અમદાવાદ: શહેરના આ વિસ્તારના ખાલી ફ્લેટમાંથી 100 કિલો સોનું-જંગી રોકડ ઝડપાઇ
- શેરબજાર ઓપરેટરના ખાલી ફ્લેટમાંથી સોનું અને જંગી રોકડ જપ્ત
- પોલીસને બાતમી મળતા દરોડાની કાર્યવાહી હાથ ધરાઈ હતી
- ફ્લેટ નંબર 104માં બપોરે અઢી વાગ્યે દરોડા પાડવામાં આવ્યા
અમદાવાદ શહેરના પાલડી વિસ્તારમાં શેરબજાર ઓપરેટરના ખાલી ફ્લેટમાંથી ડીઆરઆઈ અને એટીએસ દ્વારા દરોડા પાડવામાં આવ્યા હતા. આ ફ્લેટમાંથી એજન્સીઓએ 100 કિલો સોનું અને જંગી રોકડ જપ્ત કર્યાના અહેવાલ છે. આ અંગે એજન્સીઓ અને પોલીસને બાતમી મળતા દરોડાની કાર્યવાહી હાથ ધરાઈ હતી.
ફ્લેટ નંબર 104માં બપોરે અઢી વાગ્યે દરોડા પાડવામાં આવ્યા
પાલડીમાં શેરબજાર ઓપરેટરના આવિષ્કાર એપાર્ટમેન્ટના ફ્લેટ નંબર 104માં બપોરે અઢી વાગ્યે દરોડા પાડવામાં આવ્યા હતા. આ ફ્લેટની માલિકી મહેન્દ્ર શાહ અને મેઘ શાહ નામની વ્યક્તિઓની હોવાનું ખૂલ્યું છે. તેઓ પિતા-પુત્રનો સંબંધ ધરાવે છે. આ તપાસમાં હજુ પણ વધારે મુદ્દામાલ ઝડપાય તેવી શક્યતા છે.
અન્ય ઘરેણાં અને અંદાજિત રૂ. 70 લાખથી વધુ રોકડ
એજન્સીઓને માહિતી મળી હતી કે, આ ફ્લેટમાં અંદાજિત 100 કિલોથી વધુ સોનું છુપાવ્યું છે. ત્યારબાદ અહીં ATS અને DRIએ સંયુક્ત દરોડા પાડ્યા છે. આ દરમિયાન અંદાજિત 100 કિલો સોનું, અન્ય ઘરેણાં અને અંદાજિત રૂ. 70 લાખથી વધુ રોકડ છે. સૂત્રોના જણાવ્યાનુસાર, આ ઘટનામાં હવાલા વ્યવહારો પણ બહાર આવે તેવી શક્યતા છે. આ દિશામાં હાલ તપાસ ચાલી રહી છે.
આ પણ વાંચો: ગુજરાતમાં છેલ્લાં 3 વર્ષમાં ડ્રગ ટ્રાફિકિંગના કેસનો આંકડો જાણી દંગ રહેશો
