IND vs SA : કાલે રાંચીમાં બીજી વનડે, સીરીઝમાં રહેવા ભારતને જીતવું જરૂરી

ભારત અને સાઉથ આફ્રિકા વચ્ચે ચાલી રહેલી વનડે સીરીઝનો આવતીકાલે રવિવારે બીજો મેચ રાંચીમાં રમાવાનો છે. આ મેચમાં ભારતે જીતવું જરૂરી છે કારણ કે જો આ મેચ તે હારી જાય છે તો સીરીઝ આફ્રિકાના નામે થઈ જશે અને અંતિમ મેચ માત્ર ઔપચારિક જ બનીને રહી જશે. મહત્વનું છે પ્રથમ મેચમાં લખનૌ ખાતે આફ્રિકાએ ભારતને આપેલા 250 રનનો ટાર્ગેટ ભારત કરી શકી ન હતી અને 9 રનથી આ મેચમાં ભારતની હાર થઈ હતી.

સેમસને પ્રથમ મેચમાં સારી ઇનિંગ રમી હતી

લખનૌમાં રમાયેલી પ્રથમ મેચમાં ભારતીય બોલરોએ સારો દેખાવ કર્યો હતો, પરંતુ દક્ષિણ આફ્રિકાએ 40 ઓવરની મેચમાં 249 રન બનાવીને વાપસી કરી હતી. જવાબમાં ભારતનો ટોપ ઓર્ડર નિષ્ફળ રહ્યો હતો, પરંતુ સંજુ સેમસને અંતમાં સારી બેટિંગ કરી અને ભારતને કમબેક કર્યું. જો કે તે પોતાની ટીમને જીત સુધી ન પહોંચાડી શક્યો, પરંતુ તેણે પોતાની બેટિંગથી ઘણો પ્રભાવિત કર્યો.

કેપ્ટન ધવન અને ગીલ પાસેથી મોટી ઇનિંગ્સની અપેક્ષા

શિખર ધવન અને શુભમન ગિલની ઓપનિંગ જોડીએ છેલ્લી કેટલીક સિરીઝમાં શાનદાર પ્રદર્શન કર્યું છે. આ બંનેએ વેસ્ટ ઈન્ડિઝ સામેની શ્રેણીમાં શાનદાર બેટિંગ કરી હતી. સાઉથ આફ્રિકા સામેની પ્રથમ મેચમાં બંને નિષ્ફળ રહ્યા હોવા છતાં બીજી મેચમાં બંને બેટ્સમેન પાસેથી મોટી ઇનિંગ્સની અપેક્ષા રાખવામાં આવશે. તે જ સમયે, પ્રથમ મેચમાં, બોલરોએ પણ સારી શરૂઆત બાદ ખરાબ પ્રદર્શન કર્યું અને દક્ષિણ આફ્રિકાને 249 રન સુધી પહોંચાડી દીધું. ભારતે ખાસ કરીને ડેથ ઓવરોમાં ઘણા રન આપ્યા હતા. ટીમ ઈન્ડિયાએ બીજી મેચમાં તેમાં સુધારો કરવો પડશે.

દીપક ચહર ઈજાગ્રસ્ત થતાં વોશિંગ્ટન સુંદરની પસંદગી

ભારત અને દક્ષિણ આફ્રિકા વચ્ચેની વનડે શ્રેણી માટે વોશિંગ્ટન સુંદરનો ભારતીય ટીમમાં સમાવેશ કરવામાં આવ્યો છે. ઈજાગ્રસ્ત દીપક ચહરના સ્થાને તેને ટીમમાં તક આપવામાં આવી છે. ચહર શ્રેણીની પ્રથમ વનડે પહેલા જ ઈજાગ્રસ્ત થયો હતો. ચહરને પ્રેક્ટિસ દરમિયાન તેના પગની ઘૂંટીમાં ઈજા થઈ હતી અને હવે તે દક્ષિણ આફ્રિકા સામેની સમગ્ર ODI શ્રેણીમાંથી બહાર થઈ ગયો છે. વોશિંગ્ટન સુંદરે ભારત માટે તેની છેલ્લી વનડે આઠ મહિના પહેલા વેસ્ટ ઈન્ડિઝ સામે ફેબ્રુઆરીમાં રમી હતી.