કર્ણાટક પોલીસે લિંગાયત મઠના સંત શિવમૂર્તિ મુરુગાની ધરપકડ કરી છે. અગાઉ તેની સામે લુકઆઉટ નોટિસ જાહેર કરવામાં આવી હતી અને હવે તેની ધરપકડ કરવામાં આવી છે. મુરુગા પર સગીરાઓના યૌન શોષણનો આરોપ છે. મહત્વનું છે કે મુરુગા લિંગાયત મઠ ખૂબ જ પ્રખ્યાત મઠ છે. મઠના સંત શિવમૂર્તિ મુરુગા પર સગીરાઓનું યૌન શોષણ કરવાનો આરોપ છે. બે સગીરાઓની ફરિયાદ બાદ મૈસુર પોલીસે સંત વિરુદ્ધ FIR નોંધી હતી. પોલીસે પોક્સો એક્ટ હેઠળ પણ કેસ નોંધ્યો છે.
કોર્ટમાં રજૂ કરી પોલીસ માંગશે 14 દિવસના રિમાન્ડ
હાલ, મુરુગાની ધરપકડ કરવામાં આવી છે અને તેની પૂછપરછ કરવામાં આવશે. સગીરાઓ દ્વારા તેમના પર ગંભીર આરોપો લગાવવામાં આવ્યા છે, આવી સ્થિતિમાં પોલીસ પણ આ જ દલીલોના આધારે તેમની પૂછપરછ કરવા જઈ રહી છે. સમાચાર એ પણ છે કે આજે રાત્રે તેનું મેડિકલ પણ કરવામાં આવશે અને તેને જજ સમક્ષ રજૂ કરવામાં આવશે. પોલીસ મુરુગાની ઓછામાં ઓછી 14 દિવસની કસ્ટડી માંગે છે. અગાઉ એવા અહેવાલો આવ્યા હતા કે શિવમૂર્તિ મુરુગા તેમના મઠમાંથી ભાગી ગયા હતા, પરંતુ બાદમાં પોલીસે જણાવ્યું કે તેઓ કાયદાકીય સલાહ લેવા માટે તેમના વકીલને મળવા જઈ રહ્યા હતા. આ મામલામાં મોટી વાત એ છે કે જે બે સગીરાઓએ મુરુગા પર યૌન શોષણનો આરોપ લગાવ્યો છે, તે બંને મઠ દ્વારા સંચાલિત શાળામાં અભ્યાસ કરે છે. આ પીડિતો એક NGOની મદદથી ફરિયાદ કરવા માટે જિલ્લા બાળ કલ્યાણ સમિતિ પાસે પહોંચી હતી. આ કેસમાં શિવમૂર્તિ મુરુગા ઉપરાંત ચાર વોર્ડન વિરુદ્ધ પણ કેસ નોંધવામાં આવ્યો છે. ફરિયાદમાં જણાવાયું છે કે મઠ સંચાલિત શાળાની છાત્રાલયમાં રહેતી 15 અને 16 વર્ષની યુવતીઓ પર લગભગ સાડા ત્રણ વર્ષથી દુષ્કર્મ આચરવામાં આવતું હતું. આ સિવાય બીજી ઘણી યુવતીઓ સાથે પણ આવું જ કરવામાં આવ્યું હતું.
મામલો કોર્ટમાં પહોંચ્યો, મુરુગા વિરૂદ્ધ પ્રદર્શન
જો કે, શુક્રવારે કર્ણાટકના ચિત્રદુર્ગ જિલ્લાની સ્થાનિક કોર્ટમાં પણ આ મામલે સુનાવણી થવાની છે. હકીકતમાં, ચિત્રદુર્ગની સેશન્સ કોર્ટે આ કેસમાં બે સગીર પીડિતાના વકીલો વચ્ચે મતભેદો જોયા હતા, જેના કારણે સુનાવણી શુક્રવાર સુધી ટાળી દેવામાં આવી હતી. હાલ આ મામલાને કારણે કર્ણાટકમાં સ્થિતિ તંગ બની રહી છે. અનેક સામાજિક સંગઠનોએ આવતીકાલે સવારે 10.30 વાગ્યે બેંગલુરુના ફ્રીડમ પાર્કમાં શિવમૂર્તિ મુરુગા વિરુદ્ધ વિરોધ પ્રદર્શનનું આહ્વાન કર્યું છે.
