ભાવનગરઃ શહેરના કાળીયાબીડ વિસ્તારમાં આવેલા એક ફ્લેટમાં રહેતી પરપ્રાંતિય મહિલાએ કુતરીના બચ્ચાને ત્રીજા માળેથી ફેંકી હત્યા કરી નાખી છે. આ ઘટના જીવદયા પ્રેમીઓને જાણમાં આવતા ભારે આક્રોશ ફેલાયો છે અને આ જીવહત્યા સંદર્ભે પરપ્રાંતિય મહિલા વિરુદ્ધ એ-ડીવીઝન પોલીસ સ્ટેશનમાં ફરિયાદ નોંધાવી છે.
સમગ્ર બનાવ અંગે એ-ડીવીઝન પોલીસ મથકેથી જાણવા મળતી વિગતો અનુસાર શહેરના કાળીયાબીડ સ્થિત વિરાણી સર્કલ પાસે આલેખ કોમ્પલેક્ષ આવેલું છે. કોમ્પલેક્ષમાં રહેતા લોકો બેથી ત્રણ મહિનાની વય ધરાવતા કુતરીના બચ્ચાંને ખવડાવી-પીવડાવી સાર-સંભાળ રાખતાં હતા. આ વાત આ ફ્લેટમાં રહેતી પરપ્રાંતિય મહિલા આશા લુંબા-પંજાબીને પસંદ ન હોવાથી તેણે ગલુડીયાની સાર-સંભાળ રાખતાં લોકો ને જણાવ્યું હતું કે, આ ગલુડીયાને ક્યાંક છોડી આવો નહીં તો આ ગલુડીયું કાલે હયાત નહીં હોય.
તે દરમિયાન ગત તા.21-5ના રોજ વહેલી સવારે આરોપી મહિલા આશા લુંબાએ આ ગલુડીયાને ફલેટના ત્રીજા માળેથી ફેંકી હત્યા કરી હતી. જે સંદર્ભે એનિમલ કેર એનજીઓ ચલાવતા બ્રિજેશ શાહ તથા લક્ષ્મી જાનીને જાણ કરતાં તેઓ સ્થળપર દોડી આવ્યા હતા અને નિર્દોષ જીવની ક્રૂરતાથી હત્યા કરનાર મહિલા વિરુદ્ધ એ-ડીવીઝન પોલીસ સ્ટેશનમાં પશુ ક્રૂરતા સાથે અતિક્રમણ અંતર્ગત ફરિયાદ નોંધાવતાં પોલીસે મહિલા વિરુદ્ધ ગુનો નોંધી વધુ તપાસ હાથ ધરી છે.
