સ્પેસમાં વાદળો પર બેસીને ભોજન કરવાની તક, પરંતુ ખર્ચ કરવા પડશે કરોડો
સ્પેસ, 18 માર્ચ : આ એક કંપની તમારું અંતરિક્ષમાં ભોજન કરવાનું સપનું પૂરું કરશે. આ સ્પેસ ટુરીઝમ આવતા વર્ષથી શરૂ થશે. જો તમે પણ અવકાશમાં ભોજન કરવા માંગતા હોવ તો આ કાલ્પનિક લાગતી આ વાત હવે શક્ય છે. એક સ્પેસ એડવેન્ચર કંપનીએ ‘Dine in Space’ની ઑફર લૉન્ચ કરી છે. જો કે, આ માટે તમારે કરોડો રૂપિયા ખર્ચવાની જરૂર પડશે.
આ ઓફર લક્ઝરી સ્પેસ ટ્રાવેલ કંપની SpaceVIP દ્વારા રજૂ કરવામાં આવી છે. આ ઓફર હેઠળ, કંપની તમને તેના સ્પેસ બલૂનમાં 1 લાખ ફૂટ એટલે કે પૃથ્વીથી 30 કિલોમીટરની ઊંચાઈ પર લઈ જશે. કંપનીનું આ હાઇ-પ્રોફાઇલ લક્ઝરી સ્પેસ ટુરિઝમ આવતા વર્ષથી શરૂ થશે. એક ટ્રીપમાં છ લોકો માટે જગ્યા હશે.
આ ટ્રિપમાં મુસાફરોને વિશ્વના શ્રેષ્ઠ શેફ દ્વારા ખાસ તૈયાર કરવામાં આવેલું ભોજન પીરસવામાં આવશે. ડેનમાર્કની રેસ્ટોરન્ટ અલ્કેમિસ્ટના ફેમસ શેફ રૈસ્મસ મંક આ સફરના મુસાફરો માટે ભોજન તૈયાર કરશે. 2023 માટે વિશ્વની શ્રેષ્ઠ 50 રેસ્ટોરન્ટ માર્ગદર્શિકામાં અલ્કેમિસ્ટને પાંચમું સ્થાન મળ્યું હતું.
આ સ્પેસ બલૂનમાં મુસાફરી કરતા મુસાફરો અંતરિક્ષમાં દૂર સુધી ઉડવાની અને ક્ષિતિજ પર સૂર્યને ઉગતા જોવાનો આનંદ માણી શકશે. મુસાફરોને વાઈફાઈની સુવિધા પણ મળશે, જેથી તેઓ ઈચ્છે તો તેમના સમગ્ર અનુભવને પૃથ્વી પરના તેમના પ્રિયજનો સુધી લાઈવ સ્ટ્રીમ કરી શકશે. આ અદ્ભુત અનુભવ માટે મુસાફરોએ 5 લાખ ડોલર ખર્ચવા પડશે. ભારતીય ચલણમાં આ રકમ 4 કરોડ રૂપિયા થાય છે.
આ પણ વાંચો : ફ્લિપકાર્ટને મોટો ફટકો, માર્કેટ વેલ્યુમાં થયો 41 હજાર કરોડ રૂપિયાનો ઘટાડો
