BCCI સામે PCB ની લાલ આંખ : રમીઝ રાજાએ આપી દીધી આ ધમકી
ભારતીય ક્રિકેટ કંટ્રોલ બોર્ડ (BCCI) અને પાકિસ્તાન ક્રિકેટ બોર્ડ (PCB) વચ્ચે આવતા વર્ષે યોજાનાર એશિયા કપ અને ODI વર્લ્ડ કપને લઈને ફરી એકવાર વિવાદ ચાલી રહ્યો છે. હકીકતમાં, BCCI સેક્રેટરી જય શાહે તાજેતરમાં કહ્યું હતું કે ટીમ ઈન્ડિયા આવતા વર્ષે એશિયા કપ માટે પાકિસ્તાન નહીં જાય. આના પર હવે PCB ચીફ રમીઝ રાજાની પ્રતિક્રિયા સામે આવી છે. તેણે કટાક્ષમાં કહ્યું છે કે જો ટીમ ઈન્ડિયા એશિયા કપ રમવા માટે પાકિસ્તાન નહીં આવે તો અમે પણ આવતા વર્ષે વનડે વર્લ્ડ કપ રમવા ભારત નહીં જઈએ.
આ પણ વાંચો : ભારતીય ક્રિકેટ ટીમ એશિયા કપ 2023 માટે પાકિસ્તાન નહીં જાય, BCCIએ કર્યું સ્પષ્ટ
શું છે રમીઝ રાજાનું નિવેદન
પાકિસ્તાની ન્યૂઝ ચેનલ સાથે વાત કરતા રમીઝ રાજાએ કહ્યું, “અમારું સ્ટેન્ડ સ્પષ્ટ છે. જો ભારતીય ટીમ અહીં આવશે તો અમે વર્લ્ડ કપ માટે જઈશું. જો તેઓ નહીં આવે તો તેઓ અમારા વિના વર્લ્ડ કપ રમી શકે છે. અમે આક્રમક વલણ અપનાવીશું.” રમીઝ રાજાએ કહ્યું કે,”અમારી ટીમ સારું પ્રદર્શન કરી રહી છે. મેં હંમેશા કહ્યું છે કે આપણે પાકિસ્તાન ક્રિકેટની અર્થવ્યવસ્થાને સુધારવાની જરૂર છે અને જો આપણે સારું કરીશું તો જ તે થઈ શકશે. અમે 2021 T20 વર્લ્ડ કપમાં ભારતને હરાવ્યું હતું. અમે T20 એશિયા કપમાં પણ ભારતને હરાવ્યું. એક વર્ષમાં પાકિસ્તાન ક્રિકેટ ટીમે એક અબજ ડોલરની અર્થવ્યવસ્થા ધરાવતી ટીમને બે વાર હરાવ્યું છે.”
શું કહ્યું હતુ જય શાહે?
વાસ્તવમાં એશિયા કપ 2023 પહેલા પાકિસ્તાનમાં યોજાવાનો હતો. જોકે, એશિયન ક્રિકેટ કાઉન્સિલના અધ્યક્ષ જય શાહે કહ્યું હતું કે તે પાકિસ્તાન સિવાય અન્ય કોઈ તટસ્થ સ્થળે યોજાશે. તેણે કહ્યું હતું કે તેને યુએઈમાં પણ શિફ્ટ કરી શકાય છે. જય શાહે કહ્યું, “એશિયા કપ 2023 ન્યુટ્રલ વેન્યુ પર રમાશે. ભારત સરકાર અમારી ટીમને પાકિસ્તાન જવાની પરવાનગી અંગે નિર્ણય કરે છે, તેથી અમે તેના પર ટિપ્પણી કરીશું નહીં, પરંતુ 2023 એશિયા કપ માટે, એવું નક્કી કરવામાં આવ્યું છે કે ટૂર્નામેન્ટ તટસ્થ સ્થળે યોજવામાં આવશે.” જય શાહના આ નિવેદન બાદ પાકિસ્તાનમાં ખળભળાટ મચી ગયો છે. જો કે હવે પીસીબી ચીફ રમીઝ રાજાએ પણ આ અંગે મૌન તોડ્યું છે.
