યુક્રેન સાથેની લડાઈ બાદ દુનિયામાં રશિયાનું પ્રભુત્વ વધ્યુ, સમર્થકોની સંખ્યામાં થયો વધારો
- રશિયા તરફ સ્પષ્ટ વલણ ધરાવતા દેશોની સંખ્યા 35 થઈ
- આફ્રિકામાં રશિયાનો પ્રભાવ વધવાના સંકેત
- વિશ્વની 64 ટકા વસ્તી રશિયાનો વિરોધ કરતા નથી
વિકાસશીલ દેશોમાં રશિયાનો પ્રભાવ વધી રહ્યો છે. તે દેશોમાં રશિયાના રાજદ્વારી પ્રયાસો અને પ્રચાર અભિયાનો ખાસ સફળ રહ્યા છે. બ્રિટિશ મેગેઝિન ઈકોનોમિસ્ટ સાથે સંકળાયેલી એજન્સી ઈકોનોમિસ્ટ ઈન્ટેલિજન્સ યુનિટ (EIU) ના રિપોર્ટમાં આ વાતનો સંકેત આપવામાં આવ્યો છે. થોડા દિવસો પહેલા જાહેર કરાયેલા આ અહેવાલ મુજબ યુક્રેન યુદ્ધ શરૂ થયાના એક વર્ષમાં સમગ્ર વિશ્વમાં રશિયા માટે એકંદરે સમર્થન વધ્યું છે. ખાસ કરીને આ તે દેશોમાં બન્યું છે, જેઓ પહેલાથી જ તટસ્થ અથવા બિન-જોડાણયુક્ત રહેવાની નીતિને અનુસરે છે.
રશિયા તરફ સ્પષ્ટ વલણ ધરાવતા દેશોની સંખ્યા 35 થઈ
તેના અભ્યાસમાં, EIU એ રશિયા પરના પ્રતિબંધો, સંયુક્ત રાષ્ટ્રમાં વિવિધ દેશોના મતદાન, સ્થાનિક રાજકીય વલણો અને સરકારી નિવેદનો અંગે વિવિધ દેશોના વલણને ધ્યાનમાં લીધું હતું. વધુમાં, રશિયા સાથે પરંપરાગત આર્થિક, રાજકીય અને લશ્કરી સંબંધોના ઇતિહાસને પણ ધ્યાનમાં લેવામાં આવ્યો હતો. અભ્યાસમાં જાણવા મળ્યું છે કે એક વર્ષ પહેલા રશિયા તરફ સ્પષ્ટ વલણ ધરાવતા દેશોની સંખ્યા 29 હતી જે હવે વધીને 35 થઈ ગઈ છે.
આફ્રિકામાં રશિયાનો પ્રભાવ વધવાના સંકેત
EIUના રિપોર્ટમાં કહેવામાં આવ્યું છે કે રશિયા તરફી દેશોમાં સૌથી મહત્વપૂર્ણ ચીન છે. પરંતુ અન્ય ઘણા વિકાસશીલ દેશો (ખાસ કરીને દક્ષિણ આફ્રિકા, માલી અને બુર્કિના ફાસો) પણ રશિયન પક્ષમાં ગયા છે. વિશ્વની 33 ટકા વસ્તી રશિયા તરફી દેશોમાં રહે છે. રિપોર્ટમાં કહેવામાં આવ્યું છે કે આફ્રિકામાં રશિયાનો પ્રભાવ વધવાના સંકેત દેખાઈ રહ્યા છે. નિરીક્ષકોના મતે આ વલણ પશ્ચિમી દેશો માટે ઊંડી ચિંતાનો વિષય છે. યુક્રેન યુદ્ધ શરૂ થયું ત્યારથી આ દેશો રશિયાને દુનિયામાં અલગ કરવાનો પ્રયાસ કરી રહ્યા છે. પરંતુ EIUના રિપોર્ટ પરથી સ્પષ્ટ થાય છે કે તેમને આ પ્રયાસમાં સફળતા મળી નથી.
વિશ્વની 64 ટકા વસ્તી રશિયાનો વિરોધ કરતા નથી
EIU અનુસાર, વિશ્વમાં તટસ્થ દેશોની સંખ્યા ગયા વર્ષે 32 થી વધીને હવે 35 થઈ ગઈ છે. એટલે કે એક વર્ષ પહેલા જે ત્રણેય દેશો રશિયા સાથે દુશ્મનાવટ ધરાવતા હતા, તેમણે હવે મધ્યમ વલણ અપનાવ્યું છે. EIU અનુસાર, વિશ્વની 31 ટકા વસ્તી તટસ્થ દેશોમાં રહે છે. આમ, વિશ્વની 64 ટકા વસ્તી એવા દેશોમાં રહે છે જેઓ હવે રશિયાનો વિરોધ કરતા નથી.
