ક્રાઈમ થ્રિલરને ટક્કર આપે તેવી ઘટનાઃ પ્રેમિકાએ નવા પ્રેમી સાથે મળી પૂર્વ પ્રેમીની હત્યા કરી

હાલોલ, 07 જૂન 2024, ગુજરાતમાં પ્રેમ સબંધ હત્યા સુધી પહોંચી જાય એવા અનેક બનાવો પ્રકાશમાં આવતાં રહે છે. ત્યારે શિવરાજપુર નજીકથી ગત 03 જુને પોલીસને એક નાળામાંથી અકસ્માત થયેલી હાલતમાં એક મૃતદેહ મળી આવ્યો હતો. મૃતક યુવકે ફોન પર કોઈની સાથે વાત કરી ઘરેથી નીકળ્યા બાદ તેનો અકસ્માત થયો હોવાનું જાણવા મળતા પોલીસે કોલ ડિટેઈલ આધારે તપાસ હાથ ધરી હતી. જેમાં યુવક સગીરા સાથે વાત કરી ઘરેથી નીકળ્યો હોવાનું ખુલ્યું હતું. તપાસમાં સગીરાએ પ્રેમી અને તેના મિત્રો સાથે મળી યુવકની હત્યા કરાવી હોવાનો પર્દાફાશ થયો હતો. આરોપીઓએ હત્યાને અકસ્માતમાં ફેરવી પોલીસને ગુમરાહ કરવાનો પ્રયાસ કર્યો હતો. પોલીસે કેસનો પર્દાફાશ કરી તમામ આરોપીઓને ઝડપી પાડી વધુ કાર્યવાહી હાથ ધરી છે.

સગીર પ્રેમિકાએ હત્યા કરવા માટે પ્લાન બનાવ્યો
પ્રાપ્ત વિગતો પ્રમાણે હાલોલ તાલુકાના નવાકુવા ગામે રહેતા અને પાવાગઢ માચી ખાતે પરચુરણ દુકાન ચલાવી ગુજરાન ચલાવતા વિષ્ણુભાઈ બારીઆના બે દીકરાઓ પૈકી નાના દીકરા કીર્તન બારીઆને ઘોઘંબાના બાકરોલ ગામની સગીર યુવતી સાથે પ્રેમ સંબંધ હતો. કીર્તન સાથે પ્રેમ સંબંધ હોવા છતાં બાકરોલની સગીરાને ઘોઘંબા તાલુકાના વાવ ગામના નિમેશ બારીયા નામના યુવક સાથે પ્રેમ થઈ ગયો હતો. જેથી યુવતીએ નવા પ્રેમી નિમેષ બારીઆને ફરિયાદ કરી હતી કે, કીર્તન બારીઆ તેને ફોન કરીને હેરાન કરે છે અપશબ્દો બોલે છે. જેથી યુવતીનો નવો પ્રેમી નિમેષ બારીઆ ગુસ્સે ભરાયો હતો અને યુવતી સાથે મળી કીર્તન બારીઆને પતાવી દેવા કાવતરું રચ્યું હતું. જેમાં અન્ય ત્રણ મિત્રોને પણ સામેલ કર્યા હતા.

હત્યાને અકસ્માતમાં ખપાવવા પ્રયાસ કર્યો
યુવતીએ કીર્તનને ફોન કરી ઘરે બોલાવ્યો હતો. જેથી યુવક રાત્રે 10 વાગ્યે ફોન પર વાત કરી સગીરાના ઘરે જવા નીકળ્યો હતો. યુવતીના ગામ બહાર કાચા રસ્તા ઉપર યુવતીનો નવો પ્રેમી નિમેષ બારીઆ અને તેના મિત્રો હથિયારો સાથે રોડની સાઈડમાં અંધારામાં છુપાઈને ઊભા રહ્યા હતા.કીર્તન મોટરસાયકલ લઈ પસાર થતાં જ નિમેશે કીર્તનને માથામાં દંડો મારી દેતા કીર્તન મોટર સાયકલ સાથે નીચે પડી ગયો હતો. ત્યાર બાદ ચેન કપ્પો, લાકડી, પાઇપો, જેવા હથિયારો લઇ આરોપીઓ કીર્તન ઉપર તૂટી પડ્યા હતા. કીર્તનને ઉપરા છપારી ઘા વાગતા કીર્તને ત્યાં જ દમ તોડી દીધો હતો. આરોપીઓ કીર્તનની બાઈક પર કીર્તનને વચ્ચે બેસાડી બામણ કુવા કાકલપુર રોડ લઈ ગયા હતા. જ્યાં કોતર ઉપર આવેલા નાળામાં બાઈક સાથે કીર્તનને ફેંકી દઈ હત્યાને અકસ્માતમાં ખપાવવા પ્રયાસ કર્યો હતો.

પોલીસે તમામ આરોપીઓની ધરપકડ કરી
શિવરાજપુર નજીકના બામણકુવાથી કાકલપુર જવાના રસ્તા ઉપર એક નાળામાં મૃતદેહ મળી આવતા પોલીસે તપાસ હાથ ધરી હતી. યુવક નવાકુવા ગામનો કીર્તન હોવાનું પોલીસને જાણવા મળ્યું હતું. પોલીસે પરિવારજનોને બોલાવી મૃતદેહની ઓળખ કરાવી હતી. પોલીસે કીર્તનની કોલ ડિટેઇલ કઢાવી હતી જેમાં જાણવા મળ્યું હતું કે, કીર્તન બારીઆને ઘોઘંબાના બાકરોલ ગામની સગીર યુવતી સાથે પ્રેમ સંબંધ હતો અને હત્યાની રાત્રે કીર્તન તેની પ્રેમિકા સાથે જ વાત કરીને રાત્રે ઘરેથી નીકળ્યો હતો. પોલીસે હ્યુમન ઇન્ટેલિજન્સ અને સર્વેલન્સ સાથે તમામ પાસાઓ તપાસતા યુવતી ઉપર શંકા જતા યુવતીની પણ પૂછપરછ હાથ ધરવામાં આવી હતી. પુછપરછ દરમિયાન પડી ભાંગતા યુવતીએ હત્યાનો સનસનીખેજ ખુલાસો કરતા પોલીસ પણ ચોકી ઉઠી હતી. યુવતીએ તેના નવા પ્રેમી સાથે મળીને કીર્તન બારીયાની હત્યા કરી હોવાનું પોલીસને જણાવતા પોલીસે હત્યામાં સંડોવાયેલા યુવતીના નવા પ્રેમી અને તેના ત્રણ મિત્રોની ધરપકડ કરી હતી.

આ પણ વાંચોઃઅમદાવાદના બોપલમાં બે નંબરમાં શેરબજારનું ડબ્બા ટ્રેડિંગ કરતાં 18 લોકો ઝડપાયા