ટ્રાવેલ ડેસ્કઃ તમે દુનિયામાં ઘણી બધી કોતરો જોઈ હશે, પણ આજે વાત કરવી છે એક એવી કોતર જેનાથી બહુ ઓછા લોકો વાકેફ હશે. આ જગ્યા એટલે ‘પાર્ટનાચ ગોર્જ’. આ એક કોતર છે. જે દક્ષિણ જર્મનીના ગાર્મિશ-પોર્ટેનકિર્ચન નજીક આવેલી રેઇન્ટલ ખીણમાં આવેલી છે. પર્વતમાળાની વચ્ચે પાર્ટનાચ કોતર બની છે. આ કોતર 702 મીટર લાંબી અને 80 ફૂટથી વધુ ઊંડી છે. આ સ્થળને વર્ષ 1912માં કુદરતી સ્મારક જાહેર કરવામાં આવ્યું હતું.
1 જૂન 1991ના દિવસે દક્ષિણ છેડે આવેલા ખડકો ધસી પડ્યાં હતા અને જળપ્રવાહ અવરોધાય ગયો હતો. મહત્ત્વનું છે કે, આ દુર્ઘટનામાં કોઈ જાનહાનિ થઈ નહોતી. આ દુર્ઘટનાને લીધે એક નાનું કુદરતી સરોવર રચાયું હતું. આ સરોવર વિશાળ પથ્થરોમાંથી પસાર થાય છે. 1992થી 108 મીટર (354 ફૂટ) લાંબી ગેલેરી બનાવવામાં આવી હતી. જે ખડકો ધસી પડ્યાં હતાં તેમાં બનાવવામાં આવી હતી. આ ગેલેરીમાંથી કોઈપણ વ્યક્તિ સંપૂર્ણ સુરક્ષા સાથે આ જગ્યાના અપ્રતિમ સૌંદર્યને નિહાળી શકે છે. આ જગ્યા પર ઘણી ફિલ્મોના શૂટિંગ પણ થયા છે. 1979ની ફિલ્મ નોસ્ફેરાટુ ધ વેમ્પાયરનું શૂટિંગ અહીં થયું હતું.
1912થી આ કોતર પ્રવાસીઓ માટે ખુલ્લી મૂકવામાં આવી છે અને આખું વર્ષ આ જગ્યાની મુલાકાત લઈ શકાય છે. ઉનાળામાં સવારે 8થી સાંજના 6 વાગ્યાની સુધી અને શિયાળામાં સવારે 9થી સાંજે 5 સુધી અહીં પ્રવેશ આપવામાં આવે છે. ઉલ્લેખનીય છે કે, આ જગ્યા માટે અમુક ફી તમારે ચૂકવવી પડશે. વસંતઋતુમાં બરફ ઓગળે છે ત્યારે કોતર થોડા દિવસો માટે બંધ કરવામાં આવે છે.
ફોટામાં આ જગ્યાની સુંદરતા જોઈ જ શકાય છે. ફોટા જોઈને તમને પણ ચોક્કસ આ જગ્યાએ જવાનું મન થશે જ. તો રાહ કોની જોવો છો… બેક પેક કરો અને નીકળી પડો કુદરતના આ અફાટ સૌંદર્યને માણવા. તન અને મન બંને ફ્રેશ થઈ જશે.
