સુરતથી સાપુતારા જતી ખાનગી બસનો અકસ્માત, માલેગાંવ નજીક ખીણમાં ખાબકી

સુરતથી એક ખાનગી બસ ડાંગના પ્રવાસે નીકળી હોય દરમ્યાન સાપુતારા જતાં તેને અકસ્માત નડ્યો છે. આ બસ માલેગાંવ નજીક ખીણમાં ખાબકી છે. મોડી સાંજે બનેલા અકસ્માતમાં હાલ રાહત બચાવની કામગીરી ચાલી રહી છે અને મોટી સંખ્યામાં એમ્બ્યુલન્સનો કાફલો ઘટનાસ્થળે પહોંચી ગયો હતો. સૂત્રોના જણાવ્યા અનુસાર આ બસમાં 50 લોકો સવાર હતા.

મળતી માહિતી મુજબ, ગુજરાતમાં એકતરફ વરસાદી માહોલ જામ્યો છે, ત્યારે રાજ્યના એકમાત્ર ગિરી મથક સાપુતારમાં પ્રકૃતિ સોળે કળાએ ખીલી ઉઠી છે. એવામાં આ સિઝનમાં સાપુતારામાં મોટી સંખ્યામાં પ્રવાસીઓ ઉમટી પડે છે, ત્યારે સુરતની એક ખાનગી બસને સાપુતારા નજીક અકસ્માત નડ્યો છે. આ અંગે પ્રાપ્ત વિગતો મુજબ, સુરતની એક ખાનગી બસ ડાંગ જિલ્લાના પ્રવાસે ગઈ હતી. જેમાં 50થી વધુ મુસાફરો હતા. આ બસ સાપુતારાના માલેગાંવ ઘાટ નજીક પસાર થઈ રહી હતી. આ દરમિયાન અકસ્માતે આ બસ ખીણમાં ખાબકી હોવાની માહિતી મળી છે. હાલ આ બસનો સંપર્ક તૂટી ગયો છે. જે બસને અકસ્માત નડ્યો છે, તે ગરબા ક્લાસીસની હતી. જેની 5 બસો પૈકી એક બસને અકસ્માત નડ્યો છે. અકસ્માતનો ભોગ બનેલી મોટાભાગની મહિલાઓ સુરતના રાંદેર અને અડાજણની રહેવાસી છે. આ અકસ્માતમાં 5 મહિલાઓ ગંભીર રીતે ઘાયલ થઈ હોવાની માહિતી મળી છે.

‘બસનું ટાયર ફાટવાને કારણે અકસ્માત થયો’
ગરબા ક્લાસીસમાં શ્રિઘલબેને જણાવ્યું હતું કે, સાપુતારાથી પરત ફરતા સમયે આ દુર્ઘટના સર્જાઈ છે. તમામને હાલ સાપુતારાની હોસ્પિટલમાં ખસેડ્યા છે. 3 જેટલી મહિલાની હાલત ગંભીર છે. જ્યારે કેટલાકને ફ્રેક્ચર થયા છે. બસનું ટાયર ફાટવાના કારણે આ અકસ્માત થયો હતો.

સાપુતારા પાસે બસ ખીણમાં ખાબકવાની ઘટના અંગે જાણ થતાં જ રાજ્ય સરકાર હરકતમાં આવી ગઈ હતી. રાજ્યના કેબિનેટ મંત્રી પુર્ણેશ મોદીએ તાત્કાલિક અસરથી એક મેસેજ પાસ કરી ભાજપના કાર્યકરોને આ અકસ્માતમાં મદદ કરવા તાકીદ કરી હતી.