LoP Vijay Wadettiwar says “Hemant Karkare was not killed by bullets of terrorists like Ajmal Kasab, but by cop close to RSS. Ujjwal Nikam is a traitor who suppressed this fact and BJP has given an… pic.twitter.com/7M5l485ISo
— Shehzad Jai Hind (Modi Ka Parivar) (@Shehzad_Ind) May 5, 2024
કોંગ્રેસ ધારાસભ્ય વડેટ્ટીવાર આટલું કહીને અટક્યા નહોતા અને આગળ વધીને આ કેસના વિશેષ સરકારી વકીલ અને મુંબઈ ઉત્તર મધ્યથી ભાજપના લોકસભા ઉમેદવાર ઉજ્જવલ નિકમ પર પણ આ માહિતીને દબાવવાનો આરોપ મૂક્યો હતો અને તેમને “દેશદ્રોહી” ગણાવ્યા હતા. તેમણે નિકમને લોકસભાની ચૂંટણી માટે ઉમેદવાર બનાવવાના ભાજપના નિર્ણય પર સવાલ ઉઠાવ્યા હતા અને પાર્ટી પર દેશદ્રોહીઓને બચાવવાનો આરોપ લગાવ્યો હતો. “તપાસ દરમિયાન મુખ્ય માહિતી બહાર આવી હતી. જો કે, તેને ઉજ્જવલ નિકમ દ્વારા દબાવવામાં આવ્યો હતો, જેઓ દેશદ્રોહી છે. મારો પ્રશ્ન એ છે કે ભાજપ શા માટે દેશદ્રોહીનું રક્ષણ કરી રહ્યો છે અને આવા વ્યક્તિને લોકસભાની ચૂંટણી માટે ઉમેદવારી કેમ આપી છે? આમ કરીને ભાજપ દેશદ્રોહીઓને બચાવે છે,” તેમ ટાઇમ્સ ઑફ ઇન્ડિયાના એક અહેવાલમાં વડેટ્ટીવારને કહેતા ટાંકવામાં આવ્યા હતા.
આ અંગે ભાજપના ઉમેદવાર ઉજ્જ્વલ નિકમ તેમજ મહારાષ્ટ્રના નાયબ મુખ્ય પ્રધાન દેવેન્દ્ર ફડણવીસે તીવ્ર પ્રતિક્રિયાઓ આપી હતી. નિકમે વડેટ્ટીવારના નિવેદનને “પાયાવિહોણા અને બેજવાબદાર” તરીકે વખોડી કાઢ્યું હતું અને તેમની પ્રામાણિકતા પર ઊભી કરેલી શંકાઓ પર દુખ વ્યક્ત કર્યું હતું. તેમણે વડેટ્ટીવારની ટિપ્પણીને 26/11ના હુમલાના પીડિતોનું અપમાન ગણાવીને કસાબને દોષિત ઠેરવવા માટે લેવામાં આવેલા કાયદાકીય પગલાં પર ભાર મૂક્યો હતો.
“કેવું અવિચારી નિવેદન આપવામાં આવી રહ્યું છે. હું આવા પાયાવિહોણા આરોપોથી દુઃખી છું, મારી પ્રામાણિકતા પર શંકા પેદા કરી રહ્યો છું. તે સ્પષ્ટપણે ચૂંટણીના રાજકારણનું સ્તર દર્શાવે છે. મેં ક્યારેય વિચાર્યું નહોતું કે રાજકારણીઓ આટલા નીચા સ્તરે આવી જશે. રાજકીય લાભ માટે? તે (વડેટ્ટીવાર) મારું નહીં, પરંતુ 166 દિવંગત આત્માઓ અને 26/11ના હુમલામાં ઘાયલ થયેલા તમામ વ્યક્તિઓનું અપમાન કરી રહ્યો છે,” તેમ નિકમે કહ્યું.
તેમણે ઉમેર્યું, “તેઓ (કોંગ્રેસ) કસાબને નિર્દોષ માને છે. પાકિસ્તાને પણ સ્વીકાર્યું હતું કે કસાબ કાવતરામાં અને ભારત પરના આતંકવાદી હુમલામાં સામેલ હતો અને તે દોષિત હતો.” તેમણે જણાવ્યું કે કસાબને દોષિત ઠેરવવા માટે તેણે લીધેલા કાયદાકીય પગલાં ભારતીયો સારી રીતે જાણે છે.
ભાજપના નેતા અને નાયબ મુખ્યપ્રધાન દેવેન્દ્ર ફડણવીસે કહ્યું, “અમારું ગઠબંધન નિકમ સાથે છે, જ્યારે કોંગ્રેસે કસાબ સાથે હાથ મિલાવ્યા છે”.
કોંગ્રેસ ધારાસભ્યના આવા બેહુદા નિવેદન સામે શિવસેનાએ પણ નારાજગી વ્યક્ત કરી હતી. શિવસેનાના પ્રવક્તા કિરણ પાવસ્કરે કહ્યું કે NIAએ વડેટ્ટીવારની ધરપકડ કરવી જોઈએ અને તેમને પૂછવું જોઈએ કે તેઓ કસાબનો બચાવ કેમ કરી રહ્યા છે. પાવસકરે આતંકવાદીઓને કથિત રીતે સમર્થન આપવા બદલ કોંગ્રેસની ટીકા કરી હતી અને આ મામલે શિવસેના પ્રમુખ ઉદ્ધવ ઠાકરેના મૌન પર આશ્ચર્ય વ્યક્ત કર્યું હતું. “વડેટ્ટીવારના નિવેદન પરથી એવું લાગે છે કે કોંગ્રેસ મુંબઈ પર હુમલો કરનારા આતંકવાદીઓને સમર્થન આપી રહી છે. વધુ ચોંકાવનારી હકીકત એ છે કે સેના (યુબીટી)ના વડા ઉદ્ધવ ઠાકરેએ એપિસોડ પર મૌન જાળવી રાખ્યું છે, ” તેમ તેમણે જણાવ્યું હતું.
