અમદાવાદ: AMC ટ્રી સેન્સસનો ડેટા વેબસાઈટ ઉપર અપલોડ કરવા રૂ. 8 લાખ ચૂકવશે

• સાર એજન્સીને પ્રતિ વૃક્ષ રૂપિયા સાત ચૂકવવાની દરખાસ્ત મંજૂર
• દર મહીને 56 હજાર રુપિયા ઉપરાંત જી.એસ.ટી.ચૂકવાશે
• વૃક્ષ ગણતરી કામગીરી અંગેનો ડેટા એક વર્ષ સુધી અપલોડ કરશે

અમદાવાદમાં વૃક્ષ ગણતરી માટે સાર એજન્સીને પ્રતિ વૃક્ષ રૂપિયા સાત ચૂકવવાની દરખાસ્ત અગાઉ રીક્રીએશન કમિટીમાં મંજૂર કરાઈ હતી. હવે મટીરીયલ મેનેજમેન્ટ કમિટીએ સાર આઈટી રીસોર્સ કંપનીને વૃક્ષ ગણતરી કામગીરી અંગેનો ડેટા એક વર્ષ સુધી મ્યુનિસિપલ કોર્પોરેશનની વેબસાઈટ ઉપર અપલોડ કરવા રૂપિયા આઠ લાખ ઉપરાંત ટેકસ ચૂકવવા દરખાસ્ત મંજૂર કરી છે.

દર મહીને 56 હજાર રુપિયા ઉપરાંત જી.એસ.ટી.ચૂકવાશે

આ કંપનીને માત્ર મ્યુનિ.ની વેબસાઈટ ઉપર ડેટા અપલોડ કરવા એક વર્ષ સુધી દર મહીને 56 હજાર રૂપિયા ઉપરાંત જી.એસ.ટી.ચૂકવાશે. મ્યુનિ.ની મટીરીયલ મેનેજમેન્ટ કમિટીએ એક વિવાદાસ્પદ દરખાસ્ત મંજૂર કરી હતી. મંજૂર કરવામા આવેલી દરખાસ્તમાં સાર આઈટી રીસોર્સ પ્રા.લિ.ને દર મહીને વૃક્ષ ગણતરીનો ડેટા મ્યુનિ.વેબસાઈટ ઉપર અપલોડ કરવા પ્રતિ માસ રૂપિયા 56,5૦૦ના હીસાબથી એક વર્ષ માટે રૂપિયા 6.78 લાખ ઉપરાંત 18 ટકા મુજબ જી.એસ.ટી.પણ ચૂકવાશે.

કામગીરી પુરી થયા પછી આ રકમનુ ચૂકવણુ કરવા દરખાસ્ત મંજૂર

કામગીરી પુરી થયા પછી આ રકમનુ ચૂકવણુ કરવા દરખાસ્ત મંજૂર કરાઈ છે. પણ સવાલ એ છે કે, એક તરફ મ્યુનિ. આ એજન્સીને વૃક્ષ ગણતરી માટે પ્રતિ વૃક્ષ રૂપિયા સાત લેખે રકમ ચૂકવવાની છે. વૃક્ષ ગણતરીની કામગીરી સાથે કામગીરી અંગેનો ડેટા પણ મ્યુનિ.વેબસાઈટ ઉપર અપલોડ કરવાની કામગીરી આવી જ જવી જોઈએ. આમ છતાં ડેટા વેબસાઈટ ઉપર એક વર્ષ સુધી અપલોડ કરવા વધારાના આઠ લાખ કોના કહેવાથી અપાશે તે ચર્ચાનો વિષય બન્યો છે.

આ પણ વાંચો: અમદાવાદથી પ્રયાગરાજ મહાકુંભ માટેની એક કલાકમાં GSRTCની તમામ 1360 ટિકિટ બુક