જામતારાના સભ્ય બનવા માટે શરૂ થયો ક્રેશ કોર્સ, અલવર અને ભરતપુરમાં ટ્રેનિંગ કેમ્પ

કટથ્રોટ કોમ્પિટિશનના આજના યુગમાં માણસ દરેક શક્ય પ્રયાસો કરીને આગળ વધવા માંગે છે. આગળ વધવાની આ રેસ આપણા અંગત જીવનથી લઈને મોટી MNC અને કોર્પોરેટ કંપનીઓ સુધી ચાલી રહી છે. હવે આ રેસમાં જામતારાના ઠગ પણ જોડાયા છે. હા, જામતારા સાથે સંકળાયેલા કેટલાક લોકોએ તેમના નેટવર્કને વિસ્તારવા માટે તાલીમ કેન્દ્રો પણ ખોલ્યા છે. આ કેન્દ્રોમાં થોડા દિવસોથી લઈને થોડા અઠવાડિયા સુધીના ક્રેશ કોર્સ ચલાવવામાં આવે છે. જેમાં લોકોને છેતરવાનું કામ શીખવવામાં આવે છે.

આ પણ વાંચો : મેવાત ગેંગની ગુજરાતમાં એન્ટ્રી, તમે તો નથી બની રહ્યાને તેમનો શિકાર ?
તાજેતરમાં હરિયાણાના મેવાત અને રાજસ્થાનના કેટલાક વિસ્તારોમાં પોલીસે દરોડા પાડી જામતારાના કેટલાક લોકોની ધરપકડ કરી હતી. આ સાથે લગભગ 2 લાખ સિમ કાર્ડ પણ બ્લોક કરવામાં આવ્યા હતા. આ લોકોએ પૂછપરછ દરમિયાન ચોંકાવનારી માહિતી આપી છે. ધરપકડ કરાયેલા આરોપીઓએ જણાવ્યું કે જામતારાના શાતિર ગુંડાઓએ રાજસ્થાનના અલવર અને ભરતપુરમાં ટ્રેનિંગ કેમ્પ પણ શરૂ કર્યા છે. આ શિબિરોમાં સાયબર ક્રાઈમ કરવા માટેની તાલીમ આપવામાં આવે છે. એટલું જ નહીં, શિબિરોમાં ભણાવવા માટે 15 થી 20 હજાર રૂપિયાની ફી પણ લેવામાં આવી રહી છે. આ તાલીમ શિબિરોમાં યુવાનોને સાયબર ક્રાઇમની સંપૂર્ણ પદ્ધતિ શીખવવામાં આવી રહી હતી. નકલી સિમ કાર્ડ કેવી રીતે મેળવવું, બેંકોમાં નકલી ખાતા કેવી રીતે ખોલવા, લોકોને કેવી રીતે આકર્ષિત કરવા અને તેમને કેવી રીતે ફસાવી શકાય, આ તમામ માહિતી તાલીમ દરમિયાન આપવામાં આવી હતી. એક રીતે, તે ગુનેગારો માટે એક શાળા હતી, જે તેમને ઑનલાઇન છેતરપિંડી કેવી રીતે કરવી તે શીખવતી હતી. છેતરપિંડીની સૌથી લોકપ્રિય પદ્ધતિમાં, દેશમાં વિવિધ સ્થળોએ નકલી કોલ સેન્ટરો ખોલવામાં આવે છે. આમાં લોકોને નોકરી, શોપિંગ, બેંક ખાતાને લગતી સેવાઓ આપવાના નામે આકર્ષવામાં આવે છે. જ્યારે તેમને આ નકલી કોલ સેન્ટરોમાં વિશ્વાસ આવે છે ત્યારે તેઓ તેમની સાથે છેતરપિંડી કરવા લાગે છે. આ રીતે માત્ર ભારતીયો જ નહીં અમેરિકાના નાગરિકો સાથે પણ છેતરપિંડી થઈ રહી છે.