ઉત્તરાખંડના જોશીમઠ બાદ જમ્મુ-કાશ્મીરના રામબન અને ડોડામાં પણ ઘરોમાં તિરાડો પડી ગઈ છે. મળતી માહિતી મુજબ, અહીં હાઈવેના વિસ્તરણનું કામ ચાલી રહ્યું છે, જેના કારણે કેટલાક મકાનોમાં તિરાડો પડી ગઈ છે, આ મકાનોમાં રહેતા 5 પરિવારોને શાળાની બિલ્ડીંગમાં ખસેડવામાં આવ્યા છે. જ્યારે ડોડાના 19 પરિવારોનું સ્થળાંતર કરવામાં આવ્યું છે.
એજન્સી અનુસાર, એક સ્થાનિક રહેવાસીએ જણાવ્યું કે હાઇવે પર એક કન્સ્ટ્રક્શન કંપની દ્વારા ખડકો કાપવાનું કામ ચાલી રહ્યું છે. જેના કારણે ઘરોમાં તિરાડો પડી ગઈ છે. હવે સ્થિતિ એવી છે કે ટાઉનશીપ વિસ્તારમાં પહાડો પરથી પથ્થરો નીચે પડવા લાગ્યા છે. તેમણે કહ્યું કે વરસાદને કારણે મુશ્કેલી વધી છે.
કન્સ્ટ્રક્શન કંપની સામે કાર્યવાહીની માંગ
તો સ્ટેશન હાઉસ ઓફિસર (SHO) અને તહસીલદારે પરિવારોને શાળામાં શિફ્ટ કર્યા છે. જ્યારે સ્થાનિક રહીશોએ આ વિસ્તારના 20થી 25 મકાનો અસુરક્ષિત હોવાનો આક્ષેપ કરી કન્સ્ટ્રક્શન કંપની સામે કાર્યવાહી કરવાની માંગ કરી છે.
ગામના લોકોનું સ્થળાંતર
એજન્સીના જણાવ્યા અનુસાર, ડોડાના થાથરીના નઈ બસ્તી ગામના લોકોનું સ્થળાંતર કરવામાં આવ્યું છે. આ દરમિયાન એક મહિલાએ કહ્યું કે આપણે ક્યાં જઈશું? અમે આખું જીવન ઘર બનાવવામાં લગાવી દીધું. હવે તે સમાપ્ત થઈ ગયું છે, હવે અમારી પાસે કંઈ બચ્યું નથી.
ટીમે શનિવારે કર્યો સર્વે
જીઓલોજિકલ સર્વે ઓફ ઈન્ડિયાના નિષ્ણાતોની એક ટીમે શનિવારે જમ્મુ અને કાશ્મીરના ડોડા જિલ્લાના એક ગામનું નિરીક્ષણ કર્યું હતું, જેથી બે ડઝન જેટલી કોંક્રિટ ઈમારતોમાં તિરાડો પડવાના કારણો જાણવા મળે.
ડેપ્યુટી કમિશનરે મદદની આપી હતી ખાતરી
હકીકતમાં, 19 પરિવારોના 100થી વધુ સભ્યોના ઘરોમાં તિરાડો દેખાયા પછી તેમને સલામત સ્થળે લઈ જવામાં આવ્યા છે. મળતી માહિતી મુજબ શુક્રવારે અહીં ત્રણ મકાનો પણ ધરાશાયી થયા હતા. ડેપ્યુટી કમિશનરે અસરગ્રસ્ત પરિવારોને શક્ય તમામ મદદની ખાતરી આપી હતી અને કહ્યું હતું કે તેમના માટે તમામ જરૂરી સુવિધાઓ સાથે રાહત કેમ્પની સ્થાપના કરવામાં આવી છે.
