સતત ધમધમતું મુંબઈ એરપોર્ટ સર્વર ડાઉન થવાથી થંભવાની અણીએ, અનેક મુસાફરો ફસાયા

મુંબઈ ઈન્ટરનેશનલ એરપોર્ટનું સર્વર અચાનક ડાઉન થઈ ગયું છે. કોમ્પ્યુટર સિસ્ટમની નિષ્ફળતાને કારણે તમામ એરલાઈન્સના ચેક-ઈનને અસર થઈ રહી છે. ઘણા મુસાફરોએ ટ્વિટર પર આ અંગે ફરિયાદ પણ કરી છે. ઉલ્લેખનીય છે કે, મુંબઈનું છત્રપતિ શિવાજી મહારાજ ઈન્ટરનેશનલ એરપોર્ટ મુંબઈ અને મુંબઈ મેટ્રોપોલિટન રિજન (MMR) માં ખૂબ જ વ્યસ્ત ઈન્ટરનેશનલ એરપોર્ટ છે. સર્વર ડાઉન પર છત્રપતિ શિવાજી મહારાજ ઈન્ટરનેશનલ એરપોર્ટ પરથી પણ માહિતી આવી છે. અધિકારીઓએ જણાવ્યું હતું કે સમસ્યાનું સમાધાન કરવામાં આવી રહ્યું છે અને ટૂંક સમયમાં કામગીરી ફરી શરૂ થવાની અપેક્ષા છે.

એરપોર્ટનો હવાલો CISF એ સંભાળ્યો

સોશિયલ મીડિયા પર મુસાફરોની ફરિયાદ બાદ એર ઈન્ડિયાએ પણ જવાબ આપ્યો છે. એર ઈન્ડિયાએ કહ્યું કે અમે સમજીએ છીએ કે વિલંબ ચોક્કસપણે અસુવિધાજનક છે. અમારી ટીમ અસુવિધા ઘટાડવા માટે કામ કરી રહી છે. તેઓ વધુ અપડેટ્સ માટે તમારા સંપર્કમાં રહેશે. CISFએ મુંબઈ ઈન્ટરનેશનલ એરપોર્ટ પર ચાર્જ સંભાળી લીધો છે. સીઆઈએસએફએ જણાવ્યું કે મુંબઈ ઈન્ટરનેશનલ એરપોર્ટ પર સર્વર ડાઉન હોવાને કારણે સામાન્ય કરતાં થોડો વધારે ધસારો છે. ભીડને સારી રીતે મેનેજ કરવામાં આવી રહી છે અને મેન્યુઅલ પાસ આપવામાં આવતા હોવાથી કોઈ અરાજકતા નથી.