Jay Shah confirms India won't travel to Pakistan for Asia Cup 2023
Read @ANI Story | https://t.co/4rI55Olxnj#JayShah #Pakistan #India #AsiaCup2023 #AsiaCup pic.twitter.com/bnc4p7Q5Tr
— ANI Digital (@ani_digital) October 18, 2022
ODI ફોર્મેટમાં રમાશે આગામી એશિયા કપ
2023માં યોજાનાર આગામી એશિયા કપ ODI ફોર્મેટમાં રમાશે. એશિયા કપ આગામી મોટી ICC ટૂર્નામેન્ટ પર નજર રાખીને સમાન ફોર્મેટમાં રમાય છે. એટલે કે T20 વર્લ્ડ કપ 2022માં રમાયો છે. આવી સ્થિતિમાં આ વર્ષનો એશિયા કપ પણ T20 ફોર્મેટમાં રમાયો હતો. આ સિવાય 2023 માં ODI વર્લ્ડ કપ યોજાવાનો છે. તેથી જ આવી સ્થિતિમાં એશિયા કપ પણ ODI ફોર્મેટમાં રમાશે. આ એશિયા કપની 16મી સિઝન હશે. શ્રીલંકાની ટીમ હાલમાં ડિફેન્ડિંગ ચેમ્પિયન છે. એશિયા કપની વાત કરીએ તો ભારતીય ટીમે સૌથી વધુ સાત વખત એશિયા કપ જીત્યો છે. આ સાથે જ શ્રીલંકાએ છ વખત એશિયા કપનો ખિતાબ જીત્યો છે. પાકિસ્તાન આ ટુર્નામેન્ટ બે વખત જીતી ચૂક્યું છે.
"Could impact Pak's visit to India for 2023 WC": PCB on Jay Shah's comments on having neutral venue for next Asia Cup
Read @ANI Story | https://t.co/mocG9L1esL
#cricket #BCCI #JayShah #PCB pic.twitter.com/78D16tNn2z— ANI Digital (@ani_digital) October 19, 2022
2025માં પાકિસ્તાનમાં યોજાશે ચેમ્પિયન્સ ટ્રોફી
ચેમ્પિયન્સ ટ્રોફી ટૂર્નામેન્ટ પણ 2025થી પાછી આવી રહી છે. આ ટુર્નામેન્ટ 2017 પછી પ્રથમ વખત 2025માં રમાશે. ICCએ તેના FTP સાઇકલમાં પાકિસ્તાનને હોસ્ટિંગ સોંપ્યું હતું. ICCએ ગયા વર્ષે જ આની જાહેરાત કરી હતી. જો કે, જય શાહે કહ્યું કે 2025ની ચેમ્પિયન્સ ટ્રોફીનું સ્થળ નક્કી કરવાનું બાકી છે. જ્યારે તે નક્કી થશે ત્યારે અમે તેના પર ટિપ્પણી કરીશું.
છેલ્લા નવ વર્ષથી કોઈ દ્વિપક્ષીય શ્રેણી રમાઈ નથી
ભારત અને પાકિસ્તાને નવ વર્ષથી કોઈ દ્વિપક્ષીય શ્રેણી રમી નથી. બંને વચ્ચે છેલ્લી T20 અને ODI સિરીઝ ડિસેમ્બર 2012માં રમાઈ હતી. T20I શ્રેણી 1-1થી ડ્રો રહી હતી, જ્યારે ODI શ્રેણી પાકિસ્તાને 2-1થી જીતી હતી. તે જ સમયે, બંનેએ 2007-08 સીઝનથી ટેસ્ટ શ્રેણીમાં પણ બંને ટીમે એકબીજાનો સામનો કર્યો નથી. 2008માં મુંબઈમાં થયેલા આતંકી હુમલા બાદ ભારતે પાકિસ્તાનનો પ્રવાસ કર્યો નથી. તે જ સમયે, નિયંત્રણ રેખા પર વારંવાર યુદ્ધવિરામના ઉલ્લંઘન અને ફેબ્રુઆરી 2019 માં પુલવામા હુમલા પછી આ સંબંધ વધુ બગડ્યો છે. બે પાડોશી દેશો વચ્ચેના તણાવપૂર્ણ રાજકીય સંબંધોને કારણે, બંને ટીમો ફક્ત ICC ઇવેન્ટ્સ અને એશિયન ક્રિકેટ ઇવેન્ટ્સમાં જ એકબીજાનો સામનો કરી રહી છે.
