સચિન પાયલોટ નવરાત્રિ ઉપર જ સીએમના શપથ લઈ લેશે ! કોણે કરી ભવિષ્યવાણી ?

કોંગ્રેસના રાષ્ટ્રીય અધ્યક્ષની ચૂંટણી માટે નોમિનેશનની તૈયારીઓ ચાલી રહી છે. જેમાં રાજસ્થાનના મુખ્યમંત્રી અશોક ગેહલોત 28 સપ્ટેમ્બરે ઉમેદવારી નોંધાવી શકે છે. રાષ્ટ્રીય અધ્યક્ષના પદ માટે ઉમેદવારી પત્ર રજૂ કરવાની જાહેરાત થઈ ત્યારથી જ રાજસ્થાનના નવા મુખ્યમંત્રીને લઈને ચર્ચા ચાલી રહી છે. જયપુરથી લઈને દિલ્હી સુધી કોંગ્રેસ પાર્ટીમાં રાજકીય હલચલ વધી ગઈ છે. તે જ સમયે, હવે અશોક ગેહલોત અને સચિન પાયલોટ જૂથના ધારાસભ્યોએ પણ એકબીજાના સમર્થનમાં નિવેદનબાજી શરૂ કરી દીધી છે. તેવામાં આજે શનિવારે રાજ્ય સરકારમાં ગ્રામીણ વિકાસ રાજ્ય મંત્રી રાજેન્દ્ર સિંહ ગુડાએ સચિન પાયલટને મુખ્યમંત્રી માટે શ્રેષ્ઠ ચહેરો ગણાવ્યો હતો. તેમણે કહ્યું કે, અશોક ગેહલોતનું કોંગ્રેસ અધ્યક્ષ બનવું લગભગ નિશ્ચિત છે. તેમના પછી સીએમ પદ માટે કોંગ્રેસમાં પાયલોટથી સારો કોઈ ચહેરો હોઈ શકે નહીં. પાયલોટ યુવા નેતા છે, તે પોતાની સ્ટાઈલમાં રાજનીતિ કરે છે. મને લાગે છે કે તેઓ નવરાત્રીમાં સીએમ બનશે.

2023 માં સરકાર પુનરાવર્તન કરશે

વધુમાં મંત્રી ગુડાએ કહ્યું કે, હવે રાજસ્થાનના નવા મુખ્યમંત્રી અંગે હાઈકમાન્ડે નિર્ણય લેવાનો છે. ગમે તે થાય, બધા કોંગ્રેસીઓ અને અમારા તમામ સહયોગી જેઓ પાર્ટીને સમર્થન આપે છે અને બસપાના અમારા છ ધારાસભ્યો તેમની સાથે હશે. આ વખતે કોંગ્રેસ સરકારે સારું કામ કર્યું છે. સચિન પાયલટનો ચહેરો પણ ચૂંટણીમાં ફરક પાડશે. 2023માં કોંગ્રેસ સરકારને ભવ્ય રીતે રિપીટ કરશે.