અદાણી જૂથ હિમાચલ પ્રદેશમાં બે સિમેન્ટ પ્લાન્ટ બંધ કરશે, જાણો શું છે કારણ

હિમાચલ પ્રદેશમાં જ્યારથી કોંગ્રેસની સરકાર બની છે ત્યારથી રાજ્યમાં સિમેન્ટની વધતી કિંમતો મુખ્ય મુદ્દો બની ગયો છે. લોકો પરેશાન છે કે અન્ય રાજ્યોમાં સસ્તામાં મળતી સિમેન્ટ માટે તેમને વધુ પૈસા ચૂકવવા પડે છે. આ વધતા ભાવ વચ્ચે અદાણી ગ્રુપે તેના બે સિમેન્ટ પ્લાન્ટ બંધ કરવાનો નિર્ણય લીધો છે. આ એક નિર્ણયને કારણે અનેક લોકોની નોકરીમાં સંકટ ઉભું થયું છે. અદાણી ગ્રુપે એકાએક આટલો મોટો નિર્ણય કેમ લેવો પડ્યો તે અંગે સવાલો ઉઠી રહ્યા છે.

અદાણીએ જારી નિવેદનમાં શું કહ્યું?

અદાણી જૂથે એક નિવેદનમાં જણાવ્યું હતું કે, પ્લાન્ટ બંધ થવાનું કારણ ઊંચા પરિવહન ખર્ચ છે.  તેઓ લાંબા સમયથી રાજ્યમાં વધતા પરિવહન ખર્ચથી નારાજ હતા. કિંમતો ઘટાડવામાં આવે તેવી માંગ ઉઠી હતી, પરંતુ કામ ન થતાં કંપનીએ બે સિમેન્ટ પ્લાન્ટ બંધ કરવાનો નિર્ણય લીધો હતો.  કંપની દ્વારા બરમાના અને દારલાઘાટમાં ACC અને અંબુજા સિમેન્ટ પ્લાન્ટ બંધ કરવામાં આવ્યા છે.  એવું પણ જણાવવામાં આવ્યું છે કે પરિવહન ખર્ચમાં વધારો થવાને કારણે કંપનીને દરરોજ 2.26 કરોડ રૂપિયાનું નુકસાન થઈ રહ્યું છે.

ટ્રાન્સપોર્ટ માટે અન્ય રાજ્યો કરતા વધુ ચુકવવા પડે છે

અદાણી જૂથના પ્રવક્તાએ પણ ભારપૂર્વક જણાવ્યું હતું કે તેઓ પણ ઉત્પાદન ખર્ચ ઘટાડવા માટે સતત દબાણ હેઠળ છે. આમ ન કરવાને કારણે માર્કેટમાં ટકી રહેવું મુશ્કેલ હતું. ટ્રાન્સપોર્ટ યુનિયન દ્વારા ટ્રાન્સપોર્ટ કોસ્ટ ઘટાડવી જોઈએ તેવી માંગ કરવામાં આવી હતી, તેમને કહેવામાં આવ્યું હતું કે અન્ય રાજ્યોની સરખામણીમાં હિમાચલમાં વધુ રૂપિયા ચૂકવવા પડે છે. પરંતુ કંઈ કામ ન થયું અને પ્લાન્ટ બંધ કરવો પડ્યો.

નોકરીનું સંકટ કેટલું મોટું છે?

હવે આ પ્લાન્ટ કેટલો સમય બંધ રહેશે, કર્મચારીઓને નોકરીમાંથી છૂટા કરવામાં આવશે તે હજુ સ્પષ્ટ નથી. પરંતુ આ એક નિર્ણયથી હજારો લોકોની નોકરીઓ પર સંકટ આવી ગયું છે. એકલા સોલન અને બિલાસપુરમાં આ એક નિર્ણયથી 15000 પરિવારો પ્રભાવિત થવાના છે. મહત્વનું છે કે, ACC પ્લાન્ટમાં 980 કર્મચારીઓ કામ કરતા હતા, જ્યારે 1000 કર્મચારીઓ અંબુજા સાથે સંકળાયેલા હતા. આ ઉપરાંત મિકેનિક વર્કશોપ, ટાયર રિપેરિંગ સેવામાં કામ કરતા લોકોને પણ અસર થવાની છે.

માત્ર ભાવવધારો જ નહીં અન્ય પણ સમસ્યા હતી

અદાણી ગ્રુપ માત્ર ટ્રાન્સપોર્ટેશન કોસ્ટ વધારે હોવાને કારણે નારાજ નહોતું, તેની નારાજગીનું એક કારણ એ પણ હતું કે તે કંપનીઓમાં કામ કરતા ઘણા કર્મચારીઓ ટ્રાન્સપોર્ટર તરીકે પણ કામ કરતા હતા.  બીજી તરફ જે લોકો પાસેથી જમીન લઈને સિમેન્ટ પ્લાન્ટ શરૂ કરવામાં આવ્યા હતા તેમણે પણ બાદમાં યુનિયનો બનાવીને કંપનીનો જ વિરોધ શરૂ કર્યો હતો. આવી સ્થિતિમાં અનેક બાજુથી પડકારો ઉભા થવા લાગ્યા. હવે કંપનીએ પ્લાન્ટ બંધ કરવાનો નિર્ણય લીધો છે, પરંતુ રાજ્ય સરકાર ગુસ્સે છે કે આ નિર્ણય કોઈપણ સૂચના વિના લેવામાં આવ્યો હતો જેના કારણે ઘણા લોકોની નોકરી જોખમમાં આવી હતી.