ગુજરાત : આરોગ્યના નામે દારૂ પરમિટની જાણે લ્હાણી કરવામાં આવી

• વિધાનસભામાં રજૂ થયેલાં આંકડાએ જ દારૂબંધીની પોલ ઉઘાડી દીધી
• બે વર્ષમાં આરોગ્યના બહાને 24 હજારથી વધુ દારૂના પરવાના
• અમદાવાદમાં બે વર્ષમાં 7390 લોકોને મળી દારૂની પરમિટ

ગુજરાતમાં એક બાજું ઉદ્યોગો અને પ્રવાસનને પ્રોત્સાહન આપવાનું બહાનું ધરીને ગિફ્ટ સિટીથી માંડીને સ્ટાર હોટલોને દારૂ વેચવા મંજૂરી આપવામાં આવી રહી છે. બીજી તરફ, આરોગ્યના નામે દારૂની પરમિટની જાણે લ્હાણી કરવામાં આવી રહી છે.

બે વર્ષમાં આરોગ્યના બહાને 24 હજારથી વધુ દારૂના પરવાના

વિધાનસભામાં રજૂ થયેલાં આંકડાએ જ દારૂબંધીની પોલ ઉઘાડી દીધી છે. કારણ કે, બે વર્ષમાં આરોગ્યના બહાને 24 હજારથી વધુ દારૂના પરવાના અપાયાં છે. આરોગ્યના નામે દારૂ પીનારાઓની સંખ્યા વધી રહી છે. વર્ષ 2023-24 અને વર્ષ 2024-25માં દારૂની પરમિટ મેળવવામાં અમદાવાદ અવ્વલ રહ્યું છે. જ્યારે સુરત બીજા ક્રમે રહ્યું છે.

અમદાવાદમાં બે વર્ષમાં 7390 લોકોને મળી દારૂની પરમિટ

બે વર્ષમાં અમદાવાદમાં 7390 દારૂની પરમિટ અપાઈ હતી. અમદાવાદીઓએ તો દારૂ પીવા માટે પરમિટ મેળવવા 12.71 કરોડ રૂપિયા ખર્ચી નાંખ્યા હતાં. આ જ સમયગાળા દરમિયાન, સુરતમાં 6975 પરવાના અપાયા હતાં. પરમિટની ફી પેટે સુરતીલાલાઓએ 6.43 કરોડ ચૂકવ્યા હતાં. અમરેલી, ખેડા, વડોદરા, દાહોદ, ગાંધીનગર, આણંદ, જૂનાગઢ, ભાવનગર, મોરબી, બોટાદ, મહેસાણા, પાટણ અને અમરેલીમાં દારૂની પરમિટ આપવામાં આવી હતી.

આ પણ વાંચો: અમદાવાદ: બે વર્ષમાં 4600થી વધુ બાળકોને હૃદય, કિડની અને કેન્સર જેવી ગંભીર સમસ્યા