સુપ્રીમ કોર્ટે શુક્રવારે વેબ સિરીઝ XXXમાં વાંધાજનક સામગ્રી માટે એકતા કપૂરને ઠપકો આપ્યો હતો. ફિલ્મ નિર્માતા અને ટીવી ક્વીન એકતા કપૂરે સુપ્રીમ કોર્ટમાં એક અરજી દાખલ કરી હતી. જે અંગે સુનાવણી હાથ ધરવામાં આવી હતી. જેમાં સુનાવણી દરમિયાન સુપ્રીમ કોર્ટે આકરી ટિપ્પણી કરી અને એકતા કપૂરને કહ્યું કે તમે દેશની યુવા પેઢીના મનને બગાડી રહ્યા છો.
શા માટે એકતાએ કોર્ટનો દરવાજો ખટખટાવ્યો હતો ?
OTT પ્લેટફોર્મ ઓલ્ટ બાલાજીની વેબ સિરીઝ XXX માં સૈનિકો અને તેમના પરિવારોની લાગણીઓને ઠેસ પહોંચાડવા બદલ બેગુસરાયમાં એક ભૂતપૂર્વ સૈનિકની ફરિયાદ પર સ્થાનિક અદાલત દ્વારા વોરંટ જારી કરવામાં આવ્યું હતું. એકતા કપૂરે બેગુસરાય કોર્ટ (બિહાર) દ્વારા જારી કરાયેલા વોરંટ વિરુદ્ધ SCનો સહારો લીધો હતો. એકતા કપૂરે આ વોરંટને પડકારતી પટના હાઈકોર્ટમાં અરજી પણ કરી હતી. પરંતુ હાઈકોર્ટ સુનાવણીમાં વિલંબ કરી રહી હતી તેથી તેણે સુપ્રીમ કોર્ટનો સંપર્ક કર્યો હતો. સુપ્રીમ કોર્ટે કોઈ આદેશ આપવાને બદલે એકતા કપૂરની અરજી પેન્ડિંગ રાખી છે. કોર્ટે તેમને સલાહ આપી કે હાઈકોર્ટમાં સુનાવણીની સ્થિતિ જાણવા માટે સ્થાનિક વકીલની મદદ લેવી વધુ સારું રહેશે.
સુપ્રીમ કોર્ટની બેન્ચે ફટકાર લગાવી
જસ્ટિસ અજય રસ્તોગી અને જસ્ટિસ સીટી રવિકુમારની બેંચે સુનાવણી દરમિયાન કહ્યું કે, “કંઈક કરવું પડશે. તમે આ દેશની યુવા પેઢીના મનને ભ્રષ્ટ કરી રહ્યા છો. તે બધા માટે ઉપલબ્ધ છે. OTT સામગ્રી બધા માટે ઉપલબ્ધ છે. તમે લોકોને કેવા વિકલ્પો આપો છો? ઉલટું તમે યુવાનોના મનને પ્રદૂષિત કરી રહ્યા છો.
એકતાના વકીલે શું દલીલ રજૂ કરી ?
આ કેસ અંતર્ગત એકતા કપૂર વતી તેના વકીલ મુકુલ રોહતગીએ કહ્યું કે પટના હાઈકોર્ટમાં અરજી દાખલ કરવામાં આવી છે. રોહતગીએ કહ્યું કે શ્રેણીની સામગ્રી દર્શકો આધારિત છે અને આ દેશમાં કંઈપણ પસંદ કરવાની સ્વતંત્રતા છે. તેના પર કોર્ટે પૂછ્યું કે લોકોને કેવો વિકલ્પ આપવામાં આવી રહ્યો છે.
કોર્ટે વકીલને પણ આડે હાથ લીધા
સુપ્રીમ કોર્ટની બેન્ચે કહ્યું, “જ્યારે પણ તમે આ કોર્ટમાં આવો છો અમે તેની પ્રશંસા કરતા નથી. આવી અરજી દાખલ કરવા બદલ અમે તમને દંડ કરીશું. રોહતગી મહેરબાની કરીને તમારા ક્લાયન્ટને આ વાત જણાવો. માત્ર એટલા માટે કે તમે એક સારા વકીલની નિમણૂક કરી શકો છો. આ કોર્ટ અવાજ ધરાવતા લોકો માટે નથી. આ કોર્ટ એવા લોકો માટે કામ કરે છે જેમની પાસે અવાજ નથી. જે લોકો તમામ સુવિધાઓ હોવા છતાં ન્યાય મેળવી શકતા નથી, તો સામાન્ય માણસનું જીવન કેવું હશે તેની કલ્પના કરો.
