રાજકોટમાં ઢોર પકડ પાર્ટીના બે કર્મચારીઓ પર એસિડ એટેક: સુરક્ષા વગર મજૂરો કામ નહીં કરે..!

હાઇકોર્ટના આદેશના પગલે રાજ્યભરમાં ચાલી રહેલી ઢોર પકડ ઝુંબેશ હવે ઘાતક બની રહી છે. ઢોર પકડવા જતાં કર્મચારીઓ પર હુમલાના બનાવો સતત વધી રહ્યા છે. રાજકોટમાં પણ આજે વહેલી સવારે આજીડેમ ચોકડી નજીક આવેલા અમુલ સર્કલ પાસેથી મહાનગરપાલિકાની ઢોર પકડ પાર્ટી     ઢોરને લઇને આવતી હતી ત્યારે નંબર પ્લેટ વગરની બાઇક પર આવેલા બે શખ્સોએ ટ્રેક્ટર ચાલક અને મજૂર પર એસિડ એટેક કરતાં બન્નેના ચહેરા પર ઇજા થઇ હતી. બન્નેને સારવાર માટે સરકારી હોસ્પિટલમાં ખસેડવામાં આવ્યા છે. આ બનાવની જાણ થતાં મજૂરો અને ઢોર પકડ પાર્ટીના કર્મચારીઓ મોટી સંખ્યામાં હોસ્પિટલ ખાતે એકઠાં થયા હતા અને જ્યાં સુધી વધારાની સુરક્ષા ન મળે ત્યાં સુધી કામગીરી નહીં કરવાની ચિમકી આપી આજ સવારથી જ કામગીરી અટકાવી દીધી હતી. કર્મચારીઓ અને મજૂરોએ મ્યુનિસિપલ કમિશનરને આવેેદનપત્ર આપી સુરક્ષા વધારવાની માગણી કરી હતી. બીજી તરફ મ્યુનિસિપલ કમિશનર અમીત અરોરાએ પણ બનાવની ગંભીરતા સમજીને પોલીસ કમિશનર રાજુ ભાર્ગવ સાથે વાતચિત કરી હતી. અને, વિજીલન્સ ડીવાય.એસ.પીે ઝાલા તેમજ ઢોર પકડ પાર્ટીના અધિકારી જકાસણીયાને પોલીસ કમિશનર પાસે રૂબરૂ મોકલ્યા હતા. અરોરાએ મજૂરો અને કર્મચારીઓને સુરક્ષાના તમામ સાધનો પુરા પાડવાની પણ ખાતરી આપી હતી.

હાઇકોર્ટના આદેશ બાદ રાજકોટ મહાનગરપાલિકા રસ્તે રઝળતા ઢોર પકડવા અલગ અલગ ત્રણ શિફ્ટમાં કામગીરી કરી રહી છે. પણ, પશુપાલકો દ્વારા તેનો વિરોધ કરીને હુમલા કરવામાં આવી રહ્યા છે. આજે સવારે પાંચ વાગ્યાના અરસામાં આજીડેમ નજીક એક ટુકડી ઢોર પકડીને ઢોરડબ્બે મુકવા જતી હતી ત્યારે અમુલ ચોકડી પાસે સ્પીડ બ્રેકર આવતાં ચાલકે  ટ્રેક્ટર ટ્રોલી ધીમી પાડી હતી. આ દરમિયાન નંબર પ્લેટ વગરના બાઇક પર ધસી આવેલા બે અજાણ્યા શખ્સો એસિડ સ્પ્રે કરીને હુમલો ર્ક્યો હતો. આ કારણે ધીરજદાન નામના મજૂર અને કોન્ટ્રાક્ટમાં કામ કરતા ડ્રાઇવર મેરૂભાઇ ચાવડાના ચહેરા  દાઝી ગયા હતા. જો કે સદનસીબે બન્નેની આંખ બચી ગઇ હતી. આ બનાવના પગલે ઢોરપકડ પાર્ટીના મજૂરો અને કર્મચારીઓમાં રોષ જાગ્યો હતો. અને કામગીરી અટકાવી દઇ જ્યાં સુધી પુરતી સુરક્ષા ન મળે ત્યાં સુધી કામ ન કરવાની જાહેરાત કરી દીધી હતી. આ પછી તેઓએ મ્યુનિસિપલ કમિશનરને પણ આવેદન પત્ર આપીને રજુઆત કરી હતી.

