સામાજિક કાર્યકર્તા મેધા પાટકર પર હુમલો કરવાના આરોપમાં દિલ્હીના લેફ્ટનન્ટ ગવર્નર (LG) વિનય કુમાર સક્સેના સામે ફોજદારી કેસ ચાલશે. અમદાવાદની કોર્ટે દિલ્હીના LGની અરજી ફગાવી દીધી છે. જેમાં તેમણે ડેપ્યુટી ગવર્નર તરીકે તેમને મળેલી ઈમ્યુનિટીનો ઉલ્લેખ કરીને ફોજદારી ટ્રાયલમાંથી મુક્તિ માંગી હતી. અમદાવાદની કોર્ટમાં એડિશનલ મેટ્રોપોલિટન જજ પીએન ગોસ્વામીએ સક્સેના દ્વારા દાખલ કરવામાં આવેલી અરજી ફગાવી દીધી હતી. સક્સેના પર 2002માં અમદાવાદના સાબરમતી આશ્રમમાં સામાજિક કાર્યકર્તા મેધા પાટકર પર હુમલો કરવાનો આરોપ છે. દિલ્હીના લેફ્ટનન્ટ ગવર્નરે ફોજદારી ટ્રાયલમાંથી મુક્તિની માંગ કરી હતી, જ્યારે સામાજિક કાર્યકર્તા મેધા પાટકર દ્વારા તેનો વિરોધ કરવામાં આવ્યો હતો.
આ પણ વાંચો : કર્મયોગી ભવનમાં આગ લાગ્યા બાદ કોંગ્રેસ નેતા અમિત ચાવડાએ સરકાર પર લગાવ્યા ગંભીર આરોપ
મેધા પાટકરના વકીલ દ્વારા કોર્ટમાં એવું કહેવામાં આવ્યું હતું કે તેઓ રાજ્યપાલ નથી અને તેઓ મુક્તિના હકદાર નથી. મેધા પાટકર વતી દાખલ કરવામાં આવેલી અરજીમાં કહેવામાં આવ્યું હતું કે દિલ્હીના એલજી માત્ર રાષ્ટ્રપતિના એજન્ટ છે. આવી સ્થિતિમાં તેમને બંધારણના અનુચ્છેદ 361 જેવી ઇમ્યુનિટી ન આપવી જોઈએ. એડિશનલ મેટ્રોપોલિટન જજ પી.એન.ગોસ્વામીએ સુનાવણી બાદ સક્સેનાની અરજી ફગાવી દીધી હતી. કોર્ટે અરજી ફગાવી દેતા હવે તેમની સામે ફોજદારી કેસ ચલાવવામાં આવશે. વી કે સક્સેના ઉપરાંત, હાલમાં અમદાવાદ વિધાનસભાના ભાજપના ધારાસભ્યો અમિત શાહ અને અમિત ઠાકર, એડવોકેટ રાહુલ પટેલ પણ આ કેસમાં આરોપી છે. 21 વર્ષ બાદ અમદાવાદની મેટ્રોપોલિટન કોર્ટમાં આ કેસની સુનાવણી શરૂ થઈ છે. જ્યાં ટ્રાયલમાં આરોપો ઘડવાના છે. જેમાંથી ભાજપના બંને ધારાસભ્યો પ્રથમ વખત ધારાસભ્ય પદે ચૂંટાયા છે.
