AAPના નેતા સત્યેન્દ્ર જૈનને VIP ટ્રીટમેન્ટ આપતા જેલ સુપ્રિટેન્ડેન્ટ સસ્પેન્ડ
તિહાર જેલમાં દિલ્હીના જેલ મંત્રી સત્યેન્દ્ર જૈનને આપવામાં આવેલ VIP ટ્રીટમેન્ટના કેસમાં હવે કાર્યવાહી કરવામાં આવી છે. તિહાર જેલના જેલ સુપ્રિટેન્ડેન્ટ અજીત કુમારને સસ્પેન્ડ કરવામાં આવ્યા છે. દિલ્હી સરકારના જેલ વિભાગે કહ્યું છે કે પ્રાથમિક દૃષ્ટિએ એવું જાણવા મળ્યું છે કે અજીત કુમાર તેમની ફરજ નિભાવવામાં બેદરકારી દાખવતા હતા. આ મામલે વધુ તપાસના આદેશ આપવામાં આવ્યા છે. અજીત કુમાર જેલ નંબર-7ના ઈન્ચાર્જ હોવાનું કહેવાય છે. સત્યેન્દ્ર જૈનને આ જેલ નંબર-7માં રાખવામાં આવ્યા છે. તમને જણાવી દઈએ કે આ પહેલા એન્ફોર્સમેન્ટ ડિરેક્ટોરેટે મની લોન્ડરિંગ કેસમાં ધરપકડ કરાયેલ આમ આદમી પાર્ટી સરકારના જેલ મંત્રી સત્યેન્દ્ર જૈન વિશે કોર્ટને મહત્વપૂર્ણ માહિતી આપી હતી. કોર્ટમાં પોતાનું સ્ટેન્ડ રજૂ કરતી વખતે EDએ કહ્યું હતું કે સત્યેન્દ્ર જૈન તિહાર જેલમાં એક અજાણ્યા વ્યક્તિ દ્વારા તેમના પગની મસાજ કરાવતા જોવા મળ્યા હતા.
EDએ એવો પણ દાવો કર્યો હતો કે તેમની પાસે પુરાવા તરીકે આનાથી સંબંધિત વીડિયો છે. આ સિવાય ED દ્વારા કોર્ટને જણાવવામાં આવ્યું હતું કે તેમને વિશેષ ભોજન પણ પીરસવામાં આવ્યું હતું. કેબિનેટ મંત્રી સત્યેન્દ્ર જૈન 12 જૂનથી દિલ્હીની તિહાર જેલમાં બંધ છે. તપાસ એજન્સીઓને ટાંકીને એવું પણ કહેવામાં આવ્યું હતું કે સત્યેન્દ્ર જૈન તેની પત્નીને જેલમાં ખૂબ જ સરળતાથી મળે છે. તે જેલના નિયમોનો ભંગ કરે છે અને તેની પત્નીને મળે છે. સત્યેન્દ્ર જૈનને લઈને ઈડીએ પણ કોર્ટ સમક્ષ કહ્યું હતું કે તે તપાસમાં સહકાર નથી આપી રહ્યા.
અહીં આ સમગ્ર વિવાદ વચ્ચે ભારતીય જનતા પાર્ટી (BJP) સતત આમ આદમી પાર્ટી પર પ્રહારો કરી રહી છે. કોર્ટમાં EDની દલીલો પર AAP પર કટાક્ષ કરતા ભાજપે તો ત્યાં સુધી કહ્યું હતું કે તિહારમાં કેજરીવાલ મસાજ સેન્ટર ખોલવામાં આવ્યું છે. ભાજપે પોસ્ટર પણ ચોંટાડ્યા હતા.
