દમદાર ગાડીઓ પછી હવે ટાટા ગ્રુપ બનાવશે હેલિકોપ્ટર

નવી દિલ્હી, 27 જાન્યુઆરી : ટાટા ગ્રુપએ અનેક શક્તિશાળી વાહનો બનાવ્યા પછી હવે હેલિકોપ્ટર બનાવશે. આ માટે કંપનીએ યુરોપિયન કંપની એરબસ સાથે કરાર કર્યો છે. એરબસ કંપની જણાવ્યા અનુસાર, દેશમાં હેલિકોપ્ટર મેન્યુફેક્ચરિંગ પ્લાન્ટ સ્થાપવા માટે ટાટા ગ્રુપ સાથે તેણે ભાગીદારી કરી છે. એરબસ હેલિકોપ્ટર્સે એક નિવેદનમાં જણાવ્યું હતું કે તે ‘સિવિલ રેન્જ’ એરબસ H125 હેલિકોપ્ટરનું નિર્માણ ‘ફાઇનલ એસેમ્બલી લાઇન’ (મેન્યુફેક્ચરિંગ યુનિટ) દ્વારા કરશે. તેનું ઉત્પાદન ભારત અને કેટલાક પડોશી દેશોમાં નિકાસ માટે કરવામાં આવશે. ‘ફાઇનલ એસેમ્બલી લાઇન’ (FAL)એ ભારતમાં હેલિકોપ્ટર ઉત્પાદન સુવિધા સ્થાપવાનું ખાનગી ક્ષેત્રનું પ્રથમ ઉદાહરણ હશે. જેથી ભારત સરકારના ‘આત્મનિર્ભર ભારત’ કાર્યક્રમને વેગ મળશે.

ટાટાનો અદ્યતન સિસ્ટમ પ્લાન્ટ 

આ ભાગીદારી હેઠળ ટાટા ગ્રૂપની પેટાકંપની ટાટા એડવાન્સ્ડ સિસ્ટમ્સ લિમિટેડ (TASL) એરબસ હેલિકોપ્ટર સાથે પ્લાન્ટ સ્થાપશે. 26 જાન્યુઆરીએ પ્રજાસત્તાક દિવસની ઉજવણીમાં મુખ્ય અતિથિ તરીકે ફ્રાન્સના પ્રમુખ ઇમેન્યુઅલ મેક્રોનની ભારતની બે દિવસીય મુલાકાત દરમિયાન આ જાહેરાત કરવામાં આવી હતી. એરબસ હેલિકોપ્ટર્સે જણાવ્યું હતું કે ભારતમાં FAL મુખ્ય ઘટક એસેમ્બલી, એવિઓનિક્સ અને મિશન સિસ્ટમ્સ, ઇલેક્ટ્રિકલ હાર્નેસની સ્થાપના, હાઇડ્રોલિક સર્કિટ, ફ્લાઇટ કંટ્રોલ, ઇંધણ સિસ્ટમ અને એન્જિનનું એકીકરણ હાથ ધરશે. નિવેદન અનુસાર, તે ભારત અને પ્રદેશના ગ્રાહકોને H125નું પરીક્ષણ, યોગ્યતા અને વિતરણ પણ કરશે.

FAL 24 મહિનામાં થશે રેડી 

FALને સેટ થવામાં 24 મહિનાનો સમય લાગશે. પ્રથમ ‘મેડ ઇન ઇન્ડિયા’ H125 ની ડિલિવરી 2026 માં શરૂ થવાની અપેક્ષા છે. નિવેદન અનુસાર, ‘ફાઇનલ એસેમ્બલી લાઇન’ સેટ કરવા માટેનું સ્થાન એરબસ અને ટાટા ગ્રુપ દ્વારા સંયુક્ત રીતે નક્કી કરવામાં આવશે. એરબસના ચીફ એક્ઝિક્યુટિવ ઓફિસર (CEO) ગિલેમ ફૌરીએ કહ્યું, “રાષ્ટ્ર નિર્માણ માટે હેલિકોપ્ટર મહત્વપૂર્ણ છે. ‘મેડ-ઈન-ઈન્ડિયા’ સિવિલ હેલિકોપ્ટર માત્ર આત્મવિશ્વાસપૂર્ણ નવા ભારતનું પ્રતીક જ નહીં, પરંતુ દેશના હેલિકોપ્ટર માર્કેટની સાચી સંભાવનાને પણ બહાર લાવશે. સાથે જ, ‘ફાઇનલ એસેમ્બલી લાઇન’ હેલિકોપ્ટર બનાવીને ટાટા સાથે વિશ્વાસુ ભાગીદારી ઊભી કરશે તેમજ આ ભારતમાં એરોસ્પેસ ઇકોસિસ્ટમ વિકસાવવા માટે એરબસની પ્રતિબદ્ધતાની વાત કરે છે. આનાથી ભારત-ફ્રાન્સના સંબંધો વધુ મજબૂત બનશે અને દેશની અર્થવ્યવસ્થાને વેગ મળશે.

આ પણ વાંચો : સિક્કા લેવાની ના પાડશો તો થશે જેલ, જાણો શું છે કારણ…