ઉત્તરપ્રદેશમાં હિંડન એરબેઝની દીવાલ પાસે સુરંગ મળી આવતા સુરક્ષા બાબતે ચિંતા

• હિંડન એરબેઝની સુરક્ષામાં ભંગ કરવાનો પ્રયાસ
• સ્થાનિક લોકોએ સુરંગ જોઈ તો પોલીસને જાણ કરી હતી
• ટીલા મોડ પોલીસ સ્ટેશનમાં FIR નોંધવામાં આવી

ઉત્તર પ્રદેશ, 11 ડિસેમ્બર: ગાઝિયાબાદના હિંડન એરબેઝની સુરક્ષામાં ભંગ કરવાના મોટા પ્રયાસની ઘટના બની છે. ઇર્શાદ કોલોની વિસ્તારમાં એરબેઝની બાઉન્ડ્રી વોલ પાસે 4 ફૂટ ઊંડી સુરંગ જોવા મળી છે. જ્યારે સ્થાનિક લોકોએ સુરંગ જોઈ તો પોલીસને જાણ કરી. ભારતીય વાયુસેનાની ફરિયાદ પર, ટીલા મોડ પોલીસ સ્ટેશનમાં અજાણ્યા વિરુદ્ધ FIR નોંધવામાં આવી છે. આ સુરંગ ખોદવાની ઘટનાને ખૂબ જ ગંભીરતાથી લેવામાં આવી રહી છે.

એરબેઝની દિવાલને અડીને ગીચ વસ્તી છે, જ્યાં પોલીસ તપાસ કરી રહી છે. IB, UP ATS અને મિલિટરી ઈન્ટેલિજન્સ ની ટીમો પણ તપાસ માટે ઘટનાસ્થળે પહોંચી ગઈ હતી. હાલમાં સુરંગમાં માટી નાંખીને તેને પૂરી દેવામાં આવી છે. મામલાની ગંભીરતાને ધ્યાનમાં રાખીને ભારતીય વાયુસેનાએ એરબેઝ સુરક્ષા અધિકારીઓને વધુ સતર્ક રહેવા સૂચના આપી છે. ડીસીપી ટ્રાન્સ હિંડન શુભમ પટેલે જણાવ્યું હતું કે, એરબેઝની બાઉન્ડ્રી વોલ સલામત છે અને તેમાં ક્યાંય તોડફોડ થઈ નથી. એરબેઝ પાસે સુરંગ કોણે અને કયા હેતુથી કરી છે તે અંગે પોલીસ તપાસ કરી રહી છે. તેમણે જણાવ્યું કે, ટીલા મોડ પોલીસ સ્ટેશન વિસ્તારમાં આવતી ઈર્શાદ કોલોની પાસે ગઈકાલે સાંજે સ્થાનિક લોકોએ આ સુરંગ જોઈ હતી.

પોલીસ આસપાસના સીસીટીવી કેમેરા શોધી રહી છે

ટ્રાન્સ હિંડન ડીસીપીના જણાવ્યા અનુસાર, તેનો વીડિયો પણ સોશિયલ મીડિયા પર પોસ્ટ કરીને કાર્યવાહીની માંગણી કરવામાં આવી હતી. આ પછી પોલીસ પણ એક્શનમાં આવી અને એરબેઝના સુરક્ષા અધિકારીઓને જાણ કરી. ભારતીય વાયુસેનાની ફરિયાદ પર મોડી રાત્રે કેસ નોંધવામાં આવ્યો હતો. ગાઝિયાબાદના એડિશનલ પોલીસ કમિશનર સિદ્ધાર્થ ગૌતમે જણાવ્યું હતું કે, ઘટના સ્થળની આસપાસ લગાવવામાં આવેલા સીસીટીવી ફૂટેજની તપાસ કરવામાં આવી રહી છે જેથી આરોપીની ઓળખ થઈ શકે. ગાઝિયાબાદ પોલીસની સ્થાનિક ઇન્ટેલિજન્સ અલગથી તપાસ કરી રહી છે.

હિંડન એશિયાનું સૌથી મોટું એરબેઝ છે

હિંડન એરફોર્સ સ્ટેશન વેસ્ટર્ન એર કમાન્ડનું મુખ્ય એરબેઝ છે. આ એશિયાનું સૌથી મોટું એરબેઝ છે. તે ઉત્તર પ્રદેશના ગાઝિયાબાદમાં લોની નજીક હિંડન નદીની નજીક સ્થિત છે. હિંડન એરબેઝ C-17 ગ્લોબમાસ્ટર અને C-130J સુપર હર્ક્યુલસનું ઘર પણ છે. આ બંને એરક્રાફ્ટ ભારતીય વાયુસેનાના સ્ટ્રેટેજિક હેવી એર લિફ્ટ ડિવિઝન માટે કરોડરજ્જુ સમાન છે. ભારતીય એરપોર્ટ ઓથોરિટી સરકારની પ્રાદેશિક કનેક્ટિવિટી યોજનાના ભાગરૂપે હિંડન એર બેઝ સંકુલમાં સિવિલ એરપોર્ટનું પણ સંચાલન કરે છે.

આ પણ વાંચો, અમદાવાદમાં એક જ દિવસમાં બે અકસ્માતમાં ત્રણ લોકોના મૃત્યુ, હેબતપુરમાં માતા-પુત્રીને ડમ્પરે અડફેટે લીધા