મીની કૂપર કાર, Gucci બેગ, ડાયમંડ…સુકેશ ચંદ્રશેખરની આ 8 કરોડની ભેટ જેકલીન માટે મુશ્કેલી બની

ગિફ્ટ કોને ના ગમે..અને કોણ ગિફ્ટ લેવાનો ઇનકાર કરે.. પરંતુ જયારે એ ગિફ્ટ તેમના માટે મુશ્કેલી બની જાય તો…હા આવો જ ઘાટ ઘડાયો છે બોલિવૂડ એક્ટ્રેસ જેકલીન ફર્નાન્ડીઝ સાથે. શ્રીલંકામાં જન્મેલી અભિનેત્રી જેક્લીન માટે મની લોન્ડરિંગ અને છેતરપિંડીના કેસમાં જેલમાં બંધ સુકેશ ચંદ્રશેખર પાસેથી મળેલી ગિફ્ટ મુસીબત બની ગઈ છે.

એન્ફોર્સમેન્ટ ડિરેક્ટોરેટ (ED) એ બુધવારે સુકેશ ચંદ્રશેખરને સંડોવતા રૂ. 200 કરોડના મની લોન્ડરિંગ કેસમાં પૂરક ચાર્જશીટ દાખલ કરી હતી. આ ચાર્જશીટમાં બોલિવૂડ અભિનેત્રી જેકલીન ફર્નાન્ડીઝને પણ આરોપી બનાવવામાં આવી છે. દિલ્હી કોર્ટ આ ચાર્જશીટ પર 31 ઓગસ્ટે વિચાર કરશે. જેકલીન ફર્નાન્ડિસને પણ ED દ્વારા અનેક વખત સમન્સ મોકલવામાં આવ્યા હતા. તેની ઘણી વખત પૂછપરછ પણ કરવામાં આવી છે.

આ પહેલીવાર છે જ્યારે EDએ તેની ચાર્જશીટમાં જેકલીનને આરોપી બનાવી છે. ઇડીએ આ કેસમાં અગાઉ ચાર્જશીટ અને પૂરક ચાર્જશીટ પણ દાખલ કરી હતી. પરંતુ આમાં જેકલીન ફર્નાન્ડિસનું નામ આરોપી તરીકે નહોતું. જેકલીને 2009માં બોલિવૂડમાં એન્ટ્રી કરી હતી. અગાઉ એપ્રિલમાં ઇડીએ પીએમએલએ હેઠળ રૂ. 15 લાખ રોકડ સહિત રૂ. 7.27 કરોડનું ભંડોળ અસ્થાયી રૂપે જોડ્યું હતું. EDએ આ ભંડોળને ‘ગુનાથી કમાયેલ’ ગણાવ્યું હતું. એટલે કે સુકેશ ચંદ્રશેખર તરફથી મળેલી ગિફ્ટ જેકલીન માટે સમસ્યા બની ગઈ હતી.

EDએ તેના નિવેદનમાં જણાવ્યું હતું કે સુકેશ ચંદ્રશેખરે જૈકલીન ફર્નાન્ડીઝને ખંડણી સહિતની ગુનાહિત પ્રવૃત્તિઓમાંથી મળેલી રકમમાંથી 5.71 કરોડ રૂપિયાની ભેટ આપી છે. ED અનુસાર સુકેશે તેના ભૂતપૂર્વ સાથીદાર અને કેસની આરોપી પિંકી ઈરાનીને આ ગિફ્ટ આપવા માટે કહ્યું હતું. આ ગિફ્ટો ઉપરાંત ચંદ્રશેખરે જેકલીનના પરિવારના સભ્યોને US $ 1,72,913 (આશરે 1.3 કરોડ રૂપિયા)ની રકમ પણ આપી હતી, એમ તપાસ એજન્સીએ એક નિવેદનમાં જણાવ્યું હતું. તપાસમાં સામે આવ્યું છે કે ચંદ્રશેખરે વેબ સિરીઝની સ્ક્રિપ્ટ લખવા માટે જેકલીન વતી એક લેખકને 15 લાખ રૂપિયા આપ્યા હતા.

જેકલીનને મળેલી આ ગિફ્ટ બની મુસીબત

ED અનુસાર જેક્લિને તેની પૂછપરછ દરમિયાન ખુલાસો કર્યો હતો કે સુકેશે તેને ગુચી, ત્રણ ચેનલ ડિઝાઇનર બેગ, 2 ગુચી જિમવેર આઉટફિટ્સ, લૂઈસ વિટન શૂઝ, બે જોડી હીરાની બુટ્ટી, એક બહુ રંગીન પથ્થર અને બે હર્મિસ બ્રેસલેટ આપ્યા હતા. આ સિવાય સુકેશે જેકલીનને મિની કૂપર કાર પણ ગિફ્ટ કરી હતી. જોકે, જેક્લિને દાવો કર્યો હતો કે તેણે તેને લેવાની ના પાડી દીધી હતી અને તેને પરત કરી દીધી હતી. EDએ કહ્યું કે જેકલીન ગયા વર્ષે ફેબ્રુઆરીથી ઓગસ્ટ સુધી સુકેશના સતત સંપર્કમાં હતી.