નેપાળમાં સત્તા પરિવર્તન બાદ ચીને શરૂ કરી નિકટતા, નિષ્ણાતોની ટીમ મોકલી કાઠમંડુ

નેપાળમાં પુષ્પ કમલ દહલ પ્રચંડના નેતૃત્વમાં નવી સરકારની રચના બાદ જ ચીને પણ હિમાલયન રાષ્ટ્ર સાથે તેની નિકટતા વધારવાનું શરૂ કર્યું છે. પ્રચંડના વડા પ્રધાન બન્યાના એક દિવસ પછી આજે ચીને મંગળવારે નેપાળ-ચીન ક્રોસ બોર્ડર રેલ્વે લાઇનનો સંભવિત અભ્યાસ કરવા માટે નિષ્ણાતોની એક ટીમ કાઠમંડુ મોકલી હતી. ઉલ્લેખનીય છે કે, ચીનની નજીક ગણાતા પ્રચંડે સોમવારે ત્રીજી વખત નેપાળના વડાપ્રધાન તરીકે શપથ લીધા હતા.

શા માટે ચીનની ટીમ પહોંચી નેપાળ ?

ચીની દૂતાવાસે ટ્વિટર પર જણાવ્યું હતું કે ચીન-નેપાળ ક્રોસ બોર્ડર રેલ્વેના સંભવિત અભ્યાસ અને સર્વેક્ષણ માટે નિષ્ણાત ટીમ મંગળવારે કાઠમંડુ પહોંચી હતી અને ચીનના મિશનના વડા વાંગ જિન દ્વારા તેનું સ્વાગત કરવામાં આવ્યું હતું. કાઠમંડુમાં ચીની દૂતાવાસના પ્રવક્તાએ ટ્વીટ કર્યું કે આ બંને દેશો વચ્ચેનો એક મહત્વપૂર્ણ પ્રોજેક્ટ છે અને ચીનની સરહદે આવેલા નેપાળને બદલવા માટે એક નક્કર પગલું છે.

નેપાળની સંસદે મિલેનિયમ ચેલેન્જ કોર્પોરેશનને મંજૂરી આપી

મહત્વનું છે કે, ફેબ્રુઆરી 2022માં નેપાળી સંસદે સ્થાનિક રાજકીય વિરોધ અને ચીનના વાંધાઓ છતાં વિવાદાસ્પદ $500 મિલિયન યુએસ સહાય કાર્યક્રમ – મિલેનિયમ ચેલેન્જ કોર્પોરેશન (MCC) ને મંજૂરી આપી હતી. આ પછી ચીને તીખી પ્રતિક્રિયા આપી હતી અને કહ્યું હતું કે અમેરિકાએ ‘લાદવાની કૂટનીતિ’ દ્વારા અન્ય દેશોની સાર્વભૌમત્વને નબળી ન કરવી જોઈએ. ચીન તેના મહત્વાકાંક્ષી બેલ્ટ એન્ડ રોડ ઈનિશિએટીવ (BRI) હેઠળ ટ્રાન્સ-હિમાલયન કનેક્ટિવિટી પ્રોજેક્ટ્સ સહિત વિવિધ ઈન્ફ્રાસ્ટ્રક્ચર સાહસો દ્વારા નેપાળમાં તેના પ્રવેશને મજબૂત કરી રહ્યું છે.

અમેરિકાએ વડાપ્રધાન પ્રચંડને અભિનંદન પાઠવ્યા

દરમિયાન, અમેરિકાએ મંગળવારે નેપાળના નવા ચૂંટાયેલા વડાપ્રધાન પુષ્પ કમલ દહલ ‘પ્રચંડ’ને અભિનંદન પાઠવ્યા હતા. અમેરિકાએ કહ્યું કે, લોકશાહી માટે નેપાળની પ્રતિબદ્ધતા સમગ્ર વિશ્વ માટે એક ઉદાહરણ છે. દ્વિપક્ષીય, પ્રાદેશિક અને વૈશ્વિક મહત્વના મુદ્દાઓ પર તેઓ હંમેશા નેપાળ સરકારની પડખે ઊભા રહેશે.