UPI પેમેન્ટ અને ઈ-કોમર્સમાં અદાણીની એન્ટ્રી! ગુગલથી લઈને Paytmનું વધશે ટેન્શન

• ગૌતમ અદાણી ગ્રુપ ઈ-કોમર્સ અને ફાઈનાન્સ સેક્ટરમાં બિઝનેસ વધારવાની બનાવી રહ્યું છે યોજના

HD ન્યૂઝ ડેસ્ક, 28 મે: ગૌતમ અદાણી ગ્રુપ ઈ-કોમર્સ અને ફાઈનાન્સ સેક્ટરમાં બિઝનેસ વધારવાની યોજના બનાવી રહ્યું છે. જૂથ યુનિફાઈડ પેમેન્ટ્સ ઈન્ટરફેસ (UPI) માટે માત્ર લાયસન્સ માટે જ અરજી કરવા જઈ રહ્યું નથી પરંતુ કો-બ્રાન્ડેડ અદાણી ક્રેડિટ કાર્ડ માટે બેંકો સાથે પણ વાતચીત કરી રહ્યું છે. જો કે, અદાણી ગ્રુપે આ સમાચાર પર ટિપ્પણી કરવાનો ઇનકાર કર્યો છે. અદાણી ગ્રુપનું આ નવું પગલું ગૂગલ અને પેટીએમ જેવા સ્પર્ધકોની મુશ્કેલીમાં વધારો કરી શકે છે.

શું છે યોજના?

ફાઈનાન્સિયલ ટાઈમ્સ (FT)ના અહેવાલ મુજબ અદાણી ગ્રુપ ઓપન નેટવર્ક ફોર ડિજિટલ કોમર્સ (ONDC) દ્વારા ઓનલાઈન શોપિંગ ઓફર કરવા માટે વાટાઘાટ કરી રહ્યું છે. ONDC એ સરકાર સમર્થિત ઈ-કોમર્સ પ્લેટફોર્મ છે. અહીં વેચનાર અને ખરીદનાર બંને એટલે કે ગ્રાહક એકબીજાને સીધા મળે છે. આ પ્લેટફોર્મ પરથી ખરીદી કરવા માટે પેમેન્ટ એપ હોવી જરૂરી છે. જો અદાણી ગ્રૂપની નવી પહેલને અંતિમ સ્વરૂપ આપવામાં આવશે તો ગ્રાહકોને ગ્રાહક સેવા એપ Adani One ઉપલબ્ધ થશે. આ એપ 2022 ના અંતમાં લોન્ચ કરવામાં આવી હતી. આ એપ પર ફ્લાઇટ અને હોટલ બુકિંગ જેવી મુસાફરી સેવાઓ ઉપલબ્ધ છે. રિપોર્ટ અનુસાર, ગ્રુપના ઈ-કોમર્સ અને પેમેન્ટ પ્લેટફોર્મ સૌથી પહેલા તેમના વર્તમાન ગ્રાહકોને ટાર્ગેટ કરશે.

આ હશે અદાણી ગ્રુપના સ્પર્ધક

અદાણી ગ્રુપમાં ઘણા સ્પર્ધકો હશે. ઉદાહરણ તરીકે Google, PhonePe પહેલેથી જ UPI-આધારિત પેમેન્ટ એપ ચલાવે છે જ્યારે Paytm અને Tata જેવા સ્થાનિક જૂથો ONDC દ્વારા કરિયાણા અને ફેશન શોપિંગ ઓફર કરે છે.

શું કહે છે નિષ્ણાતો?

બેંગલુરુ સ્થિત ટેક એક્સપર્ટ જયંત કોલાએ FTને જણાવ્યું હતું કે, “આ દેશને માત્ર ત્રણ બિઝનેસ જૂથો ચલાવી રહ્યા છે – ટાટા, અંબાણી અને અદાણી. અદાણી એ ત્રણ જૂથોમાંથી એક છે જેની પાસે આવશ્યક ગ્રાહક ઉત્પાદનોનો વ્યવસાય નથી.” આવી સ્થિતિમાં આ નવી પહેલ અદાણી ગ્રુપ માટે નવા દરવાજા ખોલશે.

આ પણ વાંચો: LIC પણ વેચશે હેલ્થ ઈન્સ્યોરન્સ! કંપની આ સેક્ટરમાં ઝંપલાવવાની કરી રહી છે તૈયારી