‘Adipurush’ના આમિરે કર્યા વખાણ, રિલીઝ પહેલા ગણાવી શાનદાર ફિલ્મ
‘બાહુબલી’ એક્ટર પ્રભાસની મલ્ટીસ્ટારર ફિલ્મ ‘Adipurush‘ હાલમાં જબરદસ્ત ચર્ચામાં છે. આ ફિલ્મ 16 જૂનના રોજ મોટા પડદા પર રીલિઝ થવા જઈ રહી છે, તે પહેલા સોશિયલ મીડિયા પર તેના વિશે ઘણી ચર્ચા ચાલી રહી છે. ધાર્મિક ફિલ્મ હોવાને કારણે કેટલાક લોકો તેની આતુરતાથી રાહ જોઈ રહ્યા છે તો કેટલાક લોકો ફિલ્મના તથ્યો અને ગ્રાફિક્સ પર સવાલ ઉઠાવી રહ્યા છે. આ તમામ બાબતો વચ્ચે ફિલ્મ અભિનેતા આમિર ખાને ‘Adipurush’ની સમગ્ર ટીમને અભિનંદન પાઠવ્યા છે અને પ્રશંસા કરી છે.
આમિરે ફિલ્મના વખાણ કર્યા
મિસ્ટર પરફેક્શનિસ્ટ કહેવાતા આમિર ખાન એ લોકોમાં જોડાયા છે જેઓ ફિલ્મની રિલીઝની રાહ જોઈ રહ્યા છે. અભિનેતાએ તેના સોશિયલ મીડિયા એકાઉન્ટ ઇન્સ્ટાગ્રામ પર એક પોસ્ટ શેર કરી છે, જેમાં તેણે ‘આદિપુરુષ’ને એક મહાકાવ્ય ફિલ્મ ગણાવી છે. પોસ્ટમાં, આમિરે ફિલ્મનો પ્રોમો શેર કર્યો છે જેમાં તેણે લખ્યું છે, ‘આ અદ્ભુત ફિલ્મ ‘આદિપુરુષ’ માટે ભૂષણ કુમાર, સૈફ અલી ખાન, પ્રભાસ, કૃતિ સેનન, ઓમ રાઉત સહિત સમગ્ર ટીમને ખૂબ ખૂબ અભિનંદન. હું પ્રાર્થના કરું છું કે આ ફિલ્મ દુનિયાભરના લોકોના દિલ જીતે.
તમને જણાવી દઈએ કે ‘Adipurush’માં પ્રભાસની સાથે કૃતિ સેનન, સૈફ અલી ખાન, સની સિંહ અને દેવદત્ત લીડ રોલમાં જોવા મળશે. પ્રભાસ ‘રામ’, કૃતિ સેનન ‘સીતા’, દેવદત્ત ‘બજરંગબલી’, સૈફ અલી ખાન ‘રાવણ’ અને સની ‘લક્ષ્મણ’ના પાત્રમાં જોવા મળશે. ફિલ્મનું નિર્દેશન ઓમ રાઉતે કર્યું છે.
‘આદિપુરુષ’નું એડવાન્સ બુકિંગ શરૂ થઈ ગયું છે અને માનવામાં આવે છે કે આ ફિલ્મ બોક્સ ઓફિસ પર પહેલા જ દિવસે પઠાણ, RRR જેવી ફિલ્મોના રેકોર્ડ તોડી શકે છે. ફિલ્મ પહેલા જ દિવસે લગભગ 20 કરોડનો બિઝનેસ કરી શકે છે. ફિલ્મના VFX પર પણ ઘણું કામ કરવામાં આવ્યું છે, હવે જોવાનું એ રહેશે કે આ નવી રામાયણ લોકોના દિલમાં કેટલી છાપ છોડી શકે છે.
