ઈલેક્ટ્રિક કાર બનાવવા માટે Honda-Sonyની ડીલ, પ્રીમિયમ EV સેગમેન્ટમાં સાથે કરી રહી છે કામ

ઈલેક્ટ્રિક બાઈક બાદ હવે ઈલેક્ટ્રિક કારને હવે વધુ મહત્વ આપવામાં આવી રહ્યું છે, જેના કારણે તમામ મોટી ઓટોમોબાઈલ કંપનીઓ આ માર્કેટમાં ઝડપથી નવી કાર લોન્ચ કરી રહી છે. તે જ સમયે, EVના ઉછાળા સાથે, ઓટોમોબાઇલ માર્કેટમાં સોની ગ્રુપ કોર્પ અને હોન્ડા મોટર વચ્ચે એક મહત્વપૂર્ણ સોદો થયો છે. આ બંને સંયુક્ત રીતે ઇલેક્ટ્રિક વાહનો બનાવશે અને લોન્ચ કરશે. 2026 સુધીમાં ઇલેક્ટ્રિક વાહનો (EV)ની કામગીરી પણ શરુ કરી દેવામાં આવશે. અહેવાલ મુજબ, સોની હોન્ડા મોબિલિટીના ઇલેક્ટ્રિક વાહનોને યુએસ અને યુરોપમાં ઓનલાઈન વેચાણ મોડલ દ્વારા ઓફર કરવામાં આવશે.

સોની અને હોન્ડા વચ્ચે ડીલ
આ વર્ષે જૂન મહિનામાં સોની અને હોન્ડા મોબિલિટી વચ્ચે ડીલ થઈ હતી. બંને કંપનીઓએ પર્સનલ ઈલેક્ટ્રિક વાહનો બનાવવા માટે તેમના પ્રોજેક્ટ્સમાં ઝડપ દર્શાવી છે. સોની દાયકાઓથી ઇલેક્ટ્રોનિક્સના ક્ષેત્રમાં અગ્રણી કંપની છે. તેવી જ રીતે, હવે ઓટોમોબાઇલ માર્કેટમાં હોન્ડાનો પણ મોટો હિસ્સો છે. હોન્ડા મોબિલિટીના સીઈઓ યાસુહિદે મિઝુનો પણ આ મામલે ખૂબ રસ લઈ રહ્યા છે. તેમણે કહ્યું કે બંને પ્રીમિયમ રેન્જની ઇલેક્ટ્રિક કાર લોન્ચ કરવા માટે તેમની કુશળતાનો ઉપયોગ કરશે.

પ્રીમિયમ સેગમેન્ટની કાર બનાવવાની કામગીરી
Sony Honda Mobility તરફથી આવનારી EV પ્રીમિયમ EV સેગમેન્ટમાં રજૂ કરવામાં આવશે. આનો અર્થ એ છે કે આ કાર મોટા પ્રમાણમાં બજાર વપરાશ માટે સસ્તી નહીં હોય. સોનીને ઇલેક્ટ્રિક વાહનોમાં સોફ્ટવેર સિસ્ટમ ડિઝાઇન કરવાનું કામ મળ્યું છે. તેમજ આ સોફ્ટવેર ક્લાઉડ-આધારિત સેવાઓ અને ઇન-કેબિન મનોરંજન વિકલ્પો માટે સોની જવાબદાર રહેશે.

આ પણ વાંચો: ગુજરાત ‘ઈલેક્ટ્રિક વ્હીકલ’નું બનશે હબ, PM મોદીએ આપી ભેટ