અમદાવાદઃ મહિલા દિવસની પુર્વ સંધ્યાએ મહિલાએ કર્યુ અંગદાન; સીમ્સ હોસ્પિટલમાં દાખલ દર્દીમા ટ્રાન્સપ્લાન્ટ માટે મોકલાયું

8 માર્ચ 2025 અમદાવાદ; આંતરરાષ્ટ્રીય મહિલા દિવસની પૂર્વ સંધ્યાએ અમદાવાદ સિવિલ હોસ્પિટલમાં આ દિવસના સંકલ્પને ખરા અર્થમાં ચરિતાર્થ કરતો કિસ્સો જોવા મળ્યો છે. પતિ મોહનલાલ સારવાર દરમિયાન બ્રેઇન ડેડ થતાં પત્ની બબલી દેવીએ સંવેદના પૂર્ણ પતિના તમામ અંગોનુ દાન કરવાનો સંવેદનશીલ નિર્ણય કર્યો છે.

માર્બલની ફેક્ટરીમાં કામ કરતાં મોહનલાલના અંગોનું દાન
સિવિલ હોસ્પિટલના સુપ્રિટેન્ડન્ટ રાકેશ જોશીએ જણાવ્યું હતું કે 51 વર્ષના મૂળ રાજસ્થાન ડુંગરપુરના વતની અને નિકોલ અમદાવાદ ખાતે માર્બલની ફેક્ટરીમાં કામ કરતા મોહનલાલ યાદવને ફેક્ટરીમાં કામ કરતા 26/2/25ના રોજ માથાના ભાગે ઇજા થઇ હતી. માથાની ગંભીર ઇજાના કારણે હેમરેજ થઈ ગયું હતું. જેથી સારવાર અર્થે પ્રથમ નિકોલની ખાનગી હોસ્પિટલ ત્યારબાદ જીસીએસ હોસ્પિટલમાં સારવાર કરાવી હતી. પરંતુ સ્થિતિ ગંભીર બનતાં તેઓને સઘન સારવાર અર્થે તારીખ 4/3/25ના રોજ અમદાવાદ સિવિલ હોસ્પિટલમાં લાવવામા આવ્યા‌ હતા.

બ્રેઈન ડેડ જાહેર કરાતા પરોપકારી નિર્ણય કરાયો
તેમણે વધુમાં જણાવ્યું હતું કે અહીં સારવાર દરમિયાન તા. 7/3/25ના રોજ તબીબોએ મોહનલાલને બ્રેઈન ડેડ જાહેર કર્યા હતા. જે બાદ અમારી તબીબોની ટીમ દ્વારા મોહનલાલના પત્ની બબલી દેવી તથા તેમના બે દીકરા નિલેશભાઇ અને જયેશભાઇ તેમજ દીકરી ભારતીબેનને અંગદાન વિશે સમજાવતા પત્ની તેમજ ત્રણ બાળકોએ સાથે મળી મોહનલાલની આ પરીસ્થીતીમાં તેમના અંગોનું દાન કરવાનો પરોપકારી નિર્ણય કર્યો હતો.

587 અંગોનું દાન, 559 વ્યકિતઓને જીવનદાન
180માં અંગદાન થકી સિવિલ હોસ્પિટલ દ્વારા અત્યાર સુધીમાં કુલ 587 અંગોનું દાન મળેલું છે. જેના થકી 559 વ્યકિતઓને જીવનદાન મળ્યુ છે. 180માં અંગદાનથી મળેલ બે કીડની અને એક લીવરને સિવિલ મેડીસીટી કેમ્પસની જ કિડની હોસ્પિટલના જરુરીયાતમંદ દર્દીઓમાં તેમજ હ્રદયને ગ્રીન કોરીડોર મારફતે અમદાવાદની સીમ્સ હોસ્પિટલમાં દાખલ દર્દીને ટ્રાન્સપ્લાન્ટ કરવામાં આવશે. આમ આ અંગદાનથી કુલ ચાર લોકોને નવજીવન આપવામાં સફળતા મળશે તેવું અમદાવાદ સિવિલ હોસ્પિટલનાં તબીબી અધિક્ષક ડો.રાકેશ જોષીએ જણાવ્યું હતું.