ભારત-પાકિસ્તાન મેચને લઈને વિદેશ મંત્રીનું નિવેદન, કહ્યું- ‘ટૂર્નામેન્ટ તો આવતી જતી રહે’

નવી દિલ્હીઃ ક્રિકેટ મેચને લઈને ભારત અને પાકિસ્તાન વચ્ચેની ચર્ચાઓ પર પ્રથમ વખત વિદેશ મંત્રી એસ. જયશંકરનું નિવેદન સામે આવ્યું છે. વિદેશ મંત્રીએ શુક્રવારે કહ્યું કે સીમા પારના આતંકવાદને ક્યારેય સામાન્ય માનવા જોઈએ નહીં. BCCI દ્વારા ભારતીય ખેલાડીઓના પાકિસ્તાન નહીં જવાની જાહેરાત બાદ એશિયા કપ 2023ને લઈને BCCI અને PCB વચ્ચેના વિવાદ વચ્ચે જયશંકરે કહ્યું, ‘ટૂર્નામેન્ટ આવતી-જતી રહે છે અને તમે સરકારનું વલણ જાણો છો.જોઈએ શું થાય છે’

દરેક વ્યક્તિ અવાજ ઉઠાવશે તો જ દબાણ આવશે
‘હું ફરીથી કહેવા માંગુ છું કે આપણે ક્યારેય સ્વીકારવું જોઈએ નહીં કે કોઈ દેશને આતંકવાદનો અધિકાર છે. આપણે તેને ગેરકાયદેસર બનાવવું પડશે, અને આ માટે તે દેશ પર આંતરરાષ્ટ્રીય દબાણ હોવું જોઈએ. જ્યારે આતંકવાદનો ભોગ બનેલા લોકો અવાજ ઉઠાવશે ત્યારે આ દબાણ રહેશે. જયશંકરે એક ન્યૂઝ ચેનલના કાર્યક્રમમાં કહ્યું, આપણે આમાં નેતૃત્વ દેખાડવું પડશે કારણ કે આપણે આતંકવાદને કારણે ઘણું લોહી વહાવી દીધું છે.

આતંકવાદને જટિલ મુદ્દો ગણાવ્યો
ભારત અને પાકિસ્તાન વચ્ચે ફરી વાતચીત શરૂ કરવાના મુદ્દે જયશંકરે કહ્યું, ‘તે એક જટિલ મુદ્દો છે. જો હું તમારા માથા પર બંદૂક મૂકીશ તો તમે મારી સાથે વાત કરશો? નેતાઓ કોણ છે, છાવણીઓ ક્યાં છે… આપણે ક્યારેય એવું ન વિચારવું જોઈએ કે સરહદ પારનો આતંકવાદ સામાન્ય છે.