આ અગાઉ રૈયાચોકડી બ્રીજ પરથી પેવિંગ બ્લોકના ઘા કરાયા હતા: ત્રણ વખત થઇ ચુક્યા છે હુમલા..
મહાનગરપાલિકાની ઢોર પકડ પાર્ટી પર હુમલો થયાની આ ત્રીજી ઘટના બની છે. મહાનગરપાલિકા કર્મચારી પરિષદે મ્યુનિસિપલ કમિશનરને આપેલા આવેદનમાં જણાવાયા મુજબ આ પહેલાં તા. 29મીએ રૈયાચોકડી બ્ર્રીજ પાસે બીઆરટીએસ રૂટ નજીક ઢોર પકડવાની કામગીરી ચાલતી હતી આ દરમિયાન કેટલાંક શખ્સોએ બ્રીજના પુલ પરથી પેવિંગ બ્લોકના ઘા કરીને કર્મચારીઓના માથાં ફોડી નાખવાનો પ્રયાસ ર્ક્યો હતો. જ્યારે તા. 28મીએ ભૂતખાના ચોકમાં વાહન પર પથ્થરમારો કરાયો હતો. આજે સવારે આ એસિડ એટેક થયો છે સતત અસલામતીની ભાવના વચ્ચે કર્મચારીઓ કામ કરતાં હોવાછતાં તંત્ર દ્વારા ન તો સલામતિ માટે કોઇ પગલાં લેવામાં આવે છે કે ન તો પોલીસ ફરિયાદની કાર્યવાહી કરવામાં આવે  છે.

મજૂરોને હેલમેટ સહિતના સુરક્ષા સાધનો પુરા પડાશે: કમિશનર
દરમિયાન મ્યુનિસિપલ કમિશનર અમીત અરોરાએ વાતચિતમાં કહ્યું હતું કે, મહાનગરપાલિકા તેના કર્મચારીઓની સુરક્ષા માટે સતત ચિંતિત છે. આ બનાવમાં પોલીસ ફરિયાદ કરાશે. કર્મચારીઓને હેલ્મેટ સહિતની સગવડતા પણ પુરી પાડવામાં આવશે. આજના બનાવ અંગે પોલીસ કમિશનર સાથે પણ વાતચિત કરી છે.

ખુલ્લી ધમકી: ‘ઘેર તો એકલા જવાના ને….!’
દરમિયાન મજૂરોએ આક્રોશ વ્યક્ત કરતાં કહ્યું હતું કે, ઢોર પકડવાની ઝુંબેશ વખતે અમારી સાથે પોલીસ બંદોબસ્ત હોય છે. આમછતાં 50થી 70 જેટલાં નંબર પ્લેટ વગરના બાઇક ચાલકો અભદ્ર ભાષાનો પ્રયોગ કરીને અમને એવી ખુલ્લી ધમકી આપે છે કે ‘અત્યારે પોલીસ સાથે છે. પણ, ઘેર તો એકલાં જવાનાં ને..! ’ જો પોલીસની હાજરીમાં જ આવી ધમકી મળતી હોય તો અમારી સુરક્ષાનું શુ? ’ અમારા પરિવારને પણ ફફડતી હાલતમાં જીવવું પડે છે…

દરમિયાન માલધારી સમાજના આગેવાન રાજુભાઇ ચાવડીયા, રણજીતભાઇ મુંધવા સહિતના આગેવાનોની યાદી મુજબ  ગુજરાત સરકાર દ્વારા ચાલી રહેલી ઢોર પકડ ઝુંબેશ અને માલધારી સમાજ પર અત્યાચાર મુદ્દે રાજકોટ માલધારી સમાજની અગત્યની બેઠક મળી મચ્છો માતાજીના મંદિરે મળી હતી જેમાં 1000થી પણ વધારે યુવાનો હાજર રહ્યા હતા. આ ઝુંબેશ સામે આંદોલન કરવા બાબતે રાજકોટ માલધારી ભરવાડ સમાજના આગેવાનોની હાજરીમાં ચર્ચા કરવામાં આવી હતી. મહાનગરપાલિકા દ્વારા દિવસ રાત ગાય પકડવાની ઝુંબેશ ચાલી રહી છે અને પોલીસ કમિશનર દ્વારા જે ગાયના ઘાસચારને લઈ જાહેરનામું બહાર પાડવામાં આવ્યુ છે તે મુદ્દે અગત્યની ચર્ચા થઈ હતી. ત્યારબાદ મચ્છો માતાજીના મંદિરેથી મૌન પદયાત્રા કરીને  આશાપુરા માતાજીના મંદિરે એક હજારથી પણ વધારે ભરવાડ સમાજના યુવાનો ગયા હતા. અને, આંદોલનના શ્રી ગણેશ કર્યા હતા  આ બેઠકમાં રાજુભાઈ ચાવડીયા, રણજીત મુંધવા, ભીખાભાઈ પડસાળીયા, બાબુભાઇ માટીયા, નારણભાઈ વકાતર, ગોપાલભાઈ ગોલતર સહિતના આગેવાનો ઉપસ્થિત રહ્યા હતા.