ભુજમાં મળનારી RSSની બેઠકમાં રામમંદિર સહિત વિવિધ મુદ્દે ચર્ચા થશે

• RSSની અખિલ ભારતીય કાર્યકારી મંડળી બેઠક ભુજમાં યોજાશે
• રામ મંદિર પ્રાણ પ્રતિષ્ઠા સમારોહ અંગેના કાર્યક્રમોની ચર્ચા કરવામાં આવશે

રાષ્ટ્રીય સ્વયંસેવક સંઘની અખિલ ભારતીય કાર્યકારી મંડળની બેઠક ગુજરાતના ભુજમાં 5 થી 7 નવેમ્બર દરમિયાન યોજાવા જઈ રહી છે. રાષ્ટ્રીય સ્વયંસેવક સંઘના અખિલ ભારતીય પ્રચાર પ્રમુખ સુનીલ આંબેકરે સંઘની મહત્વની બેઠક સંદર્ભે નિવેદન આપતા કહ્યું હતું કે રાષ્ટ્રીય સ્વયં સેવક સંઘની વાર્ષિક અખિલ ભારતીય કાર્યકારી મંડળની બેઠક આ વર્ષે ગુજરાતના કચ્છ પ્રદેશના ભુજમાં 5, 6 અને 7 નવેમ્બર 2023ના રોજ યોજાશે. તેમાં 22 જાન્યુઆરી 2024 ના રોજ અયોધ્યામાં આયોજિત શ્રી રામ મંદિર પ્રાણ પ્રતિષ્ઠા સમારોહ અને તેનાથી સંબંધિત દેશભરમાં પ્રસ્તાવિત કાર્યક્રમો સહિત અન્ય ઘણા મુદ્દાઓ પર બેઠકમાં ચર્ચા કરવામાં આવશે.

आरएसएस की अखिल भारतीय कार्यकारी मंडल की बैठक 5 से 7 नवंबर तक गुजरात के भुज में होगी। pic.twitter.com/QixApc5tOq

— ANI_HindiNews (@AHindinews) October 26, 2023

સંઘના આ નેતાઓ હાજરી આપશે

આંબેકરે જણાવ્યું હતું કે, આ બેઠકમાં સંઘની રચના મુજબ રચાયેલા કુલ 45 પ્રાંતમાંથી પ્રાંતીય સંઘચાલકો, કાર્યવાહ અને પ્રાંતીય પ્રચારકો અને તેમના સહ-સંઘચાલકો, સહકાર્યકરો અને સહ-પ્રાંતીય પ્રચારકો હાજર રહેશે.

આ બેઠકમાં સરસંઘચાલક મોહન ભાગવત, સરકાર્યવાહ દત્તાત્રેય હોસાબલે અને અખિલ ભારતીય અધિકારીઓ સહિત કારોબારીના તમામ સભ્યો પણ હાજર રહેશે. આ સાથે સંઘ સાથે સંકળાયેલા કેટલાક વિવિધ સંગઠનોના પસંદગીના સંગઠન મંત્રીઓ પણ બેઠકમાં ભાગ લેવાના છે.

આ બેઠકમાં સંઘના સંગઠન કાર્યની સમીક્ષા સાથે ગત મહિને પુણેમાં મળેલી અખિલ ભારતીય સમન્વય બેઠકમાં ઉઠાવવામાં આવેલા મુદ્દા અને તાજેતરમાં વિજયાદશમીના તહેવાર દરમિયાન સંઘના વડા મોહન ભાગવતના ભાષણમાં ઉઠાવવામાં આવેલા કેટલાક મુખ્ય મુદ્દાઓ પર પણ ચર્ચા કરવામાં આવશે.

આ પણ વાંચો, ભાવનગરમાં કિશોરનું હાર્ટ એટેકથી મૃત્યુ, ઊંઘમાં આવ્યો હાર્ટ એટેક