નવી દિલ્હી, 14 જુલાઈ : સંસદ સુરક્ષા ભંગ કેસમાં ગેરકાનૂની પ્રવૃત્તિઓ (પ્રિવેન્શન) એક્ટ (UAPA) હેઠળ તમામ છ આરોપીઓ સામે કાર્યવાહી કરવાની મંજૂરી મળ્યા બાદ દિલ્હી પોલીસે સોમવારે પૂરક ચાર્જશીટ દાખલ કરી હતી.
પટિયાલા હાઉસ કોર્ટના એડિશનલ સેશન્સ જજ હરદીપ કૌર સમક્ષ ચાર્જશીટ દાખલ કરવામાં આવી હતી. વિશેષ સરકારી વકીલે કોર્ટને જણાવ્યું કે તપાસ એજન્સીએ સંબંધિત અધિકારીઓ પાસેથી UAPAની કલમ 13 હેઠળ કાર્યવાહી માટે જરૂરી મંજૂરી મેળવી છે.
તેમણે કહ્યું કે કેટલાક ફોરેન્સિક સાયન્સ લેબોરેટરી (FSL) રિપોર્ટ્સ હજુ બાકી છે અને ટૂંક સમયમાં સબમિટ કરવામાં આવશે. આ પછી, કોર્ટે કેસની સંજ્ઞાન પર ચર્ચા કરવા માટે 2 ઓગસ્ટની સુનાવણી નક્કી કરી અને આગામી સુનાવણીની તારીખ સુધી તમામ આરોપીઓની ન્યાયિક કસ્ટડી લંબાવી હતી.
ઉલ્લેખનીય છે કે, ડિસેમ્બર 2023માં બનેલી આ ઘટના 2001ની સંસદ પર થયેલા આતંકી હુમલાની વર્ષગાંઠ સાથે જોડાયેલી હતી. આ કેસમાં છ આરોપીઓ મનોરંજન ડી, સાગર શર્મા, અમોલ ધનરાજ શિંદે, નીલમ રાનોલિયા, લલિત ઝા અને મહેશ કુમાવત પર ગેરકાયદેસર રીતે સંસદમાં પ્રવેશવાનો અને લોકસભામાં ધુમાડાના ડબ્બા ફેંકવાનો આરોપ છે. આમાંથી બે વ્યક્તિઓ હાથમાં એરોસોલના ડબ્બા લઈને વિઝિટર ગેલેરીમાંથી ગૃહમાં કૂદી પડ્યા, ડબ્બામાંથી પીળો ગેસ છોડ્યો અને સૂત્રોચ્ચાર કર્યા હતા.
1000 પાનાની ચાર્જશીટ ફાઈલ
મહત્વનું છે કે, 7 જૂનના રોજ, દિલ્હી પોલીસના સ્પેશિયલ સેલે આ કેસમાં ધરપકડ કરાયેલા તમામ છ આરોપીઓ મનોરંજન ડી, લલિત ઝા, અમોલ શિંદે, મહેશ કુમાવત, સાગર શર્મા અને નીલમ આઝાદ વિરુદ્ધ લગભગ 1000 પાનાની ચાર્જશીટ દાખલ કરી હતી. આ મામલામાં લેફ્ટનન્ટ ગવર્નર વીકે સક્સેનાએ ગેરકાનૂની પ્રવૃત્તિઓ (પ્રિવેન્શન) એક્ટ (UAPA) હેઠળ છ આરોપીઓ સામે કાર્યવાહી કરવાની મંજૂરી આપી છે. આ લોકો પર 13 ડિસેમ્બર 2023ના રોજ ગૃહની કાર્યવાહી દરમિયાન સંસદ પર કથિત રીતે હુમલો કરવાનો આરોપ છે.
એવો આરોપ છે કે મનોરંજન ડી, સાગર શર્મા, અમોલ ધનરાજ શિંદે, નીલમ, લલિત ઝા અને મહેશ કુમાવત નામના લોકો ગેરકાયદેસર રીતે સંસદમાં પ્રવેશ્યા હતા. તેમજ વર્તમાન સત્ર દરમિયાન લોકસભામાં ધુમાડાના ડબ્બા ફેંકવામાં આવ્યા હતા. આ કેસમાં દિલ્હી પોલીસે લેફ્ટનન્ટ ગવર્નરને UAPAની કલમ 16 અને 18 હેઠળ તેમની સામે કાર્યવાહી કરવા વિનંતી કરી હતી. એલજીએ રેકોર્ડ પર પૂરતી સામગ્રી મળ્યા બાદ કાર્યવાહીની મંજૂરી આપી હતી.
