ખેડા : અમદાવાદના પરિવારની કારનો અકસ્માત, બાળકી સહિત ચારના મોત

અમદાવાદ-વડોદરા એક્સપ્રેસ હાઇવે પર ગંભીર અકસ્માત થયાની ઘટના સામે આવી છે. ખેડા નજીક મોડી રાત્રે આ ઘટના સામે આવી હતી. જેમાં અમદાવાદના પરિવારના એક બાળકી સહિત ચારના મોત નિપજયા છે. હાલ પોલીસે આ મામલે તપાસ હાથ ધરી છે.

મૃતકોમાં 2 મહિલા, એક પુરુષ અને એક બાળકી

મળતી માહિતી મુજબ રાજ્યમાં છાશવારે અકસ્માત થયાની ઘટનાઓ સામે આવતી રહે છે. ત્યારે તાજેતરમાં થોડા દિવસો અગાઉ જ આ જ હાઇવે પર એક ગમખ્વાર અકસ્માત સર્જાયો હતો. જેમાં એક કાર્ગો ટ્રેલર ટ્રક, ઓઇલ ટેન્કર અને આઇસર વચ્ચે અકસ્માત થયો હતો. આ અકસ્માતમાં એક ડ્રાઇવરનું મોત નિપજ્યું હતું જ્યારે અન્ય એક વ્યક્તિ ગંભીર રીતે ઘાયલ થઇ હતી. તેવામાં ગત મોડી રાત્રે અમદાવાદ-વડોદરા એક્સપ્રેસ હાઇવે પર રિલાયન્સ પેટ્રોલ પંપ નજીક વડોદરા તરફ જતી એક કારને ગંભીર અકસ્માત નડ્યો છે. જેમાં કારમાં સવાર 4 લોકોને ઘટનાસ્થળે જ કાળ ભરખી ગયો હતો. મૃત્યુ પામેલ વ્યક્તિઓમાં 2 મહિલા, એક પુરુષ અને એક બાળકીનું ઘટનાસ્થળે મોત નિપજ્યું છે. આ તમામ મૃતકો અમદાવાદના વટવા વિસ્તારના રહેવાસી છે. હાલમાં તમામના મૃતદેહોને નડિઆદની સિવિલ હોસ્પિટલ ખાતે પોસ્ટમોર્ટમ અર્થે ખસેડવામાં આવ્યા છે.