અમદાવાદ: 20 દિવસમાં ટ્રાફિક નિયમ ભંગના 2 લાખથી વધુ કેસ, જાણો દંડનો આંકડો
- શહેરમાં નવા 249 ટ્રાફિક સીગ્નલ લગાવવામાં આવ્યા
- ફુટપાથ પરથી અનઅધિકૃત દબાણો દૂર કરી તે ખુલ્લા કરવામાં આવ્યા
- 13.21 કરોડ રૂપિયાથી પણ વધુનો વિક્રમી અને ઐતિહાસિક દંડ વસૂલ્યો
અમદાવાદ શહેર સહિત રાજ્યભરમાં રખડતા ઢોર, બિસ્માર રસ્તા, ટ્રાફિક માર્ગો-ફુટપાથ પર ગેરકાયદે પાર્કિંગ મુદ્દે એડવોકેટ અમિત પંચાલ દ્વારા કન્ટેમ્પ્ટ પિટિશન કરી હતી. જે અંગે ગુજરાત હાઈકોર્ટે સરકાર અને સત્તાવાળાઓને આપેલી કડક ચેતવણી બાદ આખરે ટ્રાફિક વિભાગ, અમદાવાદ મ્યુનિસિપલ કોર્પોરેશન સહિતના સત્તાવાળાઓએ ભારે અસરકારક અને પરિણામલક્ષી કામગીરી કરી રસ્તાઓ-ફુટપાથો પરથી દબાણો દૂર કરી, ટ્રાફિક નિયમોના ભંગ બદલ આકરા દંડ વસૂલ કરવાની કામગીરી સહિતનું ચિત્ર અદાલત સમક્ષ રજૂ કરાયું હતું.
13.21 કરોડ રૂપિયાથી પણ વધુનો વિક્રમી અને ઐતિહાસિક દંડ વસૂલ્યો
ટ્રાફિક નિયમોના ભંગ બદલ ટ્રાફિક વિભાગ દ્વારા છેલ્લા 20 જ દિવસમાં 2 લાખથી વધુ કેસો કરી 13.21 કરોડ રૂપિયાથી પણ વધુનો વિક્રમી અને ઐતિહાસિક દંડ વસૂલ્યો હોવાની માહિતી રેકર્ડ પર આવી હતી. જસ્ટિસ એ.એસ.સુપહીયા અને જસ્ટિસ નિશા એમ.ઠાકોરની ખંડપીઠે પણ સત્તાવાળાઓની અસરકારક મહેનત અને પરિણામલક્ષી કામગીરીને બિરદાવી તેમના આ પ્રયાસો અને કામગીરી સતત અને અવિરત ચાલુ રાખવા તાકીદ કરી હતી.
ટ્રાફિક વિભાગ તરફથી આ કામગીરી સતત કરવામાં આવશે
ટ્રાફિક વિભાગ તરફથી આ કામગીરી સતત કરવામાં આવશે, એવી પણ હૈયાધારણ હાઇકોર્ટને અપાઇ હતી. આ દરમિયાન 1099 ટ્રાફિક પોલીસ જવાનોએ વાયોલેશન ઓન કેમેરા મોબાઇલ એપ્લીકેશનનો ઉપયોગ કર્યો હતો. શહેરમાં નવા 249 ટ્રાફિક સીગ્નલ લગાવવામાં આવ્યા છે. જ્યારે 1169 લારી-ગલ્લા, 352 શેડ્સ, 1945 સ્ટોલ્સ અને 7181 બીજા પરચૂરણ દબાણો મળી માર્ગો અને ફુટપાથ પરથી અનઅધિકૃત દબાણો દૂર કરી તે ખુલ્લા કરવામાં આવ્યા છે. સીએનસીડી ડિપાર્ટમેન્ટની 20 ટીમો દ્વારા 241 જેટલા રખડતા ઢોરો પકડવામાં આવ્યા છે અને તેને આરએફઆઇડી ટેગ પણ લગાવવામાં આવી છે.
