વોશિંગ્ટનઃ વર્લ્ડ હેલ્થ ઓર્ગેનાઈઝેશને(WHO) મંકીપોક્સ અંગે ચિંતા વ્યક્ત કરી છે. WHOએ કહ્યું છે કે, વિશ્વભરમાં મંકીપોક્સના કેસ વધી શકે છે. જે દેશોમાં આ રોગ સામાન્ય રીતે જોવા મળતો નથી ત્યાં દેખરેખ વધારવાની જરૂર છે. શનિવારે WHOએ કહ્યું કે, 12 દેશોમાં 92 કેસ મળી આવ્યા છે. તે જ સમયે 28 શંકાસ્પદ કેસ પણ સામે આવ્યા છે. આગામી દિવસોમાં WHO અન્ય દેશોને મંકીપોક્સથી બચવા માટે માર્ગદર્શિકા આપશે.
WHOએ કહ્યું કે, અત્યાર સુધી મળેલી માહિતી અનુસાર નજીકના શારીરિક સંપર્કમાં રહેલા લોકોમાં મંકીપોક્સ ફેલાઈ રહ્યો છે. મંકીપોક્સ પશ્ચિમ અને મધ્ય આફ્રિકાના દેશોમાં જોવા મળે છે. મંકીપોક્સ શીતળાના વાયરસના પરિવાર સાથે સંબંધિત છે. મંકીપોક્સ સામાન્ય રીતે 6-13 દિવસમાં તેના લક્ષણો બતાવવાનું શરૂ કરે છે. પરંતુ કેટલીકવાર તેમના લક્ષણો 5થી 21 દિવસમાં દેખાય છે.
મંકીપોક્સના લક્ષણો કેવાં હોય છે?
મંકીપોક્સથી ચેપગ્રસ્ત વ્યક્તિને તાવ, ગંભીર માથાનો દુખાવો, પીઠ અને સ્નાયુઓમાં દુખાવો થાય છે. તે જ સમયે ગંભીર નબળાઇ અનુભવે છે. આ સિવાય જો તેના દેખાતા લક્ષણોની વાત કરીએ તો શરીર પર મોટા પિમ્પલ્સ છે. શીતળાની જેમ તેઓ સમગ્ર શરીરમાં ફેલાય છે. જો આ દાણા આંખોમાં બહાર આવે છે, તો તે નજરને પણ અસર કરી શકે છે. WHO અનુસાર લોકો બેથી ચાર અઠવાડિયામાં આ વાયરસથી સ્વસ્થ થઈ જાય છે. પરંતુ ક્યારેક તે જીવલેણ સાબિત થઈ શકે છે. આ વાયરસ 11 ટકા સંક્રમિતોને મારી નાખે છે.
આ દેશોમાં કેસ જોવા મળ્યાં
મંકીપોક્સના કેસ અત્યાર સુધીમાં 12 દેશોમાં મળી આવ્યા છે. ઓસ્ટ્રેલિયામાં 1-5 કેસની પુષ્ટિ થઈ છે. બેલ્જિયમમાં, કેનેડા, ફ્રાન્સ, જર્મની, ઇટાલી, સ્વીડન, અમેરિકા અને નેધરલેન્ડમાં 1-5 કેસ મળી આવ્યા છે. યુકે, પોર્ટુગલ અને સ્પેનમાં 21-30 કેસ મળી આવ્યા છે. અત્યાર સુધીમાં કુલ 92 કેસની પુષ્ટિ થઈ છે જ્યારે 28 કેસ શંકાસ્પદ છે. કેનેડામાં 11-20 શંકાસ્પદ કેસ છે.
