મની હેઇસ્ટ વેબ સિરીઝ જોઈને મેનેજરે પોતાની જ બેંકમાંથી કરી રૂ. 34 કરોડની ચોરી, જાણો કેવી રીતે ખુલી પોલ

ક્રાઈમ થ્રિલર વેબ સિરીઝ ‘મની હેસ્ટ’ જોઈને મહારાષ્ટ્રમાં એક બેંક મેનેજરે પોતાની જ બેંકની તિજોરીમાંથી 34 કરોડ રૂપિયા લૂંટી લીધા. થોડા મહિના પહેલા ડોમ્બિવલીના MIDC વિસ્તારમાં આવેલી ICICI બેંકની તિજોરીમાંથી 34 કરોડ રૂપિયાની ચોરીનો મામલો સામે આવ્યો હતો. પોલીસને હવે આ કેસના મુખ્ય સૂત્રધારની ધરપકડ કરવામાં સફળતા મળી છે. અત્યાર સુધીમાં પોલીસે 30 કરોડ રૂપિયા રિકવર કર્યા છે.

ડોમ્બિવલીના MIDC ના રહેણાંક વિસ્તારમાં ICICI બેંકની શાખા છે. આરોપી અલ્તાફ શેખ આ બેંકમાં કેશ કસ્ટોડિયન મેનેજર તરીકે નોકરી કરતો હતો. ઝડપથી અમીર બનવા માટે તેણે એક વર્ષ પહેલા બેંકની તિજોરી લૂંટવાની યોજના બનાવી હતી. જેના માટે તેણે ‘મની હેઇસ્ટ’ વેબ સિરીઝ જોઈ હતી. વેબ સિરીઝ જોયા બાદ તેણે એક માસ્ટર પ્લાન બનાવ્યો અને બેંકની તિજોરીમાંથી પૈસા કેવી રીતે લૂંટાય છે તેનો સંપૂર્ણ પ્લાન તૈયાર કર્યો. તે કેશ કસ્ટોડિયન મેનેજર હતો, તેથી તે બેંક વિશે બધું જ જાણતો હતો. એક દિવસ તેણે બેંકના સેફ રૂમની બાજુમાં એસી રિપેરિંગનું કામ જોયું અને ત્યારથી પ્લાનિંગ શરૂ કર્યું. તેણે પહેલા સુરક્ષા વ્યવસ્થામાં રહેલી ત્રુટિઓ વિશે જાણ્યું અને પછી રોબરી માટે જરૂરી વસ્તુઓ લાવ્યો. તેણે રજાના દિવસે 9 જુલાઈએ બેંકનું એલાર્મ તોડ્યું હતું અને તમામ કેમેરાની હાર્ડ ડિસ્ક કાઢીને તિજોરીમાંથી રૂ. 34 કરોડની લૂંટ કરી હતી. તેણે બેંકની બિલ્ડીંગની પાછળ બાંધેલી તાડપત્રી પર એસી ડક્ટના છિદ્ર દ્વારા પૈસા ફેંકી દીધા હતા.

12 કરોડ મિત્રોને આપ્યા

આ પછી, બેંકના સીસીટીવી ડીવીઆર ગાયબ હોવાની બેંકના ઉચ્ચ અધિકારીઓને જાણ કર્યા પછી, તિજોરીના નાણાંની તપાસ કરવા માટે એક ટીમને બેંકમાં બોલાવવામાં આવી હતી. એક તરફ તપાસ ચાલી રહી હતી તો બીજી તરફ તેણે તેના ત્રણ મિત્રો કુરેશી, અહેમદ ખાન અને અનુજ ગિરીને બોલાવીને 34 કરોડમાંથી 12 કરોડ રૂપિયા આપી દીધા. આ પછી તેણે પોલીસ સ્ટેશનમાં ચોરીનો કેસ નોંધાવ્યો હતો.

આ રીતે પકડાયા

પોલીસે આ મામલે ત્રણ આરોપીઓની ધરપકડ કરીને તપાસ શરૂ કરી છે. તેમની પાસેથી 5 કરોડ રૂપિયાની રોકડ જપ્ત કરવામાં આવી હતી. ત્રણેય આરોપીઓ પાસેથી મળેલી માહિતીના આધારે અઢી મહિનાની તપાસ બાદ બેંકના કેશ કસ્ટોડિયન મેનેજર અલ્તાફ શેખની પુણેથી ધરપકડ કરવામાં આવી હતી. થાણે અને નવી મુંબઈ પોલીસે સંયુક્ત કાર્યવાહી કરીને શેખ અને તેની બહેન નિલોફર અને અન્ય પાંચ આરોપીઓની ધરપકડ કરી વધુ તપાસ શરૂ કરી છે.

પૈસા છુપાવવા માટે ફ્લેટ ભાડે લીધો

ચોરી બાદ અલ્તાફ શેખે પૈસા છુપાવવા માટે બહેન નિલોફરની મદદ લીધી હતી. આ પૈસા છુપાવવા માટે બંનેએ નવી મુંબઈના રબાલે વિસ્તારમાં એક ફ્લેટ ભાડે રાખ્યો હતો. આ ફ્લેટમાં બેંકમાંથી ચોરાયેલી કેટલીક રકમ છુપાવવામાં આવી હતી. નવી મુંબઈ વિસ્તારમાં એક જૂની ઈમારતની નીચે પણ કેટલાક પૈસા છુપાવવામાં આવ્યા હતા, પરંતુ પોલીસ અલ્તાફની પાછળ હતી જેના કારણે તે ફરીથી તે ઈમારતની નજીક ગયો ન હતો.

નશાખોરોને પૈસા મળ્યા

આ દરમિયાન કેટલાક નશાખોરોનું ધ્યાન પૈસા ભરેલી બેગ પર ગયું. આટલા પૈસા જોઈને આ યુવાનોની ખુશીની કલ્પના પણ કરી શકાતી નથી. આ ડ્રગ્સના વ્યસની યુવાનોએ આમાંથી કેટલાક પૈસા ડ્રગ્સ માટે ખર્ચ્યા હતા, જ્યારે કેટલાક તેમને બારમાં ઉડાવી દીધા હતા. આ મામલે પોલીસ તપાસ ચાલી રહી છે.

આ પણ વાંચો : મુંબઈમાં 13 માળની ઈમારતમાં લાગી ભીષણ આગ, અનેક લોકો ફસાયા