વડોદરા: સમલિંગી લગ્ન કેસમાં યુવકનો ચોંકાવનારો ખુલાસો

વડોદરા: ગુજરાતના કદાચ પહેલા સમલિંગી લગ્નમાં પત્નીએ પતિ પર કરેલા ગંભીર આક્ષેપોની તપાસ કરી રહેલી પોલીસને કેટલીક ચોંકાવનારી વિગતો જાણવા મળી છે. આઠ વર્ષ અગાઉ આરોપી ડૉક્ટર વિરાજ વર્ધાને વડોદરામાં જ્યારે શીતલ (નામ બદલ્યું છે) સાથે લગ્ન કર્યા ત્યારે તેણે લિંગ પરિવર્તન કરાવ્યું જ નહોતું. પોલીસના જણાવ્યા અનુસાર, વિરાજે છેક 2020માં સર્જરી કરાવી હતી, પરંતુ તે નિષ્ફળ ગઈ હતી.

પત્નીને આ અંગે કોઈ ખ્યાલ નહોતો

શરીરે સ્ત્રી એવો વિરાજ સિલિકોનમાંથી બનેલું લિંગ પહેરીને પત્ની સાથે સંભોગ કરતો હતો અને આમ તે પોતે પુરુષ હોવાનો ઢોંગ કરતો હતો. પોલીસ સમક્ષ તેણે ખુદ કબૂલાત કરી છે કે લગ્ન વખતે તે શરીરે સ્ત્રી હતો અને તેની પત્નીને આ અંગે કોઈ ખ્યાલ નહોતો, કારણકે તે પુરુષની માફક જ રહેતો હતો. આમ, કોઈ યુવતીને છેતરીને તેની સાથે સમલિંગી લગ્ન કરવામાં આવ્યા હોય તેવો આ પહેલો કિસ્સો છે. આવા લગ્ન કાયદાકીય રીતે પણ માન્ય ના હોવાનું કેસની તપાસ કરી રહેલા પોલીસ અધિકારીએ જણાવ્યું હતું.

આ પણ વાંચો:આ પૂર્વ કેન્દ્રીય ગૃહ રાજ્ય મંત્રી વિરુદ્ધ બિનજામીનપાત્ર વોરંટ જારી, શિષ્યા પર બળાત્કારનો છે આરોપ

સિલિકોનમાંથી બનેલું લિંગ પહેરીને પત્ની સાથે સંભોગ કરતો

વર્ધાન અત્યારસુધી પોતાની પત્નીને કઈ રીતે છેતરી રહ્યો હતો તે અંગે પૂછતા પોલીસે જણાવ્યું હતું કે આરોપી સિલિકોનનું બનેલું લિંગ પહેરતો હતો. વર્ધાન સંભોગ કરવાનું એવોઈડ કરતો હોવાથી તેની પત્નીને પણ તેના વર્તન પર શંકા થઈ હતી. જોકે, તે સિલિકોનના લિંગને પત્નીને બહારથી ફીલ કરાવતો હતો. વિરાજ વર્ધાન સ્ત્રી છે કે પુરુષ તેને લઈને પોલીસ પણ મૂંઝવણમાં હોવાથી તેની પૂછપરછ કોણ કરશે તે સવાલ પણ ઉભો થયો હતો. આખરે, મહિલા અને પુરુષ પોલીસ અધિકારીએ સાથે તેની પૂછપરછ કરી હતી.

સેક્સ ચેન્જ સર્જરીની ફાઈલ તેની પત્નીના હાથમાં આવતા ભાંડો ફુટ્યો 

પત્ની સંભોગ કરવા દબાણ કરતી ત્યારે વર્ધાન પોતાને પ્રાઈવેટ પાર્ટમાં ઈન્ફેક્શન થયું હોવાથી લઈને અનેક પ્રકારના બહાના કાઢતો હતો. જોકે, બે વર્ષ અગાઉ તેની સેક્સ ચેન્જ સર્જરીની ફાઈલ તેની પત્નીના હાથમાં આવતા જ તેનો ભાંડો ફુટી ગયો હતો.વેપારી એવા વર્ધાને શુક્રવારે પોલીસ સમક્ષ કબૂલાત કરી હતી કે તેણે સ્ત્રીમાંથી પુરુષ બનવા માટે સર્જરી કરાવી હતી. તેણે એવો પણ દાવો કર્યો છે કે પત્ની તેના ભૂતકાળથી વાકેફ હતી. તેણે પત્ની સમક્ષ પોતે રશિયાથી MBBS કર્યું હોવાની તેમજ પિતા આંખના સર્જન હોવાની પણ વાતો કરી હતી.

એક સેક્સ વર્કરના પ્રેમમાં પડેલા વર્ધાને તેને દિલ્હીમાં ફ્લેટ અપાવ્યો હોવાનું પણ સામે આવ્યું છે. ઉલ્લેખનીય છે કે, શીતલ અને વર્ધાન મેટ્રિમોનિયલ વેબસાઈટ પર મળ્યા હતા અને વડોદરાની એક હોટેલમાં તેમના લગ્ન થયા હતા. શીતલના પિતા વડોદરામાં મેડિકલ શોપ ચલાવે છે.