લો બોલો!! ચોરી કરવા મીણબતી વાપરી અને દુકાનમાં લાગી ગઈ આગ: પછી શું થયું જાણો

25 મે 2024, ઝારખંડના લાતેહાર જિલ્લાના બાલુમથમાં આવેલી એક દુકાનમાં મધરાત્રે ઘૂસેલા ત્રણ ચોરને ચોરી કરવી ભારે પડી ગઈ. ચોરોએ ચોરી કરવા મીણબતીનો સહારો લીધો હતો જેથી કોઈને ખબર ન પડે, પરંતુ તેમનો આ પ્લાન તેમના પર જ અવળો પડ્યો અને મીણબતી પ્રગટાવવાના કારણે દુકાનમાં આગ લાગી ગઈ. ચોરી કરવા ઘૂસેલા ત્રણ ચોર આગની લપેટમાં આવી ગયા હતા. તેમાંથી એકનું દુકાનની અંદર જ મૃત્યુ થયું, જ્યારે બે અન્ય લોકો ખરાબ રીતે દાઝી ગયા. પોલીસે ઘાયલોને સારવાર અર્થે હોસ્પિટલમાં દાખલ કર્યા છે.

શું છે સમગ્ર મામલો ?

બાલુમઠ પોલીસ સ્ટેશન વિસ્તારના પાકરી ગામમાં જનરલ સ્ટોરમાં ત્રણ લોકો ચોરીના ઈરાદે ઘૂસ્યા હતા. ચોર મીણબત્તીઓ સળગાવીને પૈસા અને અન્ય કિંમતી ચીજવસ્તુઓ શોધી રહ્યા હતા. આ દરમિયાન એક ચોરનો પગ પેટ્રોલના ગેલન સાથે અથડાયો અને મીણબત્તીઓ પેટ્રોલના ગેલન પર પડી, જેના કારણે આખી દુકાન આગની લપેટમાં આવી ગઈ. ચોરો કંઈ વિચારે તે પહેલા જ તેઓ આગની લપેટમાં આવી ગયા હતા અને એક ચોરનું ઘટનાસ્થળે જ બળીને ખાખ થઈ ગયો હતો. આગ લાગ્યા બાદ ચોરોએ બૂમાબૂમ શરૂ કરી દીધી હતી. અવાજ સાંભળીને આસપાસના લોકો જાગી ગયા હતા અને ઘટના સ્થળે દોડી આવી આગ ઓલવવાનો પ્રયાસ કર્યો હતો. ઘટના અંગે સ્થાનિક ગ્રામજનોએ પોલીસને જાણ કરી હતી. પોલીસે રાત્રે જ ઘટનાસ્થળે પહોંચી મૃતદેહનો કબજો મેળવ્યો હતો. પોલીસે ગંભીર રીતે દાઝી ગયેલા ચોરને સારવાર માટે બાલુમઠની હોસ્પિટલમાં ખસેડયા હતા.

દાઝી ગયેલા ચોરે  શું કહ્યું ?

ઘટનાના સંબંધમાં ગંભીર રીતે દાઝી ગયેલા ચોરે જણાવ્યું કે તેનું ઘર જર્જરિત હતું. તે પાકરી ખાતે તેના સંબંધીના ઘરે આવ્યો હતો. શુક્રવારે રાત્રે પાકરીમાં રહેતા તેના બે મિત્રોએ તેને કંઇક કામ હોવાથી અમારી સાથે આવવા કહ્યું હતું. મિત્રોના આગ્રહથી હું તેમની સાથે આવ્યો. બાદમાં તેમને ખબર પડી કે તેઓ ચોરી કરવા આવ્યા છે. બનાવ અંગે વધુમાં તેણે જણાવ્યું કે તેનો એક મિત્ર મીણબત્તી વડે દુકાનમાં પૈસા વગેરેની ચોરી કરતો હતો. આ દરમિયાન તેનો પગ લપસી ગયો અને મીણબત્તી પેટ્રોલ ભરેલા ડબ્બા પર પડી અને આગ લાગી. તેણે કહ્યું કે તેના બંને મિત્રો દુકાનની વચ્ચે ઉભા હતા અને તે દુકાનના દરવાજે ઉભો હતો. આવી સ્થિતિમાં બંને મિત્રો ખરાબ રીતે દાઝી ગયા અને એકનું ઘટનાસ્થળે જ મૃત્યુ થયું. મૃતકની ઓળખ બાલુમથ પોલીસ સ્ટેશન વિસ્તારના રહેવાસી અમિત તુરી તરીકે થઈ છે. ઘાયલ થયેલા ચોરોના નામ સાગર તુરી અને સત્યમ ભુઈયા છે. દુકાનના માલિક બાલ્કેશ્વર સાહુએ પોલીસને જણાવ્યું હતું કે આગમાં હજારો રૂપિયાનો સામાન બળીને ખાખ થઈ ગયો હતો. બાલુમથ ડીએસપી આશુતોષ સત્યમે કહ્યું કે પોલીસ આ મામલાની તપાસ કરી રહી છે.

આ પણ વાંચો..લખનૌમાં રિટાયર્ડ IASના ઘરમાં વહેલી સવારે લૂંટ, વિરોધ કરવા પર પત્નીની કરાઈ હત્યા